LUKAS 19 - BIBALDA TA PELDETTA

Sakewus

¹ Yesu kal kulo'o hay hoyok-ziyna Yeriko, nam raw jaramu.

² Ɗuw na kayni, sa mara kepe yum Sakewus, nam mi sa ma ŋolla vi sa tar vun-lumuna, nam faray ŋolo kaw.

³ Nam gar a wi Yesu a nam ir nanige. May nam asɗi, kuɗ sumuna, kay nam wuli giɗeŋe.

⁴ Nam kal jaŋ voksiya, jik kulo hum gu-sikomora kay sar Yesu, kay Yesu min raw hay hagat na'ta.

⁵ Hay li ma Yesu co hay liy namna, nam ɗuw kulo'o, dumu: Sakewus, jikaŋay gaa koloyo, kay nan min busa vo hay ziyna vaŋ vaydi.

⁶ Sakewus jikay gaa gosoyo, nam vi Yesu hiɗi firita.

⁷ Hay li ma sumun wi kayni, nisi kaf ŋurnaya di'e: Nam kalay mus vo hay ziyna vi sa ma sulukŋa.

⁸ May Sakewus col vok Bum-Sumuna, nam dumu: Humaŋu Bum-Sumuna, gal farayna vanu nan vulum mi sa hawna, la nan yaw gurjut kay sa hiɗi dono'o, nan hot wurakamti sem fiɗi suwa.

⁹ Yesu dumu: Vaydi su'da maawa kay ziyna tani, kay san zawni kaw mi goora vi Abraham.

¹⁰ Kay goora vi sana maawa kay suɗ ma ay bay-goyna.

Law ma nir-niramna kay minna

¹¹ Hay li ma nisi hum kayni, nam di law ma nir-niramna mara'a lo, kay nisi ka goboy hiɗi Yerusalem. Nisi var ala mulda-Lawna ma ɗawn wulin de'.

¹² Nam di'e: Sa kep hay jafna vi mulda, nam kal haya nagata gineta kay fi mulda, bugolda nam ma hotaya.

¹³ Nam yi sa sunda valamu doogo, vulsi minna doogo kaw, di tisi ala: Dokgit yalamu, ta-ta hay li ma nan ma hotay tuwa.

¹⁴ May sum sa hay nagata valamu ka gaw talamu. Nisi cuk sumun talamu kay dum ala: Numa may min ala san kayni ma ti mul kuma'aɗi.

¹⁵ Hay li ma nam hotiyawa, bugol nam fi muldayawa, sa sunda sa nam vulsi gurjuta nam yisi ay talamu, kay nam min wi ala gige gige jarsiya doka' ya' gaage.

¹⁶ Ma jewna ma'a di'e: Sam-ŋolla, minna vaŋu nan dokom yalamu, nan fi min na doogo lo.

¹⁷ Nam dumu: Ŋaa'a, naŋ sa ma sunda ma ɗigera, kay naŋ li ɗigerta tam slen kiɗaya, may nan min tunaŋ guverner kay nagat doogo.

¹⁸ Ma ma'na kaw co'o di'e: Sam-ŋolla, minna vaŋu nan dokom yalamu, nan fi min mara talam vasl lo.

¹⁹ Nam dumu: Naŋ kaw nan tunaŋawa kay hoyok-ziyn vasl.

²⁰ Mara'a ma'a di'e: Sam-ŋolla, minna vaŋ kayni, nan ŋomom juni hay vun-sligar jun,

²¹ kay nan li nar kaŋu, kay naŋu mi sa ma ɦiya, Naŋ yaw sle ma naŋ lakamis gaaɗina, naŋ feɗ sle ma naŋ cukum gaaɗina kaw.

²² Nam dumu: Nan min ka kitat kaŋu kuɗ vunaŋu, naŋ sa ma sunda ma joona; naŋ wi ala nan mi sa ma ɦiya; naŋ wi ala nan yaw sle ma nan lakam gaaɗina, nan feɗ sle ma nan cukum gaaɗina kaw;

²³ Kay na'ta naŋ vul gurjuta vanu mi sa ni gurjutnaɗi kay mige? Kay hay li ma nan hotiyawa, nan ma fi gurjuta vanu hiɗi niya' kuɗa'a.

²⁴ Nam di tam nisi sa ay tokay hay liy namna ala: Sligi minna ma hay ɓalamna goyo, vulum mi nam ma fi minna doogona.

²⁵ Nisi dumu: sam-ŋolla, minna ka kalam doogo.

²⁶ Nan digiya, sa ma falam ka'ana, talamu ma vulumis lo, may sa ma falam mayɗina, va ma ka kalamna ma sliys goyo.

²⁷ May, nisi sa gaw kanu, sa min ala nan ti mulda kisiɗina, nigi marsi tani, ŋatsi goy vok iranu.

²⁸ Hay li ma Yesu di slen kayni dina, nam tun voksiya, ka tuɗ hay Yerusalem.

HAY YERUSALEM, MITTA HIƊI DAYTA-KULOTA VI YESU Yesu kal kulo hay Yerusalem

²⁹ Hay li ma nam co goboy hiɗi Betfage hiɗi Betaniya, gal hiɗiyta ya' Olive, nam cuk sa hatayna valam sara ma' goy sunu,

³⁰ disiya: Tuɗgis hay hoyok-ziyn ma vokgi ɗiger, hay li ma nigi cukawa kulo hayamu, nigi ma fi kuro joriyon juni zaw, kuro joriyo namna sa bay ɓe kalam tuwa, nigi ma butum goyo, maram tani.

³¹ La sa jobgiyawa ala nigi butum goy kay mige ni, nigi ma dum ala Bum-Sumuna min li va hiɗi namu.

³² Nisi sa nam cuksi sunna kaliya, nisi fi slen ki nam disi nala.

³³ Hay li ma nisi but kuro ma joriyona, sumiyamna disiya: Nigi but kuro joriyon kay mige?

³⁴ Nisi di'e: Bum-Sumun min li va hiɗi namu.

³⁵ Nisi maram tam Yesu. Nisi bar sligara visi kay kuro ma joriyona, mus Yesu kulo kalamu.

³⁶ Hay li ma nam ka raw vokomu, sumuna bar sligara visi goy hay hagata.

³⁷ Hay li ma nisi co hay Yerusalem, hay liy ma beɗna vi hiɗiyt Olive, vokŋa vi sa hatayna tun caw li firiya, nisi tun caw subur Lawna hiɗi delsi kulo ŋolo kay lop ma ŋulona ma nam lumna.

³⁸ Nisi di'e: Bolda ka kay mulla, Nam ma min ma'a hay semda vi Bum-Sumuna, Toyta hay wuralawna, Gajijita hay liy ma Kulo-Jamna.

³⁹ Sa Farisen sara'a jar tokŋa dumu: Bum-yalla, gataŋ sa hatayna vaŋu.

⁴⁰ May nam hotsi dita: La nisi ziŋa kaw, hiɗiyna ma siwela.

⁴¹ Hay li ma Yesu co kulo goboy tam hoyok-ziyna, iram wi hoyok-ziyn na kayni, nam tun caw tiy kalamu.

⁴² Nam di'e: Yayya Yerusalem! Lali nak kaw wi va ma vulag sle'ta hay buur ma vaydina ɗisu? May wulini nam ŋayay kiragu.

⁴³ May buur ka co kagu, mi buur ma sa gaw kagŋa ma gi zlaɓ tagu, nisi ma ŋuyagu, ma hebag hay galak kafe;

⁴⁴ nisi ma tok gaa'a, hiɗi gurona vag sa hayagŋa kafe, nisi ma hin hiɗiy mara kulo kay niramɗi, kay nak min wi buur ma Lawna co ɗuwagŋaɗi.

Yesu digiɗ sa li filiwn goy hay Tempella

⁴⁵ Nam kal hay Tempella, sa gus slen goyna nam tun caw digiɗsi goyo.

⁴⁶ Nam disiya: Ɗot di ala, ziyda vanu ma li ti ziy ta siɗawna, may nigi muɗa'awa goy zulla vi sa coŋcoloŋŋa kayn litige?

⁴⁷ Dok-dok nam ka hat hay Tempella, may muliyan-sa-ɗifinna hiɗi sa wi-ɗota hiɗi sa ŋulona vi sumuna gar a cum goyo.

⁴⁸ May nisi fi hagatɗi, kay sumun kaf ka jaɓay kuɗumu.