LUKAS 3 - BIBALDA TA PELDETTA

Kusta vi Yohana ma baptisma

¹ Hay busata doogo yam vaslta vi Cesar Tiberiyus hay mulda, hay li ma Pontiyus Pilatus ay guverner hay Yudiya, Herod ay mul hay Galileya, ɓasulumna Filip ay mulla hay Itureya, hiɗi nagata vi sa Trakonitna, Lisaniyus ay mulla hay Abilene,

² Anas hiɗi Kayfas ay si muliyan ŋulo sa-ɗifinna, hay na'ta Bum-Sumuna di yoboyna valam tam Yohana goora vi Zakariya goy hay fulda.

³ Nam poy hay nagat vi Yordan kaf, nam kus yoboyna kay baptisma vi hamda, kay gida vi sulukŋa.

⁴ Ki ɗo'ay hay ɗerwelda vi sa ma jobta Esaya nala ala: Kayni mi del sana ma siwel hay fulda, par hagata vi Bum-Sumuna goyo, tor hagata valam ta gurayt goyo.

⁵ Liyn ma beɗna kaf ma tos kulo'o, hiɗiyna hiɗi liy ma boŋoloŋŋa kaf ma ŋra gaa'a, sle ma gunina ma ɗob goy ɗiger, Haga ma korkocona ma par goy kaw.

⁶ Sumun kaf ma wi su'da vi Lawna.

⁷ Sum sa co kuɗ tuwsi ŋolo kay nam lisi baptisma'a, nam di tisi ala: Nigi jafna vi guyna, sa ma hatgi kay pir kay ɦiyda ta min ma'at ɗawni mi gige?

⁸ Kay na'ta ligi lopna ma ŋray hiɗi hamda, vargi hay dikgi ala buma'a mi Abraham vargi naɗi, kay nan fi digi ala Lawna as kay yaw kuɗ goorhoyon lakŋi, kay muɗum goy guro'o mi Abraham.

⁹ Wulini ceɗna ka buri gaa zok guwayna, gu ma vuɗ vuɗna ma ŋaaɗina ma kaamis goyo, gumis hay kuta kaw.

¹⁰ Sumun jobom ala: Nala numa ma li linige?

¹¹ Nam hotsi dita: Sa ma sligar-tuwn ka kalam ma'na, nam ma ɓurawam goy tam sa ma falam mayɗina, sa ma tina valam ka'a, nam ma li nala kaw.

¹² Sum sa tar vun-lumuna kaw ma'a kay fi baptisma, nisi dumu: Bum-yalla, numa'a ma li linige

¹³ Nam disiya: Nigi ma yaw slen goy suw ma digi kalamnaɗi.

¹⁴ Sojen kaw jobom ala: Numa hayɗin ma li linige? Nam disiya: Nigi ma yaw slen kay sumun hiɗi donoɗi, yawam hiɗi ɗutɗi kaw, pigi law kay sa hiɗi ŋireɗi, may gargit mi wurakŋa vigiya.

¹⁵ Kay sumun ka hay cubta ni, nisi kaf job tuwsi kalaf hay diksi ala Yohana mi Kristu su.

¹⁶ Yohana ka hot dit tisi ala: Nan ligi baptisma kayn hiɗi niyna, may nam ka co'o, nam ma dono suwan nanu, nan nagay kay but zigew ma vun tuguruna valamna goyɗi, nam ma ligi baptisma hiɗi Ŋusta-Peldetta hiɗi kuta.

¹⁷ Dutta-siira valamu ka hay ɓalamu, bugolda nam ma tor muɗakŋa valam goyo, nam ma tok alkamarena hay feera valamu, may hosona nam ma ŋalam goyo hay kuta ta tewɗita.

¹⁸ Yohana kus labara ma firina tam sumuna hiɗi gatta tara'a tara'a ŋolo.

¹⁹ May Yohana di mulla Herod kiramu kuɗ Herodiya cata vi ɓasulumna, hiɗi lop ma joon kaf ma Herod ka lumna,

²⁰ hiɗi sle mara'a mara'a tapay kaf, nala nam gi Yohana hay daŋgayna.

Baptisma vi Yesu Kristu

²¹ Hay li ma sumun kaf ka co kay fi baptisma, Yesu kaw fi baptisma, hay li ma nam ka siɗawa, wuralawna mal goyo,

²² Ŋusta-Peldetta sir ay gaa kalamu, tuwa' muɗ ki gukka nala, del may goy wuralawni pa ka di ala: Naŋu mi goora vanu ma hayan kaŋŋa, naŋ kiran ŋaa ŋolo.

Sem sumay Yesu Kristu

²³ Hay li ma Yesu fok hiɗi lopna valamu, busata valam asay ir ki dok-ɦidi nala. Ki nisi ka var kalam nala, namu mi goora vi Yosef, goora vi Heli,

²⁴ goora vi Matat, goora vi Levi, goora vi Melki, goora vi Yanay, goora vi Yosef,

²⁵ goora vi Matatiyas, goora vi Amos, goora vi Nahum, goora vi Eseli, goora vi Nagay,

²⁶ goora vi Maat, goora vi Matatiyas, goora vi Semeyin, goora vi Yosek, goora vi Yoda,

²⁷ goora vi Yohanan, goora vi Resa, goora vi Zorobabel, goora vi Seyaltiyel, goora vi Neri,

²⁸ goora vi Melki, goora vi Addi, goora vi Kosam, goora vi Elmadad, goora vi Er,

²⁹ goora vi Yesu, goora vi Eliezer, goora vi Yorim, goora vi Matat, goora vi Levi,

³⁰ goora vi Simeyon, goora vi Yuda, goora vi Yosef, goora vi Yonam, goora vi Eliyakim,

³¹ goora vi Meleya, goora vi Menna, goora vi Matata, goora vi Natan,

³² goora vi David, goora vi Isay, goora vi Obed, goora vi Bowaz, goora vi Salmon, goora vi Naason,

³³ goora vi Aminadab, goora vi Admin, goora vi Arni, goora vi Hesron, goora vi Peres, goora vi Yuda,

³⁴ goora vi Yakub, goora vi Isaak, goora vi Abraham, goora vi Terak, goora vi Nakor,

³⁵ goora vi Serug, goora vi Rehu, goora vi Peleg, goora vi Heber, goora vi Sila,

³⁶ goora vi Kaynam, goora vi Arpaksad, goora vi Sem, goora vi Nuwa, goora vi Lamek,

³⁷ goora vi Metusela, goora vi Enok, goora vi Yared, goora vi Malalayel, goora vi Kenan,

³⁸ goora vi Enos, goora vi Set, goora vi Adam, goora vi Lawna.