LUKAS 14 - BIBALDA TA PELDETTA

Yesu yer san goyo hay buura vi sabatna

¹ Hay fatta vi sabatn tara kepe, Yesu kal vo vi sa ma ŋolla vi sa Farisen mara kepe kay ti funa.

² Nisi ka cigeɗemu. Sa mara kep ma moy ma bal tuw san cuf-cuf talamna ay coli vokom zaw.

³ Yesu sli ditiya di tam sa wi vun-ma-gatna hiɗi sa Farisen ala: Hagat ka kay muɗ san goy ŋaa'a hay buura vi sabatna lebo mayɗi su?

⁴ May nisi lak kiliŋ'. Bugol kayni nam vi sa ma moyna, muɗum goy ŋaa'a, gum iramu may.

⁵ Bugolda nam disiya: Jargi kayni la goora lebo putna vi sana nigawa hay kaata hay buurta vi sabatna ni, nam slum kulo ɗawn hay buura vi sabatn de ɗisu?

⁶ Nisi hotom dit kay kayn loɗi.

Liyn ma vokŋa

⁷ Bugolda nam di law ma nir-niramna tam sa yiyna, kay nam ka ɗuw kayni segena ka gar kay lak hay liy ma vokŋa; nam disiya:

⁸ Hay li ma san yaŋawa hay yuldeta vi dabayna, naŋ ma tuɗ mus hay liy ma vokŋaɗi, kay la li ŋalɗi, sa ma suwaŋ naŋu fiy yita kla,

⁹ a sa ma yigi ma' petna co daŋ ala: Hinaŋ liyn goyo, nala zulot ma vaŋu hay li ma naŋ tuɗ mus goy hay liy ma bugolla.

¹⁰ May hay li ma san yaŋawa, naŋ ma tuɗ mus goy cawi, kay hay li ma sa ma yaŋŋa coowa, nam ma daŋ ala bananna, ɦuraŋay kulo voko. Hay na'ta nisi kaf sa ka ti hiɗi naŋu ma suburaŋu.

¹¹ Kay gigekaw ma subur tuwamna nam ma muɗ goy waa'a, may sa ma hot yalam gaana nam ma fi suburta.

¹² Sa ma vulum yita kaw nam ka dum ala: Hay li ma naŋ kot tinawa, naŋ ma yisi si boniyoŋŋaɗi, si ɓosiyoŋŋaɗi, si sugoliyoŋŋaɗi, lebo sa ziy hiɗi naŋ kepe sa faraynaɗi kaw. Kay nisi lakŋi kaw ma hot yaŋ naŋu, nala wurakŋa vaŋ fiy vatiya.

¹³ May hay li ma naŋ kot tinawa, naŋ ma yi sa hawna, sa hurɓulina, sa dirlayna, sa dukina kaw.

¹⁴ Nala naŋ ma fi sle'ta, kay va ma nisi hot wurakaŋu may kisiɗi. May naŋ ma fi wurakŋa vaŋu hay dayta-kulota vi sa ɗigera.

Law ma nir niramna kay sa yiyna

¹⁵ Sa kepe jar nisi sa ka ti hiɗi Yesuna, hay li ma nam hum kayni, nam dumu: Sle'ta ka kay nam ma ti tina valamu hay mulda-Lawna ɗawni.

¹⁶ May Yesu hot dumu: San kep li yuldeta ŋolda, nam yi sumun ŋolo hay tina.

¹⁷ Hay li ma liyna vi tina asawa, nam cuk sa sunda valamu kay di tam sa fi yita ala: Nigiyaya, kay tin koti kafe.

¹⁸ Nisi kaf tun caw puw tuwsiya, kay nisi min maɗi. Sa ma jewna dumu: Nan gus sine'e, la nanige kaw nan tuɗ goyo kay saramu, nan siɗawaŋu, naŋ hinanu.

¹⁹ Sa mara'a dumu: Nan gus luway ma zumna jub-jub' vasl', nan min tuɗ wakamu, nan siɗawaŋu, naŋ hinanu.

²⁰ Sa mara'a di'e: Nan sli cat wuliya, kuɗ na'ta nan as coysɗi.

²¹ Sa ma sunda hotiya, di sle namna mi mulamna. Kuɗ na'ta bum-ziyna muɗ ɦiya, nam di tam sa ma sunda valam ala: Tuɗaŋ goy gosoyo hay lumuna, hay hagana vi hoyok-ziyna kaw, naŋ ma yi sum sa hawna, sa hurɓulina, sa dukina hiɗi sa dirlayna kaw, kay marsi tani.

²² Sa ma sunda di'e: Bum-ziyna, sle ma naŋ di kalamna nan lumawa, wulini liyn ka lo.

²³ Nala bum-ziyna di tam sa ma sunda: Tuɗaŋis goy hay haga ma kuɗ fiyokŋa vi zlaɓna, yaŋ sumuni dono'o kay nisi ma kalafi, kay ziyna vanu fi hoba.

²⁴ Kay na'ta nan fi digiya: Nisi sa nan yisi jewn lakŋi, sa kuɗsi kep kaw fi jugo tina vanɗi.

Tap kuɗ Yesu ir taptige?

²⁵ Sumun ŋolo ka tuɗ kuɗ Yesu. Nam muɗ iram bugolomu disiya:

²⁶ La san min tap kuɗanu, la nam bay ka gaw hiɗi bulumu, sulumu, cata valamu, gurona valamu, ɓosiyom sa jufayna hiɗi sa boyna, lebo la nam bay ka gaw hiɗi irita valamu, nam as muɗ goy sa ma hatayna vanɗi.

²⁷ Sa ma ziy gu-ma-grakŋa valam kay tuwamu kay tap kuɗanɗi, nam as li goy sa ma hatayna vanɗi.

²⁸ Kay la sa jargiya min in simdira, nam ma mus gaa'a kay ŋa gurjut goy jewe, kay ɗuwa la donota valam as kay vat lopna lebo asɗi naɗi su?

²⁹ Kay la hay li ma nam tun simdirawa, li ŋalɗi donota valam as kay vat lopnɗi kla, nala nisi sa wumna ma cen kuɗumu, nisi ma di ala:

³⁰ San kayni tun caw in simdira, may donota valam as kay vatamɗi.

³¹ Lebo la mul marige kaw, la nam min tuɗ li duura hiɗi mul mara'a, nam ma mus gaa jewe, kay ɗuw tuwamu, kay la nam ka hiɗi sumun kuɗum birim doogo, nam as ŋaf ir mul ma ka tuɗay durum hiɗi sumun kuɗum birim dok-ma'na su?

³² La nam may asɗi, hay li ma mul hen ka goy gine'e tuwa, nam ma cuk sumun talamu kay toy jar-tuwsiya.

³³ Nala la san gigekaw jargiya ma noy slena valam pet goyɗi, nam as muɗ goy sa ma hatayna vanɗi.

³⁴ Mandana mi va ma ŋaa'a, may la mandana muɗawa lemdeke, hot muɗum vi cet-cet' ɗawn hiɗi mige?

³⁵ Nam may gut nagatɗi, as muɗum zigidikɗi kaw; kom goyo tuta. Sa ma humam ka'a kay huma, nam ma huma.