LUKAS 24 - BIBALDA TA PELDETTA

Dayta-kulota vi Yesu Kristu

¹ Hay buurta jewta vi lumuta, boyna kalay tam zulda hay graw culum culum, nisi mar aromatna ma nisi kotomay kisina;

² nisi fi kayni, hiɗiyn ka ligatay goy vun zulda.

³ Hay li ma nisi kal gaa hay zulla, nisi fi tuw Bum-Sumuna Yesuɗi.

⁴ Hay li ma varta visi viy goyo kuɗ lawta kayni, sumun ma' vul tuwsi kirsiya, cuki hiɗi sligar ma wilena.

⁵ Nisi muɗ nar ŋolo, her yisi gaa vi nagata; may sa sunda-wuralawna di tisiya: Nigi gar sa ma irina jar sum sa mitina kay mige?

⁶ Nam may tanɗi, may nam dayay kulo'o, humgi ma gigi kay slen ma nam di tigiya, hay li ma nam ay hay Galileya tuwa,

⁷ nam di tigi ala: Goora vi sana ma vulis goy hay ɓam sum sa sulukŋa, nisi ma ɓalam kat gu-ma-grakŋa, may hay buurta ɦidita nam ma day kulo'o.

⁸ Nala humsi gisi kay yoboyna vi Yesu.

⁹ Goy vun zulda pa nisi kaliya kay di slen kayni goy tam sa hatayna sa doogo yam kepna hiɗi segena.

¹⁰ Nisi kayni: Mariya Madelen, Yohanda, Mariya sum Yakub, segen tapay hiɗi nisiya, nisi di slen kayni mi sa Apostolayna;

¹¹ may dita vi boyna sa hatayna ɗuwa' ki dita ta waa'a nala, nisi min vi haysiɗi.

¹² May Peter fok kulo'o kal jaŋ tam zulda, nam her gaa'a, ɗuw gaa hay zulda kayni, sligar ma ɗut tuw Yesu hiɗi namna ka cuki gaa kay nagat ɦawa lak'; bugolda nam hot vo valamu, nam muɗi ɦuyum' kay sle ma lina.

Sa hatayna hay Emawus

¹³ Hay buur na'ta, sa hatayn ma' ka tuɗ kuɗ tuwsiya kay kal hay hoyok-ziy ma gooro yum Emawus. Hoyok-ziy namna jaram hiɗi Yerusalem ir kilometre doogo yam kep.

¹⁴ Nisi ka kus yoboyn jar-tuwsiya kay sle ma lin kaf kayni.

¹⁵ Hay li ma nisi ka kus yoboyn jar-tuwsiya, Yesu ma goboy tisiya, tuɗ hiɗi nisiya.

¹⁶ May irsi ay duki tuwa, nisi may wumɗi.

¹⁷ Nam disiya: Kasla ma nigi ka kaam jar-tuwgi hay hagata kayni mi kasla mige?

¹⁸ Nisi laka, varta visi ɓulakiya. Sa kep jarsiya semda valamu Klewpas ka dumu: Slen ma li hay Yerusalem hay buur ma goboy tan lakŋi naŋ bay humum su?

¹⁹ Nam disiya: Mi mige? Nisi hot dumu: Slen ma li kuɗ Yesu ma Nasaretna, nam sa ma jobta-Lawna ma dono'o hay lopna hay yoboyna vok ir Lawna, vok ir sumuna kaw,

²⁰ nanige muliyan ŋulo sa-ɗifinna vaya hiɗi sa ŋulona vaya ka kitata kay cum goyo, nisi ɓalam kat gu-ma-grakŋa kaw.

²¹ Numa varay ala but sum sa Israyel goy ɗawni mi namu, may hiɗi kayni kaf sle namna li'e buurta liy vaydi ɦidi.

²² May boy segen jarma'a, nisi muɗma ɦuyum' dono ŋolo; graw culum culum' nisi tuɗ vun zulda,

²³ hay li ma nisi fum tuwamɗi, nisi co di ala sunda-wuralawna vul tuwsi kirsiya, nisi di goy ala nam ka iriya.

²⁴ Sum segen jarma'a kalay vun zulda, nisi fi slen ki boyn di tisi nala, may namu irsi may cuk kalamɗi.

²⁵ Wulini Yesu disiya: Nigi sum sa wid may kulo kigiɗina, nigi sum sa dikgi liŋ-liŋi, min vi kuɗ slen ma sa jobta-Lawna dumna kafɗina,

²⁶ Kristu ma ci las ki kayn nala, jew a nam ma kal hay gajijita valamu ɗisu?

²⁷ Nam ɗeksi kay slen ma ɗot dum kalam kafna, tun caw tam Musus pa ta-ta tam sa jobta-Lawna.

²⁸ Nisi co goboy hiɗi hoyok-ziyna ma nisi min tuɗ hayna, nam li ki nam min raw vokomu nala.

²⁹ May nisi som dono'o, dum ala: Musaŋ hiɗi numa'a, kay liyn ka li henje'e, fatta ka ɗik gaa'a. Nam kal vo'o, kay mus hiɗi nisiya.

³⁰ Hay li ma nam mus gaa kay ti hiɗi nisiya, nam sli funa gi bolo, ɓurawamu vulsiya.

³¹ Hay na'ta irsi mal goyo, nisi wumu. Bugol kayni nam viy tuwam kirsiya may.

³² Nisi di jar-tuwsiya: Hay li ma nam ay hiɗi nay hay hagata, ɗekay caw yoboyna kaw, dikay ay ŋal ki kuta nala ɗisu?

³³ Nisi fok kulo'o hay na'ta de', hot hay Yerusalem, nisi fi sum sa doogo yam kepna hiɗi sum sa kuɗsin tokaya,

³⁴ nisi disiya: Bum-Sumuna dayawa kulo'o gasi. Nam vul tuwam kir Simon kaw.

³⁵ Nisi visi labara kay slen ma fisi hay hagata, nisi wumu hay li ma nam ɓuraw funa kaw.

Yesu vul tuwam kir sa doogo yam kepna

³⁶ Hay li ma nisi ka law slen ki kayn nala lakŋa, nam co jarsiya disiya: Toyta li hiɗi nigi lige!

³⁷ May nisiya, tuwsi muɗ nar ŋolo, nisi var ala fulla vul tuwamawa kirsiya,

³⁸ May nam disiya: Nigi li nari kay mige? Nigi var giriŋi hay dikgi kaw kay mige?

³⁹ Ɗuwgi ɓanu hiɗi sen tige, kayni mi nan gasiya. Tungi ɓigi tanu, ɗuwgi tige, fulla sliwam mayɗi, zokom mayɗi kaw, may sle namna ka tanu!

⁴⁰ Hay li ma nam di kayni dina, nam ɗeksi kay selemu hiɗi ɓalamu.

⁴¹ Hay firita visi ta ŋolda, nisi min vi kayni tuwaɗi, nisi muɗi ɦuyum', nam disiya: Va ma ti ka kigi su?

⁴² Nisi vulum caw kuluf ma cufina.

⁴³ Nam yawamu, tum vok irsiya.

⁴⁴ Bugolda nam di tisiya: Kayni mi sle ma nan dum tigiya hay li ma nan ays hiɗi nigi tuwa; la nanige kaw sle ma ɗoy kanu hay gatta vi Musus, hay ɗerwelda vi sa jobta-Lawna hiɗi ɗerwelda Nulla kaw vunam ma hob goyo.

⁴⁵ Nam mal varta visi goyo kay hum ɗota.

⁴⁶ Nam di tisiya: Ɗot di ala Kristu ma ci lasta, hay buurta ɦidita nam ma day kulo'o hay mitta pa.

⁴⁷ Yoboyn ma kusis goy tam jaf-sumun kaf hay semda valamu, kay hamda hiɗi gida vi sulukŋa, tun caw hay Yerusalem pa.

⁴⁸ Nigiya si sa wi sle namna hiɗi irgiya.

⁴⁹ Humgiya, va ma Bun deŋem tigina, nan ma gumay gaa'a kigiya, may nigiya, lakgi hoyok-ziyn lak', ta-ta nigi ma hob hiɗi donota ta may kulo pata tuwa.

Kalta kulota vi Yesu

⁵⁰ Nam kal hiɗi nisiya ta-ta co vok Betaniya, nam yaw ɓalam kulo'o gisi bolo.

⁵¹ Hay li ma nam gisi bol gina, nam ja jaram goy hiɗi nisiya, nam sliys kulo'o hay wuralawna.

⁵² Nisi girifimu, hotay Yerusalem hiɗi firita ŋolda;

⁵³ nisi lakay dok-dok hay Tempella, subur Lawna kaw.