LUKAS 18 - BIBALDA TA PELDETTA

Law ma nir-niramna kay cata duhulta hiɗi sa ma ka kitana

¹ Yesu disi law ma nir-niramna kay nisi ma siɗaw dok-dok makɗi.

² Nam di'e: Sa ma ka kitata ay hay nagat tara'a, nam li nar kuɗ Lawnɗi, tuwam wirim kay saɗi kaw.

³ Cata-duhulta ay hay hoyok-ziy namna kep kaw, na' co'o dum ala, kan kitata van hiɗi sa ma lawt jarma'na kage!

⁴ May sem ŋolo nam minɗi. Bugolda nam di tuwamu: Nan may li nar kuɗ Lawnɗi, li zulo'o kay saɗi kaw.

⁵ Nir na'ta kepe cata duhulta kayni makan tuwanawa ŋolo, nan min ka kitata va'a, kay na' ma co makan dok-dok nala loɗi.

⁶ Bum-Sumuna hot di'e: Humgi va ma sa ma ka kitat joona dumna.

⁷ Nala kaw sa vilekay-goyna vi Lawna, sa siwel talamu hay falayta hiɗi henjeta dok-dokŋa, nam as gut kuɗsiɗi su? Lebo nam as vi yalam tisi su?

⁸ Nan digiya: Nam ma gut kuɗsi gosoyo. May hay li ma goora vi san ma ɗawni, nam ma fi vida gaa kay nagat su?

Sa ma Farisena hiɗi sa ma tar vun-lumuna

⁹ Nam di law ma nir-niramna kayni tam sara'a sa var kay tuwsi ala nisi si sa ɗigera may ɗuw segen birek-ceke.

¹⁰ Sumun ma' tuɗ kulo'o hay Tempella kay siɗawa. Sa ma kepna mi sa ma Farisena, hena mi sa ma tar vun-lumuna may.

¹¹ Sa ma Farisena col kulo'o, ka siɗaw hay dikam ala: Lawna, nan gaŋ deɓe, kay mige nan may ki sum segen naɗi: Sa coŋcoloŋŋa, sa bay-ɗigera, sa li zlata-bulona, sa ma tar vun-lumuna zawni kaw, nan may kisi nisi naɗi.

¹² Jar lumuta nan li laata sem ma', nan vul gal ma doogona vi slena van kaf.

¹³ May sa ma tar vun-lumuna coli goy gine'e, nam min muɗ iram kulo wuralawn noŋɗi kaw, may nam ci war-digamu di'e: Lawna, vulan slugota tage, nanu sa ma sulukŋa.

¹⁴ Nan digiya, san kayni kal hay ziyna valamu, nam muɗi goy ɗigere suw ma hena. Kay sa ma subur tuwamu, nam ma muɗ goy waa'a, sa ma li tuwam waana, nam ma fi suburta.

Gurosgurayna

¹⁵ Nisi mar gurosguray sa gurayn talamu, sa vuɗi wulin kaw, kay nam ma josiya. May hay li ma sa hatayna wi slen kayni, nisi tun caw lawsiya.

¹⁶ May Yesu yisiya, nam disiya: Hingi gurosgurayna ma tanu, telsiɗi: Kay mulda-Lawna na' vi sum sa kisi nisi nana.

¹⁷ Nan digi gasita: Gigekaw ma vi mulda-Lawna ki goorgoor naɗina, nam as kal haya' noŋɗi.

Sa ma joriyo ma farayna

¹⁸ Sa ma ŋol mara kep job Yesu ala: Bum-yalla ma ŋaana, nan ma li mige kay fi irita vatɗita?

¹⁹ May Yesu dumu: Naŋ yan ala ma ŋaana kay mige? Sa ma ŋaa'a mayɗi, may mi Lawn kep tuta.

²⁰ Naŋ wi vun-ma-gatna: Naŋ li zlata-buloɗi, naŋ ci matɗi, naŋ kulɗi, naŋ ka sinɗi, naŋ ma sli yam buŋu hiɗi suŋu kulo'o.

²¹ Nam di'e: Slen kayni nan ŋomomay kanu hay goorta vanay pa.

²² Hay li ma Yesu hum kayni, nam dumu: Va mara hini kep bay li kaŋ tuwa: Tuɗaŋu, gusaŋ slena vaŋ goy kafe, ɓurawam goy mi sa hawna, naŋ ma fi farayna hay wuralawna, naŋaya tapaŋ kuɗanu.

²³ May hay li ma nam hum kayni, dikam yor ŋolo, kay nam sa ma faray ŋolo.

²⁴ Hay li ma Yesu wi kayni, nam di'e: Lop ŋolo kay sum sa farayna kay kal hay mulda-Lawna!

²⁵ Lamgan as raw hay ŋil baadalla bay lopo suw sa ma farayna ma min kal hay mulda-Lawna.

²⁶ Nisi sa hum kayni di'e: La nala ma fi su'da ɗawni gige?

²⁷ Yesu hot dita: Sle ma san as lum noŋɗina kayni Lawna as lumu.

²⁸ Peter di'e: humaŋu numa hin slena vuma'awa goy kaf, numa tapawa kuɗaŋu kaw.

²⁹ May Yesu hot dumu: Nan digi gasita, la gigekaw hin goy ziyna kla, cata kla, ɓosiyomna kla, sumiyomu kla, gurona kla,

³⁰ nam ma fi slen ŋolo hay liy ma wulinna, hay liyn ma vokŋa nam ma fi irita vatɗita kaw.

Yesu di goy kay mitta hiɗi dayta-kulota valamu

³¹ Yesu yi sa doogo yam ma'na goy talamu nam disiya: Humgiya, nay tuɗay hay Yerusalem, slen kaf ma sa jobta-Lawna dum kay goora vi sana vunam ma hoba.

³² Kay nam ma vulis goy hay ɓam sa waana; nisi ma burahamu, nisi ma lasamu, nisi ma tufum nenen kalamu kaw.

³³ Hay li ma nisi watamawa watna, nisi ma cum goyo; may hay buurta ɦidita, nam ma day kulo'o.

³⁴ May nisi min hum noŋɗi, yoboy namna ŋayay kirsiya, va ma nam dumna nisi may humum cawamɗi kaw.

Sa ma dukina hay Yeriko

³⁵ Van li nala, hay li ma Yesu co goboy hiɗi Yeriko, sa ma dukina musi gaŋ hagat dam' kay siɗawa.

³⁶ Hay li ma humam hum sumun ka jik ŋolo, nam job ala li kayn mi mige.

³⁷ Nisi dum ala Yesu ma Nasaretna ka jika.

³⁸ Nam ka siwel ala: Yesu, goora vi David, laŋ slugota kan lige.

³⁹ Nisi sa ka tuɗ vokŋa bayamu kay nam ma ziŋa. May nam ka siwel ŋol suwa ala: Goora vi David, Laŋ slugota kan lige.

⁴⁰ Yesu cola, nam disiya kay nisi maram talamu. Hay li ma nam ma goboyo, Yesu jobomu:

⁴¹ Naŋ min ala nan ma lum taŋu mi mige? Nam hot dita: Bum-sumuna, nan min ala naŋ ma malan iran goyo!

⁴² Yesu dumu: Iraŋ mali goyo; vida vaŋu suɗaŋawa.

⁴³ Wulini wulini, iram mal goyo, nam tap kuɗ Yesu, nam subur Lawna. Hay li ma sumun kaf wi kayni, nisi subur Lawna.