LUKAS 20 - BIBALDA TA PELDETTA

Gaŋeraŋa vi Yesu may arige pa?

¹ Hay fat tara kep, Yesu ka hat sumuna hay Tempella, nam ka kus labara ma firin zaw kayni, muliyan-sa-ɗifinna, sa wi-ɗota hiɗi sa maariyan co talamu,

² nisi dumu: Naŋ li sle namna kayni hiɗi donota vi gige? Lebo sa ma vulaŋ gaŋeraŋ namna kayni mi gige?

³ Nam hotsi dita: Nan kaw min jobgi va kepe.

⁴ Nigi dan tige, baptisma vi Yohana may vi wuralawn pa lebo vi sumun pa su?

⁵ Nisi var jar-tuwsiya di'e: La nay hot dit ala nam may vi wuralawn pa, nam ma di ɗawn ala nigi vi kuɗumɗi kay mige?

⁶ La nay di ala nam may vi sumun pa, sumun kaf ma gay hiɗi goorhoyona, kay nisi viy gasi ala Yohana mi sa ma jobta-Lawna.

⁷ Nisi hotom dit ala: Liyn ma nam may hay pana numa wumɗi.

⁸ Yesu hotsi disiya: Nala nan kaw, liyn ma donot ta nan li lop hiɗi na'a may hay pana nan wiɗi may.

Law ma nir-niramna kay gulda-guldana

⁹ Law ma nir-niramna kayni nam dum tam sumuna: San kep pi gulda-guldan gaa sine'e. Nam deŋem goy mi sa zumna, kal hay liy mara'a kay musay ɗawn ŋolo.

¹⁰ Hay li ma liyn coowa, nam gi sa ma sunda kat sa zumna, kay nisi ma vulum vuɗna vi gulda-guldana. Sum sa ŋom sinen watamu, gum iram hiɗi ɓalam ɦawa kiɗaŋ-kiɗaŋ'.

¹¹ Nam gi sa ma sunda mara'a lo; nisi watamu, ŋulumu, gum iram hiɗi ɓalam ɦawa kiɗaŋ-kiɗaŋ' kaw.

¹² Nam gi sa ma ɦidin lo, may nisi kaam tuwam goy mili, gum iramu.

¹³ Bum-sine gulda-guldan di'e: Wulini nan li ɗawn linige? Nan min gi goora vanu ma hayan kalamna, la li ŋalɗi, nisi ma slum yalam kulo klasige?

¹⁴ May hay li ma sum sa ŋom sinen irsi wumu, nisi di vun tuwsi ala: Zawni mi ma yaw vocotna, nay ma cum goyo, kay vocota ma muɗ vaya.

¹⁵ Nisi gum goy vun sine gulda-guldana, cum goyo. Wulini bum-sinena ma lum tisi ɗawni mi mige?

¹⁶ Nam ma ma'a, ci sa ŋom sinen goyo, sine gulda-guldana nam ma vulum goy mi sum sara'a. Hay li ma nisi hum kayni, nisi di'e: Kayni as a li noŋɗi.

¹⁷ May Yesu cuk iram kisiya, nam di'e: ɗota kayni cawa' min di anige? Hiɗiyna ma sum sa in ziyna gum goyna, nam muɗi mi hiɗiy ma ŋolla, hiɗiyna vi gef-ziyna.

¹⁸ Sa ma nig gaa kay hiɗiy namna ma mun goyo, sa ma hiɗiy namna nig gaa kalamna ma jiwesl goyo.

¹⁹ Muliyan ŋulo sa-ɗifinna hiɗi sa wi-ɗota gar a vum hay liyn namna de', may nisi ka li nari kay sumuna. Nisi wiy ala Yesu di law ma nir-niramna kayni tisi nisiya.

Taara ma vulum mi Cesarna

²⁰ Nisi tun caw ŋom Yesu; nisi cuk sa yaw dita vi sumun kuɗumu, nisi ka li tuwsi ki sum sa ŋaa hiɗi nam nala, may nisi ka kuɗum kayni kay vum hiɗi dita vi vunamu, kay vulum goy tam sa ka kitana hiɗi sa ŋulona vi Guvernera.

²¹ Nisi jobomu: Bum-yalla, numa wi ala naŋ di yoboyn hay liyamu, hat hay liyam kaw, naŋ may ka ir saɗi lay, naŋ hat hagata vi Lawn hiɗi gasita.

²² Wulin kayni hagat ka kuma'a kay vul taara mi Cesar lebo vulɗi su?

²³ Hay li ma Yesu wi mileta visiya, nam disiya: Nigi vulan denariyus ay kepe.

²⁴ Haya' damni mi yam gige hiɗi ɗota vi gige? Nisi dumu: Vi Cesar.

²⁵ Nam disiya: Nala vul mi Cesar slena vi Cesar, mi Lawna slena vi Lawna may.

²⁶ Nisi may as kay vum hiɗi yoboyn kep noŋɗi vok sumuna, may hay li ma nisi muɗ ɦuyum' kay hot-dita valamu, nisi zan lemdeh'.

Sa Sadusena hiɗi dayta-kulota

²⁷ Segen jar sa Sadusena sa di ala dayta-kulota tayɗina ma talamu, nisi ka jobom ala:

²⁸ Bum-yalla, kayni mi va ma Musus hatma'na: La san mitawa, nam hin catawa bay gooro, ɓasulumna ma mus ca na'ta kay vuɗ goor selemu.

²⁹ Wulini ɓosiyom-tuwsin ay siɗiya: Ma jewna sli cata, nam miti bay vuɗ gooro.

³⁰ Ma ma'na vi cat na'ta, ma ɦidina nala kaw;

³¹ Nisi joka' kuɗsi siɗiya kaf, may nisi mit kaf hin goor bugolsiɗi.

³² Bugolsi kaw cata mitiya.

³³ May hay dayta-kulot ɗawni na' ma mus ca kuɗ gige? Kay nisi siɗiya kaf joka'ay kuɗsi ca kafe!

³⁴ Yesu di'e: Yaw boyo, yaw jufaya kaw kayn si gurona vi nagat tani.

³⁵ May nisi sa nagawa kay co hay nagat ta vokka, nisi sa dayawa kulo'o hay mitta pana, nisi ma sli caɗi, sli jufɗi kaw.

³⁶ Nisi as mit noŋ loɗi kaw, kay nisi ma muɗ ŋray ca ki sa sunda-wuralawn nala, nisi ma muɗ si gurona vi Lawna, kay nisi ma muɗ si gurona vi dayta-kulota.

³⁷ A sa mitin day kulo kayni, Musus di kuɗ gu-ma-zigiyna, hay li ma nam yi Bum-Sumuna ala Lawna vi abraham, Lawna vi Isaak, Lawna vi Yakub kaw.

³⁸ Nam may mi Lawna vi sa mitinɗi, may Lawna vi sa irina; kay kalam namu sumun kaf ka iriya.

³⁹ Wulini segen jar sa wi-ɗota hot dita di'e: Bum-yalla, naŋ di ŋaa'a.

⁴⁰ Nisi li nari, min jobom va loɗi.

Kristu mi goora vi David su?

⁴¹ Yesu disiya: Sa fi di ala Kristu nam mi goora vi David kayni litige?

⁴² David kay tuwamu di hay ɗerwelda vi Nulla ala: Bum-Sumuna di tam Bum-Sumuna vanu, Musaŋ hay gal ɓan ta jufta,

⁴³ Ta-ta nan cuk sa gawt kaŋŋa gaa kuɗ wur-seŋu.

⁴⁴ La David yum ala Bum-Sumuna, Bum-Sumuna as li mi goora vi David kayn nanige?

Yesu law sa Farisena

⁴⁵ Hay li ma sumun kaf ka hum Yesu, nam di tam sa hatayna valam ala:

⁴⁶ Ligi ŋali hiɗi sa wi-ɗota, nisi sa diksi min kay poy hay sligar ma fiyokŋa, min gi-deɓta hay lumuna kaw, min mus ma vokŋa hay sinagogayna min mus ma vokŋa hay yuldena kaw.

⁴⁷ Nisi sa yaw slena vi boy sa duhulla, nisi siɗaw siɗawta fiyokka kay sumun ma wisiya. Nisiya ma fi kitat joo ŋolo.