LOPNA 8 - BIBALDA TA PELDETTA

¹ Saulus tap vunam hay mitta vi Stefanus. Hay buur namna kayni, lasta ta ŋolda fokay kulo'o kay sa tapna hay Yerusalem; nisi kaf meray goyo hay nagata vi Yudiya hiɗi Samariya, hin kayni si sa Apostolayna tuta.

² Sum sa vi kuɗ Lawna pi Stefanus, tiy kalam ŋolo kaw.

³ May Saulus ka li waskay tam tapna ŋolo, nam kal kalaf hay ziyna ziyna, nam yaw jufayna hiɗi boyna, cuksi daŋgaya kaw.

⁴ Nisi sa meray goyna tuɗ hay liyna liyna, kay kus labar ma firina vi yoboyna goyo.

TAPNA HAY YUDIYA, HAY SAMARIYA HIƊI SIRIYA Sa ma sun-tapna Filip ka hay Samariya, Simon ma li hiilana

⁵ Filip kalay hay hoyok-ziyna kep hay Samariya, nam kus labara kay Kristu.

⁶ Sumuna ŋolo tapay hay varta kep, ka tapay kuɗ sle ma Filip ka dumna, hay li ma nisi ka huma, ka wi ɗekka ma Filip ka lumna kaw.

⁷ Kay fuliyan ma joona ŋolo ka siwel hiɗi delem kulo'o hay li ma nam kalay goy hay sumuna sa nam ka haysina, sum sa keŋkeleŋŋa ŋolo hiɗi sa dirlayna muɗi goy ŋaa'a.

⁸ Firita li ŋolo hay hoyok-ziyn kayni.

⁹ San kep selem ala Simon, ma li liskinna, nam ay jew hay hoyok-ziyn kayni, nam li sle ma muɗ sum sa Samariyan ɦuyum', nam di kay tuwam kaw ala nam mi sa ma ŋolla.

¹⁰ Nisi kaf, tun caw tam sa gurayn pa ta-ta tam sa ŋulona, tapay kuɗumu, nisi ka di ala: San kayni nam mi donota vi Lawna, ta ya' ala ta ŋolda.

¹¹ Nisi tapay kuɗumu kay nam muɗsi ɦuyum' hiɗi sle ma hiilana valamu.

¹² May, hay li ma nisi vaawa kuɗ Filip, ma kus labar ma firina vi mulda-Lawna tisiya hay sem Yesu Kristu, jufayna hiɗi boyna fi baptisma kaw.

¹³ Simon namna kaw vi'e. Hay li ma nam fi baptisma fina, nam jaɓ kulo kuɗ Filip, nam muɗi ɦuyum' kay ɗekka hiɗi gul-yalda ma Filip ka li'e.

¹⁴ Hay li ma sa Apostolayna sa ay hay Yerusalem hum ala, sum sa hay Samariya vi yoboyna vi Lawnawa, nisi cuk Peter hiɗi Yohana tisiya.

¹⁵ Hay li ma nisi co tisiya, nisi siɗaw kisiya kay nisi ma fi Ŋusta-Peldetta.

¹⁶ Kay na' bay jikay gaa kay sa kep jarsi tuwa, kay nisi fi baptisma kayni hay semda vi Yesu Kristu ɦawa.

¹⁷ Nala Peter hiɗi Yohana bar ɓisi kisiya, nisi fi Ŋusta-Peldetta may.

¹⁸ May hay li ma Simon wi ala Ŋusta-Peldetta vula'ay kayni hiɗi tunda-ɓamta vi sa Apostolayna, nam marsi gurju'u, ka disi ala:

¹⁹ Donot na'ta kayni nigi vulanti tage, kay gigekaw ma nan tun ɓan kalamna ma fi Ŋusta-Peldetta.

²⁰ Peter dumu: Gurjuta vaŋ ma tuɗ hiɗi naŋu hay ba-goyta, kay naŋ var kay gus vulda vi Lawna hiɗi gurju'u.

²¹ Galla vaŋu hiɗi ir ɓurawta vaŋu may hay lawta kaynɗi, kay dikaŋ may ɗiger vok Lawnɗi.

²² Hamaŋ wulini kay varta vaŋ ta joota, siɗawaŋ Lawna kaw kay naŋ as fi gida kay varta vi dikaŋ kla;

²³ Kay nan wi'e naŋ ka las vun galakka vi goyo-goyna, naŋ ka hay zigewna vi bay-ɗigerta kaw.

²⁴ Simon hot dit ala: Nigi kaw siɗawgi Bum-Sumun kan lay, kay sle ma nigi dumna kayni mara'a ma co kanɗige.

²⁵ Hay li ma nisi li di-goyta lina, kus yoboyna vi Bum-sumuna kaw kusna, nisi hotay hay Yerusalem, may nisi kus labara ma firina hay hoyok-ziyna vi Samariya ŋolo.

Sa ma sun-tapna Filip ŋaf hiɗi sa ma patayna ma Etiopiyana

²⁶ Sunda-wuralawna di yoboyn tam Filip ala: Fokaŋ kulo'o, tuɗaŋ hay gal ma kayamna, hay hagata ta may Yerusalem pa tuɗ hay Gaza, ta ka hay fulda. Nam fokay kulo'o, kalay kaw.

²⁷ Ɗuw na kayni, sa ma Etiopiyana ma patayna, sa ma ŋolla vi Kandake, ca-mulda vi Etiopiya, sa ma ŋolla vi ŋomda vi farayna va' kaf, nam may Yerusalem pa kay girif Lawna,

²⁸ Nam hotiya, musi hay kekena, nam ka jaŋ ɗerwelda vi sa ma jobta-Lawna Esaya:

²⁹ Ŋusta law tam Filip ala: ɦuraŋis vokaŋu, tuɗaŋ goboy tam keken kayni.

³⁰ Filip jaŋ tam sa ma Etiopiyana, san kayni ka jaŋ ɗerwelda vi Esaya ma jobta-Lawna. Filip dumu: Va ma naŋ ka jaŋamna kayni naŋ humum cawam su?

³¹ Nam hot dita: Nan as humum cawam ɗawn humtige, la sa ɗekanɗina? Nam di tam Filip kay ɓe kulo kuɗum hay kekena.

³² Ɗota ta nam ka jaŋa'a law ki kayn nala: Nisi vumu ki ɦu-dimita ta nisi nara' kay ŋata' goyo nala; ki goor ɦu-dimina col humuk' vok nam ma kaam ɗuŋusam nala, nam may mal vunam kuloɗi,

³³ Hay hot-yamda valam ta gaata kitata valam sliy goyo, Sa ma vi labar jafna valam gige? Kay irita valamu yaway goy kay nagata.

³⁴ Sa ma patayna sli ditiya di tam Filip ala: Nan jobaŋ hawtige, sa ma jobta-Lawna di kayn kay gige? Nam law kayn kalam kay tuwam lebo kay sa mara su?

³⁵ Nala Filip mal vunam goyo, tun caw kusum labara ma firina vi Yesu goy hay ɗot na'ta pa.

³⁶ Ki nisi ka tuɗ hay hagata visi voksiya voksiya, nisi co hay liy mara ma niyna ka haya. Sa ma patayna di'e: Niyna ka tani, va ma telan kay nan fi baptismaɗi mi mige?

³⁷ Filip dum ala: La naŋ vaawa hiɗi dikaŋ kaf, kayni fi li'e. Sa ma patayna hot dita: Nan vi ala Yesu Kristu mi goora vi Lawna.

³⁸ Nam vul hagata kay col kekena, nisi ma' pet jik gaa hay niyna, Filip hiɗi sa ma patayna. Filip lum baptisma.

³⁹ Hay li ma nisi jikay kulo deŋel jikŋa, Ŋusta vi Bum-Sumuna sli Filip goyo, sa ma patayna may wum loɗi. May nam kalay hay hagata valam hiɗi firita.

⁴⁰ May Filip kalay hay Azotus, nam kus yoboyna hay hoyok-ziyna ma nam jik hayna kaf, ta-ta hay cota valam hay Sesariya goŋ'.