LUKAS 7 - BIBALDA TA PELDETTA

Sa ma sunda vi mul ma sojen kalam kisna

¹ Hay li ma Yesu vat ɓakŋa valam tam sum sa ka humumna kaf vatna, nam kal hay Kapernawum.

² Sa ma sojen kalam kisna ka kepe, sa ma sunda valam ma nam minim ŋolla li moyo, goboy hiɗi mitta.

³ Hay li ma nam hum labara kay Yesu, nam cuk sa maariyana vi sa Yudiyan sara talamu, siɗawamu ala nam ma muɗ sa ma sunda valam goy ŋaa'a.

⁴ Nisi ma tam Yesu siɗawam ŋolo ala: San kayni nagay kay naŋ li slen kayni talamu,

⁵ kay nam min jafna vaya, sinagogŋa vuma kaw inmatin mi namu.

⁶ Yesu tuɗ kuɗsiya. Wulini hay li ma nam co goboy hiɗi ziyna, mul ma sojen kalam kisna cuk sumun talamu ka dum ala: Bum-Sumuna, naŋ ma mak tuwaŋ ta-ta ki kayn naɗi, kay nan nagay kay naŋ kal vo hay ziyna vanɗi.

⁷ Kay na'ta nan var ala nan nagay a tuɗis taŋ kay tuwan noŋɗi. May daŋ ditay kep ɦawa, nala sa ma sunda van ma muɗ goy ŋaa'a.

⁸ Kay nan kaw mi sa ma ka gaa kuɗ gaŋeraŋa vi sa ma suwan nanu, may soje ka kuɗanu kaw. La nan di tam soje mara'a ala: Tuɗaŋu, nam as tuɗa; la nan di tam soje hen ala naŋaya, nam as ma'a may; la nan di tam sa ma sunda van ala laŋ van kayni, nam as lumu may.

⁹ Hay li ma Yesu hum yoboyn kayni, nam muɗ ɦuyum' kay mul ma sojen kalam kisna, nam muɗ iram kir sum sa kuɗumna ka disi ala: Nan digiya, jar Israyel noŋ kaw nan bay wi vida ta ki kayn nala tuwa.

¹⁰ Hay li ma sa cuki sunna hotay vo'o, sa ma sunda ma ay moyna nisi fum muɗi goy ŋaa'a.

Dayta-kulota vi goora vi cata duhulta hay Nayin

¹¹ Hay buurta ka'ta nam kal hay hoyok-ziyn kepe yum Nayin, sa hatayna valamu hiɗi sumun ŋolo ka tuɗ kuɗumu.

¹² Hay li ma nam co goboy hiɗi vun-galana vi hoyok-ziyna, nam wi sumun ka ziy sa ma mitin goyo, mi goor ma kay sulum kepna, sulumu ti cata duhulta, sum sa hay hoyok-ziyn ay ŋolo hiɗi na'a.

¹³ Hay li ma Bum-Sumuna wa'a, na' muɗ kiram haw ŋolo, nam da'a: tiyɗi.

¹⁴ Nam ma goboyo, jo kes ma nisi burum hayamna, nisi sa ka ziyimna laka. Nam di'e: Goor-joriyona, nan daŋu, fokaŋ kulo'o.

¹⁵ Sa ma mitina fok kulo'o, tun caw lawa, Yesu vulum mi mi sulumu.

¹⁶ Nisi kaf muɗ nari, nisi subur Lawna di'e: Sa ma jobta-Lawna ma ŋolla fokawa kulo jaraya, Lawna maawa ɗuw sumuna valamu.

¹⁷ Labara valamu jok goy hay Yudiya pet, hiɗi naga ma ŋuyi gala'na pet kaw.

Jobta vi Yohana ma Baptisma tam Yesu

¹⁸ Sa hatayna vi Yohana dum kay slen kayni kaf.

¹⁹ Yohana yi sa hatayna valam sara ma', cuksi sunu kat Bum-Sumuna, kay jobom ala: Naŋu mi nam ma min ma'a lebo numa'a ma cub mara'a su?

²⁰ Hay li ma sa sunda maawa talamu, nisi dumu: Yohana ma Baptisma cukma'ay sunu kay jobaŋ ala: Naŋu mi nam ma min ma'a lebo numa'a ma cub mara'a su?

²¹ Hay leer namna Yesu yer sa moyna hiɗi sa ka ci lasta ŋolo goy ŋaa'a, sa dukina ŋolo kaw nam muɗsi wi'e.

²² Yesu hot ditiya disiya: Tuɗgiya, digi Yohana kay sle ma nigi wum hiɗi irgiya, humum hiɗi humgiya kaw, sa dukina muɗi wi'e, sa dirlayna muɗi tuɗa, sa kuturuna yerawa goyo, sa gidiŋŋa muɗi huma, sa mitina zliyiy kulo'o, labara ma firina kusi tam sa hawna.

²³ Sle'ta ka kay sa ma nan muɗ mi va ma dabam selemɗi.

²⁴ Hay li ma sa sunda vi Yohana kalawa, nam tun caw di tam sumuna kay Yohana ala: Nigi kal goy hay fulda kay ɗuw mige? Cerewna ma geɗ kuɗ simeɗna su?

²⁵ May nigi kalay goyo kay ɗuw mige? Kay ɗuw sa ma cuk sligara ma ŋaana su? Humgiya, nisi sa cuk sligara ma jifiy ŋolo, ti tin ma ŋaana kaw, nisi ka hay ziyna vi muliyana.

²⁶ May nigi kalay goyo kay ɗuw mige? Sa ma Jobta-Lawna su? Awa, nan digiya, nam ŋolo suw sa jobta-Lawna kaw.

²⁷ Nam kayni mi ma ɗot di kalam ala: Humaŋu nan gi sa ma sunda vanu vokaŋu, Kay kotaŋ hagata vaŋ goy vokaŋu.

²⁸ Nan digiya, jar nisi sa boyn vuɗsin kaf sa ma suw Yohana ma Baptisma mayɗi, may sa ma goora hay mulda-Lawna nam suwum namu.

²⁹ Sum sa humumna kaf hiɗi sa tar vun-lumuna kaw vi kuɗ ɗigerta vi Lawna, hay li ma nisi fi baptisma vi Yohana.

³⁰ May sa Farisena hiɗi sa wi vun-ma-gatna min fi baptisma kuɗumɗi, minda vi Lawn ta kisita nisi noya' goyo.

³¹ Jaf-sum nisin kayni nan ma ŋrasi hiɗi gige? Nisi ŋray hiɗi gige?

³² Nisi ŋray hiɗi gurosguray sa lak hay lumuna, siwel tam nuroysin ala: Numa buwgi difna, may nigi min pir tiɗiŋɗi, numa tiya yor tuwma'a kaw, may nigi min tiy hiɗi zimiynɗi.

³³ Kay hay li ma Yohana ma Baptisma ma'a, nam ti fuɗi, ci vinɗi kaw, may nigi ala fuliyan ka kalamu.

³⁴ Wulini goora vi sana maawa, nam ti'e ci'e kaw, nigi di ala: Ɗuwgi sa ma haramna ma ci vinna, ɓosiyomna si sa tar vun-lumuna hiɗi sa sulukŋa.

³⁵ May yalda muɗawa goy ɗigere kuɗ gurona valam kafe.

Cata ta sulukŋa fi gidawa

³⁶ San kep jar sum sa Farisena siɗaw Yesu kay nam ma ti fun hiɗi namu. Nam kal vo vi sa ma Farisena, musi gaa'a kay ti'e.

³⁷ Cata ta suluku ay hay hoyok-ziy namna kepe, na' wi ala Yesu ka ti'e vo hay ziyna vi sa ma Farisena, na' mar doŋdoloŋ kep hobay hiɗi mula,

³⁸ Na' col goy bugolomu tiya, na' muzum selem hiɗi zimiyna va'a, ɦasam goy hiɗi ɗuŋusa'a, ŋaf vuna' gaa tam selemu, yam urdin goy kay selemu.

³⁹ Hay li ma sa ma Farisen ma yumay vo valamna wi slen kayni, nam ka di tuwam ala: San damni la nam mi sa ma jobta-Lawna ni, nam ma wi cata jomta zawni, kay na' ti cat ta suluku.

⁴⁰ Yesu sli ditiya dumu: Simon, nan min daŋ va kep, Simon ala: Bum-yalla, daŋaya.

⁴¹ Sa ma ni bal goyna ka kep, sum sa balla valam kisina ka ma'. Ma kepna balla kalam ir denariyus kis-vasl, hena denariyus kalam dok-vasl.

⁴² Kay va ma nisi wurak balla hiɗi namna mayɗi, nam hinsi ma' pet. Nala ma nam minim kuɗsi ŋol suwna mi marige?

⁴³ Simon hot dita dumu: Nan var ala mi ma nam hinim balla suwna. Yesu dumu: Naŋ di hay liyamu.

⁴⁴ Nam muɗ iram tam cata, di tam Simon: Naŋ ka sar cat zawni su? Nan ma vo vaŋu may naŋ vulan niyna kay muz senɗi, may na' muzan sen hiɗi zimiyna va'a, ɦasam goy hiɗi ɗuŋusa'a.

⁴⁵ Naŋ vulan ŋaf-vunda noŋɗi, may na'a, hay li ma na' ma kalafi, na' ŋaf vuna' tam senu ta-ta.

⁴⁶ Naŋ min ɦok mul kanɗi, may na' yam urdin kay senu.

⁴⁷ Kay na'ta nan daŋu, sulukŋa va' ma ŋolla na' fi gidawa kalamu, kay na' li minda ŋolo. May sa ma vulum gida kay sulukŋa valam ir kiɗaya, min kiɗaya kaw.

⁴⁸ Nam da'a: sulukŋa vagu cukawa goyo.

⁴⁹ Nisi sa lakay ti hiɗi namu ka job tuwsi ala: Nam kayni mi gige ma as vul gida kay sulukŋa noŋo?

⁵⁰ Nam di tam cata: Vida vagu suɗagawa, tuɗag hay sle'ta.