LUKAS 8 - BIBALDA TA PELDETTA

Nisi sa tap kuɗ Yesu

¹ Bugol kayni, Yesu ka poy hay hoyok-ziy ŋulona ŋulona, hay hoyok-ziy gurayna kaw. Nam ka kus labara ma firina vi mulda vi Lawna.

² sa doogo yam ma'na ay hiɗi namu kaw, hiɗi boy sara'a sa muɗi goy ŋaa'a kay fuliyan joona, kay moyna kaw, Mariya ta nisi ya' ala Madelen, na'a ta nam digiɗ fuliyan ma joon siɗiya goy haya' pata.

³ Hiɗi Yohanda, cata vi Kusa sa ma ŋom slena vi Herod, hiɗi Suzana, hiɗi segen ŋolo sa ka gut kuɗsiya hiɗi slena visiya.

Law ma nir-niramna kay sa ma cuk jafna

⁴ Sumun ŋolo tok tuwsiya, sum sa hay hoyok-ziyn mara'a mara'a co talamu, nam ka law tisiya hay law ma nir-niramna ala:

⁵ Sa ma was-jafna kalay goyo kay was jafna valamu gaa'a. Hay li ma nam ka wasamu, jaf hena was goy gaŋ hagata, sumun tayam gaa'a kuɗ sesiya, layay ma dukalawna ma'a tumu may.

⁶ Hena wasay kay hiɗiyna, hay li ma nam dayawa, nam so goyo kay lomgo may gaa kuɗumɗi.

⁷ Hena nig jar zigiyna, zigiyna wul kulo hiɗi namu, muruɗum gaa'a.

⁸ Hena wasay hay nagata ŋaata, nam wul kulo'o, li jafi, yaw kis. Hay li ma nam di kayni dina, nam ka siwel ala: Sa ma humam ka'a kay huma, nam ma huma.

⁹ Sa hatayna valamu jobom caw law ma nir-niramna namna ala nam min ɗek mige?

¹⁰ Nam disiya: Vuli tigi nigiya kay wi caw ŋayayta vi mulda-Lawna: May tam segena, kayni diy tisiya hay law ma nir-niramna kay nisi ma ɗuwa, may wi goy ŋaaɗi, kay nisi ma huma, may humum cawam noŋɗi.

¹¹ Kayni mi caw law ma nir-niramna namna: Jaf ma wasay gaana kayni mi yoboyna vi Lawna.

¹² Nisi sa wasay gal hagata kayni si nisi sa hum yoboyna, may Matna ma'a yawam goyo hay diksiya kay nisi ma viɗi, fi suɗ goyɗi kaw.

¹³ Nisi sa wasay kay hiɗiyna kayni si nisi sa, hay li ma nisi hum yoboynawa, nisi vum hiɗi firita, may sutiyam may cuki haysiɗi. Nisi vi'e, lak hay vida neeɗa, may hay li ma wakka coowa, nisi hora, hin vida goyo.

¹⁴ Nam ma nig jar zigiyna kayni si nisi sa, hay li ma nisi hum yoboynawa, nisi kala, kay nisi muruɗiya kay varta, farayna hiɗi darta vi duniyata, nala nisi vuɗ jaf ma niyɗi may.

¹⁵ Nisi sa wasay hay nagata ŋaata kayni si nisi sa hum yoboyna, vum hiɗi dikga ŋaata, ta gasita kaw. Nisi vuɗ jafi hiɗi so-tuwta visiya.

Law ma nir-niramna kay fitilla

¹⁶ Hay li ma san do fitillawa, nam kuluɓum gaa'a kuɗ vaɗi, tunum gaa kuɗ gilikɗi kaw. May tunum kulo kay va ma tun fitilla, kay nisi sa cuk kalafi fi wi haraŋa.

¹⁷ Va ma yalam baray bar' ma ba bay ma goy haraŋɗi mayɗi, va ma ŋayay ŋay' ma as ma goyo hay falaytɗi mayɗi.

¹⁸ Ligi ŋali hiɗi humda ma nigi ka huma; kay sa ma falam kaana ma vulum mara'a talamu, may sa ma falamna mayɗina, va ma ka kalamna ma sliys goy kalamu.

Sum Yesu hiɗi ɓosiyomna

¹⁹ May sum Yesu hiɗi ɓosiyomna co'o, nisi fi kay co talamɗi kay sumuna.

²⁰ Sumun dumu: Suŋu hiɗi ɓosiyoŋŋa lak goy jiyni, nisi min ɗuwaŋu.

²¹ May nam hot dit tisi ala: Sunu hiɗi ɓosiyonna kayni si nisi sa hum yoboyna vi Lawna, li kuɗumu kaw.

Yesu ci vun birin gaa'a

²² Fat tara kepe, Yesu jik hay lumda hiɗi sa hatayna valamu. Nam disiya: Nay tuɗay kulo gal hena vi niy-lumna. Nisi kaliya may.

²³ Hay li ma nisi ka gi lumda, Yesu bur sene, birin ŋolo ma'a, tun caw biw kay niyna, lumda oy hiɗi niyna, nisi ka vun mitta.

²⁴ Nisi co talamu, zliyim kulo'o, ka dum ala: Bum-yalla, bum-yalla, nay ka mita. Nam fok kulo'o, bay simeɗna, billa tun gaa helmes'. Liyn tun kiliŋ'.

²⁵ Nam disiya: Vida vigi ka arige? Wulini narta hiɗi ɦuyumda visiya, nisi ka di jar-tuwsi ala: Sa namna kayni mi sa marige? Kay nam law tam simeɗna hiɗi niyna noŋo, may nisi gat kuɗumu!

Sa ma ful kalamna yeray goyo

²⁶ Nisi co hay nagata vi sa Geraseniyena, ta ka ɗiger vok Galileya,

²⁷ Hay li ma Yesu jik kulo deŋel jikŋa, nam ŋaf hiɗi sa mara'a ma hay hoyok-ziyn kepe, ma fuliya ma joona ŋolo ka kalamu, musi ŋolo nam may cuk sligara noŋɗi, mus hay ziyɗi kaw, may mus kayn hay zulla vi sa mitina ɦawa.

²⁸ Hay li ma nam wi Yesu, nam siwela, girif gaa'a vokomu, dum hiɗi delem kulo ŋolo ala: Naŋ min lum hiɗi nan mige, Yesu? Naŋ goora vi Lawna ma ŋolla, nan siɗawaŋu, lan lasɗi.

²⁹ Kay Yesu law tam ful namna ma liwisna, kay nam kal ay goy hayam pa, ful namna kal hayam kayni musi ŋolo. Nisi ŋomom ŋomiya, junum hiɗi jaɓna, gum pakalam selemu kaw, may sle ma nisi junum hiɗi namna nam wiledem goy wiled', ful ma joona digiɗim goyo hay fulda.

³⁰ Yesu jobomu: Semda vaŋ anige? Nam di'e: Legiyon, kay fuliya ma joona ka cuki hayam ŋolo.

³¹ Fuliyan ma joona siɗawamu kay nam ma hinsi cuk hay zul ma wiŋŋaɗi.

³² Ɗawni kulo'o hay hiɗiyta, bagumna fara-kla ay ti hatna, nisi siɗawamu kay nam ma hinsi cuk hay bagumna, nam hinsi li nala may.

³³ Wulini fuliyan ma joona cuki goyo hay sana pa, cuk kalaf hay bagumna, bagumna fara-kla patay jaŋ gaa dig boŋoloŋŋa, miti goloŋo hay niyna.

³⁴ Hay li ma sa ŋom bagumna wi va ma lina, nisi muni jaŋi, di labara namna goyo hay hoyok-ziyn ma ŋulona hiɗi ma gurayna pet.

³⁵ Sumuna kaliya kay ɗuw va ma liyna, nisi co tam Yesu kayni, sa ma fuliyan ma joona ay kalamna ka musi gaa tam Yesu dam', sligara cuki talamu, yalla valam hoti talam hot', tuwsi cuki nari.

³⁶ Nisi sa wi va ma lina visi labara kay butta-goyta vi sa ma fuliyan ay kalamna.

³⁷ Nisi sa ay hay hoyok-ziyna vi Geraseniyena tok tuwsiya, nisi siɗaw tam Yesu ala nam ma hin nagata visiya, kay narta ka lisi ŋolo. Yesu jik hay lumda, kaliya may.

³⁸ Sa ma fuliyan ma joona cukay goy hayam pana siɗaw Yesu kay nam hinim tap kuɗumu. May Yesu gum iramu di'e:

³⁹ Tuɗaŋ vutoŋ hay ziyna vaŋu, daŋ goyo kay sle ma ŋulona ma Lawna lum taŋu. Nam kaliya, mer labara goyo hay hoyok-ziyna pet, kay sle ma Lawn lum talamna.

Dayta-kulota vi goota vi Jayrus, yerta-goyta vi cat ta busay doogo yam ma' hiɗi moyna

⁴⁰ Hay li ma Yesu hotiyawa, sumun vum hiɗi firita, kay nisi ka cubumu.

⁴¹ Sa ma ŋolla vi sinagogayna kep yum Jayrus, nam co'o. Nam gi tuwam gaa vok sem Yesu, giɗelem delem ala nam ma kal vo hay ziyna valamu.

⁴² Kay goota valamu kalam kepe, busata va'a doogo yam ma', na' buri moyo, goboy vun mitta. May hay li ma Yesu min kal ta'a, sumun hebem ŋolo.

⁴³ May cat tara'a ka kep, moy ma kus busuwn goyna ka ta'a, liy busata doogo yam ma', sle ma ŋom ŋil tuwa'na pet na' bam goyo kuɗ doktora, sa ma as muɗa' goy ŋaa'a mayɗi.

⁴⁴ Na' co bugol Yesu, jo vun sligara valamu: wulini wulini busuw ma jaŋ goy ta'na vat de'.

⁴⁵ Yesu di'e: Sa ma jon tuwanu kayni mi gige? Sumun kaf tun caw puw vunsiya. May Peter di'e: Bum-Yalla, sumun ka ŋuyaŋu, hebaŋ kulo'o ŋolo kawtige!

⁴⁶ May Yesu di'e: Sa kep jonawa, nan wi ala donota kalay goyo hay tuwan pa.

⁴⁷ Hay li ma cata wi ala dira' patawa goyo, na' co hiɗi tuwa' va' bat-bat', gi tuwa' gaa vok gayamu, na' di goy vok sumun kaf kay va ma la' a jo Yesuna, nanige na' fi yerta-goyta wulini wulini kaw.

⁴⁸ Yesu da'a: Goota vanu, vida vag suɗagawa, tuɗag hiɗi sle'ta.

⁴⁹ Hay li ma nam ka law tuwa, sa mara'a may goy vi mul-sinagogŋa pa, ka dum ala: Goota vaŋ mitiya, mak tuw bum-yalla loɗi.

⁵⁰ May hay li Yesu hum kayni, nam di tam sa ma ŋolla vi sinagogŋa ala: Laŋ narɗi, may vaŋu tuta, kay na' ma suɗ goyo.

⁵¹ Hay li ma nam co vo hay ziyna, nam hin sa mara'a kal kal kalaf hiɗi namɗi, may kal kalaf hiɗi nam kayni mi Peter, Yohana hiɗi Yakub, bum goota hiɗi sum goota may tuta.

⁵² Sumun kaf ka tiya, yor tuwsiya kaw. May nam di'e: Tiygiɗi, kay na' bay mita, may na' kalay sene.

⁵³ Nisi cen kuɗum ŋolo, kay nisi wi ala na' miti vatiya.

⁵⁴ Nam va' ɓa'a siwela di'e: Goota, fokag kulo'o!

⁵⁵ Suka' hotay ta'a, na' fokay kulo'o gosoy wit', nam disi ala nisi ma vula' va ma tina.

⁵⁶ Sumiya' muɗ ɦuyum', nam disi ala nisi ma di va la lin kayni tam saɗi.