LUKAS 17 - BIBALDA TA PELDETTA

Sle ma gi san gaana. Vida. Sa sunda sa as gutɗina

¹ Yesu di sa hatayna valamu: La linigekaw ɗutta-goyta ma ma'a, may joot kay nam ma mara'na.

² Ŋaat kay san kayni a hiɗiyta nekka ma jun kelemu, gum hay niy-lum ma ŋolla kaw, la nam mi va ma dab sem sa kep jar gurosgurayn lakŋi.

³ Ligi ŋali mi tuwgiya. La ɓasuŋŋa li sulukawa, naŋ ma gatamu, la nam hamawa, naŋ ma vulum gida.

⁴ La nam li sulukawa kataŋ sem siɗiya hay fat kepe, la nam hotay taŋ sem siɗiya kaw, la nam jobaŋ ala naŋ vulum gida ni, naŋ vulumta.

⁵ Sa hatayna dumu: Bum-Sumuna, naŋ ɦur vida vuma kulo ɦurge.

⁶ Bum-Sumuna disiya: La vida vigi ka ki jaf-seneve nala, nigi as di tam gu-sikomora zawni ala, pataŋ kulo'o hiɗi sutiyaŋ pete, gaŋ tuwaŋ goloŋ hay niy-lum ma ŋolla kaw, nam as hum kuɗgiya.

⁷ May la san jargiya ka hiɗi gorvona valamu ma zumum sinena, ŋomom luwayna kaw, hay li ma sa ma gorvona mayawa goy sine pa, wulini wulini mulamna as dum ala musaŋ gaa'a, taŋ funa de su?

⁸ Mulamna ma dum ala: Kotaŋ tin ma nan ma tum vulatitna, junaŋ sligara vaŋ furaŋu, sunanu, ta-ta nan ti'e ci'e kaw, bugolda naŋ ma ti'e ci'e may. Nam ma dum nala ɗisu?

⁹ Nam as gi deɓ mi gorvona kuɗ lop ma vuli talamu a lina su?

¹⁰ Nigi kaw, hay li ma nigi li lop ma vuli hay ɓigi a lumnawa, bugolda nigi ma di ala numa'a si gorvona sa nagay noŋɗina, numa lum kayni mi va ma vuli tuma a li'e.

Sa kuturuna doogo

¹¹ Hay li ma Yesu ka tuɗ rogoyo kay kal hay Yerusalem, nam jik jar nagata vi Samariya hiɗi Galileya.

¹² Hay li ma nam kal kulo hay hoyok-ziy mara kep, sum sa kuturuna doogo tupa digamu, nisi lak goy gine'e. Nisi ka siwel hiɗi delsi kulo ŋol ala:

¹³ Yesu bum-yalla, naŋ wuma hawma wige!

¹⁴ Hay li ma Yesu wisiya, nam disiya: Tuɗgi ɗekgi tuwgi kir muliyan sa-ɗifinna. Van li nala hay li ma nisi ka tuɗa, nisi yeray goyo.

¹⁵ San kep jarsiya, hay li ma nam muɗawa goy ŋaa'a, nam hotay ŋoromu, subur Lawna hiɗi delem kulo ŋolo.

¹⁶ Nam girif gaa vok Yesu, suburumu kaw. Namu mi sa ma Samariyana.

¹⁷ Yesu di'e: Nigi yeray goy doogo ɗisu? Sa zleeŋena ka arige?

¹⁸ Mara'a ma hotay subur Lawna may kuɗsi noŋɗi, may mi ma pulla zawni tuta su?

¹⁹ Bugolda nam dumu: Fokaŋ kulo'o tuɗaŋu, vida vaŋ suɗaŋawa.

Slen ma ɗek kay mulda-Lawna

²⁰ Sa Farisena jobom ala mulda-Lawna ma ma citige. Nam hotsi dit ala; Mulda-Lawna ma ma ɗawni ki ira fi wi tuwam naɗi.

²¹ Ɗuwgiya, nam ka tani, lebo nam ka ɗawni, sumun ma di naɗi. Kay ɗuwgiya, mulda-Lawna ka hay dikgi kalafi.

²² Nam di tam sa hatayna: Buur ma ma'a, hay li ma nigi ma gar a wi buur kep kuɗ buura vi goora vi sana, may nigi ma wumɗi.

²³ Nisi ma di tigi ala: Nam ka tani lebo nam ka ɗawni. Tuɗgi hay liy namnaɗi, jaŋgi hay liy namnaɗi.

²⁴ Ki wileta li hay sin nagat gal hena pa ta-ta gal hena, buura vi goora vi san li ɗawn kaw nala.

²⁵ May jewe nam ma ci las ŋolo, sa hay zamanna valamna ma noyom goyo.

²⁶ Ki van li hay buura vi Nuwa, van ma li hay buura vi goora vi san ɗawn kaw nala.

²⁷ Hay buura vi Nuwa sumun ti'e ci'e, yaw boyna, vul guron goyo kaw, ta-ta hay buur ma Nuwa kal kalafi hay Arkena, niyn ma'a basi goloŋ kafe.

²⁸ Van ma li ɗawni ki hay buura vi Lot nala. Sumun ay ti'e, ci'e, gusa, gus goyo, cuk jafna, in ziyna kaw.

²⁹ May hay buur ma Lot kalay goy hay Sodoma pa, Lawna hin kuta hiɗi sufre si ay gaa hay dukalawna pa, cisi goy kafe.

³⁰ Hay buur ma goora vi sana ma vul tuwam goy ɗawn kaw, slen ma li ki kayn nala.

³¹ Hay fat na'ta ɗawni, sa ma ka kulo kay yam-ziyda, la slena valamu ka kalaf hay ziyda, nam ma jik gaa'a kay yawamɗi, sa ma ka goy hay sinena fi hot voɗi kaw.

³² Humgi ma gigi kay cata vi Lot.

³³ Sa ma min suɗ irita valamu nam ma ba'a, sa ma min ba irita valamu nam ma fa'a kaw.

³⁴ Nan digiya: Hay henjet na'ta ɗawni, sumun ma' ma bur kay gilik kepe, kepna ma slumis goyo, hena ma hina may.

³⁵ Boyn ma' ma lak lut hay ziyd kepe, kepta ma sliys goyo, kepta ma hina may.

³⁶ Sumun ma' ma lak hay sinen kepe, kepna ma slumis goyo, hena ma hina may.

³⁷ Sa hatayna dumu: Kayni ma li arige Bum-Sumuna? Nam disiya: Arigekaw ma ŋumna ka'a, hay liy namna bakŋa ma daka.