LUKAS 23 - BIBALDA TA PELDETTA

Yesu col vok Pilatus hiɗi Herod

¹ Nisi kaf yaway kulo kuɗ tuwsiya, nisi kal Yesu vok Pilatus.

² Nisi tun caw pi lawt kalamu, nisi di'e: San zawni numa fum kayni nam ka zut sumuna vuma'a kay nisi ma fok lawta, nam ka tel ala vul taara mi Cesarɗi kaw, nam di goy kay tuwam ala namu mi Kristu mulla.

³ Pilatus jobomu: Naŋu mi mulla vi sa Yudiyana su? Nam hot dit talam ala: Naŋ di hay liyamu.

⁴ Pilatus di tam muliyan ŋulo sa-ɗifinna hiɗi sumun kaw ala: Nan fi va ma joo'o hay san kaynɗi.

⁵ May nisi so tuwsiya di'e: Nam fok sumun kulo'o, nam ka hata hay Yuda pete, tun caw hiɗi Galileya pa, ta-ta tani.

⁶ Hay li ma Pilatus hum kayni, Nam job ala san kayni mi ma Galileyan su?

⁷ Hay li ma Pilatus hum ala Yesu ka gaa kuɗ gaŋeraŋa vi Herod, nam gum iram tam Herod. Hay buur namna Herod ka hay hoyok-ziyn Yerusalem kaw.

⁸ Hay li ma Herod wi Yesu, hayam li firi ŋolo; kay musi ŋolo nam gar a wi Yesu, kay nam humi labara kalamu, nam var ala Yesu ma li ɗek tara kiram klasige.

⁹ Nam job Yesu sem ŋolo, may Yesu min hotom ditɗi.

¹⁰ Muliyan ŋulo sa-ɗifinna hiɗi sa wi-ɗota ka lakay lak, nisi gar a pi lawt kalam ŋolo.

¹¹ Herod hiɗi sa sojena valamu li Yesu goy bis ŋolo, nisi ŋulumu, cuk sligar ma haɓn talamu, hotom tam Pilatus.

¹² Hay fat na'ta Herod hiɗi Pilatus vi bono mi tuwsiya, jew kayni gawt ka jarsiya.

¹³ Pilatus yi muliyan ŋulo sa-ɗifinna hiɗi sa ŋulona vi sumuna, nam disiya:

¹⁴ San kayni nigi maram tanu ala nam ka fok sumun kulo'o. Wulin kayni, nan jobom vok irgiya, may law ma nigi ka tunum kalamna nan may fi mara talam ne' noŋɗi.

¹⁵ Herod fi va noŋɗi kaw, kay nam gum iramay katma'a, kuɗ kayni, humgiya, san kayni may li va ma nagay kay mitta noŋɗi.

¹⁶ Kay na'ta nan min watamu, bugolda nan min gumu.

¹⁷ Hay buur ma yuldet kaf nam gisi sa goy kep kepe.

¹⁸ Nisi ka siwel kuɗ tuwsi kaf ala: San kayni cum goyo, may guma Barabas goyo.

¹⁹ Nisi gi Barabas hay daŋgayn kayni kuɗ ɦalayta ta fok kulo hay hoyok-ziyna, sa kep fi mitta hay na'ta.

²⁰ Pilatus ka jobsi mara lo, kay nam ka hiɗi varta kay gi Yesu.

²¹ May nisi siwela: Ɓalam kat grakŋa, ɓalam kat grakŋa.

²² Pilatus di tisiya hay sem ma ɦidina lo: May nam lum joon mi mige? Nan fi va ma nagay kay mitta hayam noŋɗi. Nan min watamu, bugol kayni nan min gumu.

²³ May nisi siwel hiɗi winekŋa ŋolo, nisi joba kay ɓalam kat gu-ma-grakŋa. Siwelda visi kola.

²⁴ Pilatus col lawt ala van ma li ki nisi job nala.

²⁵ Nam ma giy daŋgaya kuɗ ɦalayta-kulota hiɗi mat ma cina, ma sumun ka job kalamna, Pilatus gisit goyo; may nam vul Yesu goy tam ci-goyta kuɗ minda visiya.

Yesu ɓalay tam gu-ma-grakŋa

²⁶ Hay li ma nisi ka nar Yesu goyo, sa kep yum Simon ma Sirene, nam may goy sine pa, nisi tun gu-ma-grakŋa kalamu kay nam ma ziyim kuɗ Yesu.

²⁷ Sumun ŋol ɦini-ɦini, hiɗi boyna kaw tap kuɗ Yesu; boyna ka ci ɓisi war-digsiya, ka tiy tuwsi kay Yesu kaw.

²⁸ Yesu muɗ iram kirsiya nam disiya: Guro-boyna vi Yerusalem, tiygi kanɗi, may tiygi kay tuwgi nigiya hiɗi gurona vigiya.

²⁹ Kay humgiya, buura ka ma'a, hay buur namna sumun ma di ala: Sle'ta ka kay boy sa getayna, sle'ta ka kay boy sa vuɗ guroɗina, sa guron ci miir digsiɗina.

³⁰ Hay na'ta nisi ma tun caw di tam hiɗiyn ala: Nigaŋ gaa kuma nig ge! Tam boŋoloŋŋa kaw nisi ma di ala: ɦoŋ gaa kuma ɦoge!

³¹ Kay la nisi li nala hiɗi gu ma irina, gu ma soyna ma li ɗawn linige?

³² Nisi tuɗ sum sa jiw-zlata goyo ma' kaw, kay tuɗ cisi goy kuɗ tuwsi hiɗi Yesu.

³³ Hay li ma nisi co hay liy ma yum ala zok-ta'ara, nisi ɓalam hay liy namna, nisi ɓal sum sa jiw-zlata ma' goy galamu kaw, kep hay galam ma jufna, kep hay galam ma gulla may.

³⁴ Yesu di'e: Bunu, vulsi gida ta', kay nisi wi va ma nisi liɗi. Nisi ɓuraw sligara valam jarsiya, ŋaɓam kuɗ ɦayta.

³⁵ Sumun ka lakay siriŋ' kay ɗuwa. Sa ŋulona visi ka burah Yesu ala: Segena nam suɗsiya ni, wulini nam suɗ tuwam kay tuwam yo tige, la nam mi Kristu goora vi Lawna!

³⁶ Sojena kaw burahamu, nisi tuɗ talamu, vulum vinegrena,

³⁷ nisi di'e: La naŋ mi mulla vi Yudiyana ni, suɗaŋ tuwaŋ yoge!

³⁸ Ɗot ka ɗoy kulo kalam ala: KAYNI MI MULLA VI SA YUDIYANA.

³⁹ Sa kep jar sa jiw-zlata sa ka ɓalay kulo kat gu-ma-grakŋa hiɗi namu burahamu di'e: Naŋu mi Kristu ɗisu? Suɗaŋ tuwaŋ naŋu, suɗma numa kaw ɗisu?

⁴⁰ May hena lawam ɦiya, dum ala: Naŋ may li nar kuɗ Lawn noŋɗi su? Naŋu ma kita na'ta kaay kaŋ kaw!

⁴¹ Naya kitat kaay kaya hay liya'a, kay nay fum kayni mi wurakŋa vi lopna vaya, may san waŋŋi may li va ma joo noŋɗi.

⁴² Nam di'e: Yesu, varaŋ kan varge hay li ma naŋ coowa hay mulda vaŋu.

⁴³ Yesu dumu: Nan daŋ gasita, vaydi naŋ ma mus hiɗi nanu hay Paradis.

⁴⁴ Hay li ma liyn co ki hay leer ma karkiyan nala kayni, jufunda li gaa kay nagata kaf ta-ta hay leer ma zleeŋena,

⁴⁵ kay fatta muɗi jufunu, kojolay ma hay Tempella iram haw gaa ma'.

⁴⁶ Yesu siwel hiɗi delem kulo'o di'e: Bunu, nan hin Ŋusta vanawa hay ɓaŋu. Hay li ma nam di kayni dina, sukam sa'ata.

⁴⁷ Hay li ma mul ma soje kalam kisna wi sle ma lina, nam subur Lawna di'e: Gasiya, san kayni mi sa ma ɗigera.

⁴⁸ Sumun kaf sa co kay ɗuw sle namna, hay li ma nisi wi slen kaf ma lina, nisi hotay goy ŋorsiya, bow ɓisi war-digsi kap-kap' kaw.

⁴⁹ May sa sugolay Yesuna, hiɗi boy sa ay tapay kuɗumu hay Galileya pana lakay goy gine'e kay ɗuw va ma lina.

Pita vi Yesu

⁵⁰ Sa mara kep jar sa ɗiger-lawta, semda valamu Yosef, nam sa ma ŋaa'a ma ɗigere kaw,

⁵¹ ŋra-vunda hiɗi lop ma segen lum tam yesu kafna nam min kal tuwam hayɗi, namu mi sa ma hay Arimate, hoyok-ziyna vi sa Yudiyana, nam ka cub mulda vi Lawna.

⁵² Nam kalay tam Pilatus jobom kay tuw Yesu.

⁵³ Nam slum tuwamay gaa kay gu-ma-grakŋa pa, ɗutum hay sligar ma haɓna, burum hay zulda ta jugoɗay gaa hay hiɗiyna, ta nisi bay bur sa haya' tuwa noŋo.

⁵⁴ Kayni mi buura vi kotta, sabatna ka tun cawi.

⁵⁵ Boyna sa may kuɗ Yesu Galileya pana tap kuɗ Yosef, nisi wi zulda hiɗi bur ma nisi bur tuw Yesuna,

⁵⁶ nala nisi hotaya kay kot aromatna hiɗi urdina. Bugolda hay buura vi sabatna nisi tun suku, kuɗ vun-ma-gatna.