MALAKIYA 2 - BIBALDA TA PELDETTA

¹ Nigi muliyan-sa-ɗifinna, wulini dit kayni nan hina' tigi nigiya!

² La nigi min humɗi, la nigi var hay dikgiya kay vul suburta tam semda vanɗi, nan ma gi be'da jargiya, nan ma sli bolda vigi goyo, Awa, nan ma beɗgiya, kay nigi may ŋom va hay dikgiɗi.

³ Fay tuwayawa! Nan min ɓulak jafna vigi goyo, nan ma yakgi zigidik kulo kirgiya, kayni mi zigidik faray ma nigi ŋatamna, ma nargi goy hiɗi namu.

⁴ Nala nigi ma wi ala dit kayni hina' tigi mi nanu, kay a bonota ta nan juna' hiɗi Levi ma hin hay liya'na dok-doko. Din mi Ma-Vatɗina vi vok-ma-duura.

⁵ Bonot ta nan juna' hiɗi Levi kayni, ti bonota ta irita hiɗi toyta ka haya, kayni mi va ma nan vul talamu kay nam ma li nar kuɗanu. Awa, tuwam li nar kanu kaw, hay li ma humam hum semda vanawa, tuwam vum bat-bat'.

⁶ Vun-ma-gatna vi gasita ay hay vunamu, jiw-zlata may hay vunam noŋɗi; nam poyay kuɗanu hay sle'ta hiɗi ɗigerta kaw, sum sa li joota nam hotsi bugolsi ŋolo.

⁷ Kay mul-ma-ɗifinna vunam ma dum mi law ma yalla ka haya, kay Sumun job caw vun-ma-gatn kayn hay vunam namu, kay namu mi sa ma sunda vi Ma-Vatɗina vi vok-ma-duura.

⁸ May nigiya, nigi cal hagatawa goyo, vun-ma-gatna nigi muɗumawa mi va ma dab sem sumun ŋolo, bonota van hiɗi Levi nigi rawa'awa goyo, din mi Ma-Vatɗina vi vok-ma-duura.

⁹ Nan hayɗini, nan min muɗgi bisi, muɗgi puru vok sumun noŋ kaf, kay nigi may ŋom hagata vanɗi, lo nigi poŋ ir sumuna hay li ma nigi tun caw disi dir vun-ma-gatna goyo.

Law kay slita vi gurona vi sum sa waana

¹⁰ Nay kaf buy ma vuɗayn mi sa kepɗi su? Buy ma inayna nam mi Lawn kepɗi su? La nala nay muɗi bay-ɗigere jar-tuwaya, hay li ma nay suɗ bonota vi sumiyay goy waa'a kay mige?

¹¹ Jafna vi Yuda ɗek tuwsi goy bay-gasiya, law ma liwisi ay liya hay Israyel hiɗi Yerusalem; kay va ma peldet kir Ma-Vatɗina, ma nam minimna nisi muɗum goy waa'a, nisi yaw guro-boyna vi lawayn ma waana.

¹² Sa ma li ki kayn nala, Ma-Vatɗin ma kaam goy jar segena, nam ma mus jigere ma hot dit kaw, nam ma kaam selem goyo hay guɗukŋa vi Yakub, nam ma kaam selem goy jar sa li vulda tam Lawna vi vok-ma-duura.

¹³ Ɗuwgi va hena ma nigi li'e lo: Giwin-ma-ɗifinna vi Ma-Vatɗina nigi ŋuruɓum yalam hiɗi zimiyna, nigi ŋuruɓum yalam hiɗi tiyna hiɗi yorta, ta-ta nigi muɗum a vulda vigi may kiram ŋaa'a loɗi, sle ma nigi vulum talamna nam may kiram ŋaa'a loɗi.

¹⁴ Nigi di lo: Kay mige? Kay Ma-Vatɗina ay mi sa ma li di-goyta jaraŋ hiɗi cata vaŋu, ta naŋ sla' hay joriyo tuwaŋga, ta naŋ ga' goyta, May na'a ti ta gutaŋga, na'a ti cata ta naŋ jun hiɗi na'a.

¹⁵ San may li kaynɗi, hiɗi dir yal ma hinina. Nam ma li kayni ka kepe. Kay mige? Kay nam ka gar jafna ma Lawn di'e nam min vula. Ligi ŋali hiɗi ciwta vigiya, san ma li bay-ɗigerta tam cata ta nam sla' hiɗi joriyo tuwamtaɗi.

¹⁶ Kay nan ka gaw tam sum sa digiɗ boyna visi goyna, Din mi Ma-Vatɗina, Lawna vi Israyel! Nan ka gaw hiɗi sa ma hob sligara valam hiɗi ɦawlata, Din mi Ma-Vatɗina vi vok-ma-duura! Ligi ŋali hiɗi ciwta vigiya, lakgi hay bay-ɗigertaɗi.

Mata vi Lawna kay ka kitata, sa ma di yoboyna

¹⁷ Nigi mak Ma-Vatɗina hiɗi law ma vungina, kay nigi di'e: Numa makam hiɗi mige? Kay nigi di'e: Sa ma li law ma joo'o nam kir Ma-Vatɗin ŋaa'a, sa ma ki kayn nala kir Ma-Vatɗin jifiya. Lo nigi di ala Lawn ma ka kitata ka ara damge?