LUKAS 10 - BIBALDA TA PELDETTA

Yesu cuk sa hatayna sa dok-siɗiyan sunu

¹ Bugol kayni, Bum-Sumuna vilek sum segena dok-siɗiya lo, cuksi vokom kuɗ tuwsi ma' ma' hay hoyok-ziyna hiɗi liyn kaf ma nam kay tuwamu ma tuɗ hayna.

² Nam disiya: Feɗna ka ŋolo, may sa li lopna ka kiɗaya. Kay na'ta nigi ma siɗaw Bum-feɗna kay nam ma cuk sa li lopna goy hay sinena valamu.

³ Tuɗgi goyo, humgiya: Nan cukgi ɗawn ki fok-dimina jar keŋŋa nala.

⁴ Sligi birim ma cuk gurju kigiɗi, sligi sak kigiɗi, yawgi tuguruɗi, gigi deɓ mi sa hay hagatɗi kaw.

⁵ May hay ziyn marige kaw ma nigi cuk hayna, nigi ma di jew ala «Toyta tam ziyn tani».

⁶ La goora vi toyta ka hay ziy namna, toyta vigiya ma mus kalamu. La naɗi, na' ma hotay tigiya.

⁷ Lakgi hay ziy namna, va ma nisi vulgiya, la ti'e, nigi ma tumu. La ci'e, nigi ma cumu may. Kay sa ma li lopna nagay kay wurakŋa valamu. Nigi ma jok hay ziy maraɗi.

⁸ Hoyok-ziyn marige kaw ma nigi cuk kulo hayna, la sum sa hayna vigiyawa, nigi ma ti sle ma nisi tunum vokgin kaf.

⁹ Nigi ma yer sum sa moyn goyo, nigi ma disi ala Mulda-Lawna maawa goboy tigiya.

¹⁰ May hoyok-ziyn marige kaw ma nigi cuk hayna, la nisi min vigiɗi, tuɗgi goy hay hagana, digi ala:

¹¹ Butuwna vi hoyok-ziyna vigiya ma goɓay sema'na numa pomawa goyo; may wigi ala mulda-Lawna maawa goboyo.

¹² Nan fi digi ala: Hay buur namna ɗawni, hoyok-ziy namna ma fi kitat suw Sodoma.

¹³ Joot kagu, Korasin! Joot kagu Betsayda! Kay ɗekka ta nan la' jargit kayni, lali nan la' liy hay Tirus hiɗi Sidon, nisi ɗawn hami ɓa-ɓa, cukum tisi ɗawni mi sligar-bolla hiɗi butuw-kun noŋo.

¹⁴ Kuɗ na'ta, hay buura vi kitat ɗawni, nigi ma fi kitat joot suw Sodoma hiɗi Gomora.

¹⁵ Nak Kapernawum, nak ma wul ta-ta kulo dukalawna su? A'a! Yag ma hot gaa'a ta-ta hay liyna vi sa mitina.

¹⁶ Sa ma hum kuɗgiya, nam hum kuɗan nanu, sa ma noygi goyo, nam noyan nan goyo kaw. Sa ma noyan nan goyo, nam noyom goy kayni mi nam ma ganina.

¹⁷ Sa dok-siɗiyana hotay hiɗi firita, nisi di'e: Bum-Sumuna, fuliyan kaw gat kuɗma'a hay semda vaŋu.

¹⁸ Nam disiya: Nan wi Satan nigay gaa dukalawna pa ki wileta nala.

¹⁹ Humgiya: Nan vulgi gaŋeraŋa kay tun wur-segi kay guyna hiɗi ɦurduwna kaw, kay donota vi ma gawta kaf. Va ma as kay li joo tigi mayɗi.

²⁰ May nir na'ta kepe, firigi kay fuliyan joon gat kuɗgiya ɦawaɗi, may firigiya kay segi ma li ɗoy ɗo hay wuralawna.

Labara ma firina ɗekay goy kir gurosgurayna

²¹ Hay li namna Yesu firi hay Ŋusta-Peldetta, nam di'e: Nan suburaŋu, Bunu, Bum-Sumuna vi wuralawna hiɗi nagata, nan suburaŋu kay mige slen kayni naŋ ŋayamawa kir sa yalla hiɗi sa wid ka kisina. Nan suburaŋu kay mige naŋ patam diramawa goyo kir gurosgurayna. Awa Bunu, kay kayni ti varta vaŋ ta ŋaata.

²² Slen kaf Bun vulantawa, sa ma wi Goora mayɗi, wum mi Bumna kep, sa ma wi Bumna mayɗi, wum mi Goora kep, hiɗi nam ma goora min ɗek Bumna kiramna tuta.

²³ Nam muɗ iram kir sa hatayna, ka disi goy visi ala: Sle'ta ka kay sum sa irsi ka wi va ma irgi nigi ka wum vayd lakŋi.

²⁴ Kay nan digiya: Sa jobta hiɗi muliyan ŋolo dar a wi va ma nigi wum wulin lakŋi, may nisi wumɗi, nisi dar a hum caw sle namna ma nigi humum wulin lakŋi, may nisi humumɗi.

Law ma nir-niramna kay sa ma Samariyana ma ŋaana

²⁵ Sa ma wi vun-ma-gatna kep fok kulo'o kay wak Yesu, nam ka dum ala: Bum-yalla, nan ma lum mige kay nan ma fi irita vatɗita?

²⁶ Yesu dumu: Ɗoy hay gatta nanige? Naŋ ka jaŋ mige haya?

²⁷ Nam ka hot dit ala: naŋ ma min Bum-Sumuna Lawna vaŋu hiɗi dikaŋ kaf, hiɗi ciwta vaŋ kaf, hiɗi donota vaŋ kaf, hiɗi varta vaŋ kaf kaw. Naŋ ma min sugoloŋu ki tuwaŋ nala kaw.

²⁸ Yesu ka dum ala: Hot dita vaŋ ŋaa'a, laŋ sle namna, nala naŋ ma mus iriya.

²⁹ May kay nam min muɗ tuwam goy ɗigere, nam di tam Yesu ala: Sugolonu mi gige?

³⁰ Yesu sli ditiya dumu: San kep fokay hay Yerusalem pa, min kal hay Yeriko. Sa coŋcoloŋŋa vumu, nisi yaw slena valamu, watam kaw. Nisi kaliya, hinim goboy hiɗi mitta.

³¹ Mul-ma-ɗifinna kepe jik hay hagata na'ta, nam wi sa namna, nam jik goy galamu.

³² Sa ma levitna kep kaw co hay liyn namna, hay li ma nam wumu, nam jik goy galamu kaw.

³³ May sa ma Samariyana kep hay rogoyta valamu, nam tupa kalamu. Hay li ma nam wumu, nam muɗi kiram haw ŋolo.

³⁴ Nam tuɗ talamu, jun vun milla, ɦok mula hiɗi vinna vun milla, mus san kay kurota valamu, kalam hay ziyn ma bur rogoyna, kotom tuwam ŋaa'a kaw.

³⁵ Hay buurta ka'ta, nam yaw denariyus ma' vulum mi bum-ziyda, dumu: Naŋ ma kotom tuwam ŋaa'a, sle ma naŋ bam goy suwna, nan kay tuwanu ma wurakaŋga hay li ma nan hotiyawa.

³⁶ Jar sumun ɦidi lakŋi, ma ɗuw kiraŋ ki sugol sa ma sa coŋcoloŋŋa watamna nala mi gige?

³⁷ Nam hot dita: Mi ma li slugot kalamna. Nala Yesu dumu: Naŋ kaw tuɗ ɗawni, naŋ ma li ki kayn nala.

Marta hiɗi Mariya

³⁸ Hay li ma nisi ay hay rogoyta visiya, nam kal hay hoyok-ziyn mara kep. Cat kep ya' Marta, na' vum hay ziyna va'a.

³⁹ Basu'ta ka kepe, ya' Mariya, na' mus gaa gay Bum-sumuna hum yoboyna valamu.

⁴⁰ May Marta ŋalda va'a tuni ŋolo kay kot tin kalamu. Na' co'o di tam Bum-Sumuna: ɓasunta hinan li lop van kep kayni may ɗuw kiraŋ jooɗi su? Daŋga kay na' ma co gut kuɗanu.

⁴¹ May Bum-Sumuna hot dita: Marta, Marta, nak ka mak tuwag ŋolo, dikag ka tag kay slen ŋolo kaw.

⁴² May van kep suw slen pet kayn ala: Mariya vilek gal ma ŋaanawa ma as sli goy ka'ɗi.