LOPNA 9 - BIBALDA TA PELDETTA

Hamda vi Saulus

¹ Hay na'ta Saulus dikam may tun suk noŋɗi, nam ka ɦiwir sa hatayna vi Bum-Sumuna, ka gar kay cisi goyo kaw, nam tuɗ tam mul ŋol ma-ɗifinna,

² jobom ɗerwella kay sinagogayna ma hay Damas, kay hay li ma nam fi sumu lebo boy sara'a, sa tapay kuɗ hagat kaynawa, nam ma marsi hay Yerusalem kayn juni jun'.

³ Hay rogoyta valamu, hay li ma nam co goboy hiɗi Damas, wum pa kayni, haraŋa may kulo hay wuralawn pa, wile kalam wilik'.

⁴ Nam nig gaa'a, nam hum della ka di talam ala: Saulus, Saulus, naŋ lan las kay mige?

⁵ Nam hot dit ala: Naŋ mi gige Bum-Sumuna? Bum-Sumuna dum ala: Mi nan Yesu ma naŋ ka lasamna, lop ŋol kaŋu kay li wuri kat jalaŋŋa. Saulus hobay hiɗi narta, tuwam muɗ vum bat-bat', nam di ala: Naŋ min ala nan ma lum mige Bum-Sumuna? Kay na'ta Bum-Sumun dum ala:

⁶ Fokaŋ kulo'o, tuɗaŋ hay hoyok-ziyna, sumun ma daŋ kay va ma naŋ ma lumna.

⁷ Sum sa tuɗay rogoy hiɗi namna ay lakay ŋelay kitiŋ' kay narta; nisi ka hum della, may irsi tun kay saɗi.

⁸ Saulus fokay kulo'o, iram goy mali jiɗi', may wi va ne'ɗi; nisi vum ɓalamu kay tuɗum Damas.

⁹ Nam li buur ɦidi, iram may wiɗi, nam may tiɗi ciɗi kaw.

¹⁰ May hay Damas kayni, sa ma hatayna ay kepe, semda valam Ananiyas. Bum-Sumuna dum hay ɗekka ala: Ananiyas! Nam hot dit ala Bum-Sumuna, nanis zawni!

¹¹ Bum-Sumuna di talam ala: Fokaŋ kulo'o, tuɗaŋ hay hagata ta ya' ala ta Ɗigerta, naŋ ma gar san ma yum ala Saulus ma Tarsusna, naŋ ma garam hay ziyna vi Yudas.

¹² May nam ka siɗawa, nam wi san ma semda valam ala Ananiyas vul tuwam kiramu, nam kalay kalafi, tun ɓalam kalamu, kay nam ma muɗ wi'e.

¹³ Ananiyas hot dita: Bum-Sumuna, nan hum sumun ŋolo ka law kay joota ŋolda ta san kayni ka la' tam sa peldetna vaŋu hay Yerusalem;

¹⁴ Wulin tan kaw, nam ka hiɗi donota ta nam fa'ay tam muliyan ŋulo sa-ɗifinna, kay jun nisi kaf sa yi semda vaŋu.

¹⁵ May Bum-sumuna dum ala: Tuɗaŋu, kay san kayni muɗi mi sa ma nan vilekem goyna, kay nam ma tuɗan semda van goy jar jaf-sumuna, goy tam muliyana, goy vok gurona vi Israyel kaw;

¹⁶ Nan ma ɗekem ala nam ma ci lasta ŋolo hay semda vanu.

¹⁷ Ananiyas kaliya, nam kal kalaf hay ziyda, nam tun ɓalam kay Saulus di'e: Saulus ɓasunna, Bum-Sumuna Yesu ma vul tuwam kiraŋ hay hagata ta naŋ tuɗi haya'ta ganiyawa taŋu, kay naŋ ma muɗ wi'e, lo kay naŋ ma hob hiɗi Ŋusta-Peldetta.

¹⁸ Wulini wulini van nig goy kiramu ki ɓulokŋa nala, nam fi wida kaw. Nam fokay kulo'o, fi baptisma kaw;

¹⁹ Bugol nam ti fun tina, nam fi donota. Nam musi ir buur neeɗa hiɗi sa hatayna hay Damas,

²⁰ Wulini wulini nam tun caw kus kay Yesu hay sinagogayna, nam tun caw di goy ala Yesu kayn mi goora vi Lawna.

²¹ Nisi kaf sa humumna muɗi ɦuyum' di kaw ala: Kayni mi nam ma las nisi kaf sa yi sem na'ta kayni hay Yerusalem ɗisu? Nam ma tan kayni kay jun sumuna kay narsi tam muliyan ŋulo sa-ɗifinna ɗisu?

²² Hay na'ta Saulus muɗ dono vokom suwa suwa, nam viy Yudiyana sa hay Damas goy diwiŋ' hay li ma nam ɗeksi goy haraŋ ala Yesu mi Kristu.

²³ Buura kalay ŋol neeɗa bugol kayni, sa Yudiyana ŋra vun tuwsiya kay cum goyo.

²⁴ May Saulus hum kay ŋra-vunda visiya. Henjeta hiɗi falayta kaf, nisi ka ŋom vun-ziyna kay cum goyo.

²⁵ May hay henjeta sa hatayna slumu musum hay tikisina, sirim gaa'a ŋor gulmunna.

²⁶ Hay li ma nam co Yerusalem, nam gar kay tap tuwamu hiɗi sa hatayna, may nisi kaf li nar kalamu, varta visi ala nam as muɗ sa ma hatayaɗi.

²⁷ Nala Barnabas vum kuɗumu, tuɗum tam sa hatayna, visi labar ala ir nanige hay hagata, Saulus wi Bum-sumuna ma law talamu, a nanige hay Damas kaw nam law goy haraŋ kay semda vi Yesu.

²⁸ Nam ka tuɗa, ka hotay hiɗi nisi Yerusalem kaw, nam ka di goy kursuliya kay semda vi Bum-sumuna.

²⁹ Nam ka lawa, ci way kaw hiɗi Yudiyan sa di vun Grekŋa, may nisi gar kay cum goy mati.

³⁰ Hay li ma ɓosiyomna humawa, nisi kalam hay Sesariya, gum iram hay Tarsus.

Yerta-goyta vi Eneyas, dayta-kulota vi Tabita

³¹ Hay Yudiya, hay Galileya, hay Samariya kaw, ekklesiyata ay tuni hay sle'ta, na' ka in kulo'o, tuɗ ŋaa'a kaw hay narta vi Bum-Sumuna, ka ɦur voka'a hiɗi gutda vi Ŋusta-Peldetta.

³² Peter ma ka ŋuy liyn kayni kafna, tuɗ tam sa peldetna sa ka hay Lidda.

³³ Nam fi san kep ma semda valam Eneyas, sa ma hurɓulina, buri gaa kay raŋgawna busat glafandi.

³⁴ Peter dum ala: Eneyas, Yesu Kristu muɗaŋ goy ŋaa'a, fokaŋ kulo'o, kotaŋ va ma buura vaŋ kay tuwaŋu, nam fokay kulo cigiɗaw' de'.

³⁵ Sumuna sa hay Lidda kaf hiɗi sum sa hay beɗna vi Saron kaw wumu, nisi muɗi kuɗ Bum-Sumuna kaw.

³⁶ Hay Yoppe cata ta hatayta ay kep ta semda va' ala Tabita, kayni min di ala Dorkas, na' li lop ma ŋaana ŋolo, vul ŋolo kaw.

³⁷ Na' li moyo hay buur namna, mitiya kaw. Hay li ma nisi muza' goy muzna, nisi sla'a, bura' hay ziyda ta kulota.

³⁸ Ki Lidda ka goboy hiɗi Yoppe, sa hatayna hum kaw ala Peter ay ɗawni, nisi cuk sumun ma' talamu kay dum ala: Naŋ ma vi yaŋay kay co tumaɗi.

³⁹ Peter fokay kulo'o kalay hiɗi nisiya. Hay li ma nam coowa, nisi kalam kulo hay ziyda-kulota. Boy sa duhulla kaf sa ka tiya ma talamu, nisi ɗekem kay sligara hiɗi sligar-tuwna ma Dorkas kotomna hay li ma na' ays hiɗi nisiya.

⁴⁰ Peter gi ir sumun kaf goy jiya, nam girif gaa'a, siɗawa kaw, nam muɗ iram tam tuwna di ala: Tabita, fokag kulo'o! Na' mal ira' goyo, na' wi Peter, na' mus kulo'o kaw.

⁴¹ Nam vula' ɓalamu, musa' kulo'o kaw. Bugolda nam yi sa peldetna hiɗi boy sa duhulla, nam cola' goy voksi iriya.

⁴² Van kayni biyay goy hay Yoppe pet, sumuna ŋolo vi hay Bum-sumuna kaw.

⁴³ Peter musi hay Yoppe vo vi Simon sa ma lumut bakŋa ir buur neeɗa.