LOPNA 5 - BIBALDA TA PELDETTA

Ananiyas hiɗi Safira

¹ May san kepe semda valamu Ananiyas, hiɗi Safira cata valamu gus sinena valam goyo,

² nam ŋra vunam hiɗi cata valamu, ŋay gal gurjut goyo, gal gurjut hena nam mara'a, tuna' gaa vok sem sa apostolayna.

³ Peter dumu: Ananiyas, Satan hobaŋ dikaŋ nala a naŋ ka sin kat Ŋusta-Peldetta, kay yaw kuɗ gurjuta vi sinena ma naŋ gusum goyna kayn kay mige?

⁴ Hay li ma nam ay hay ɓaŋu, nam may mi ma faŋŋa ɗisu? Hay li ma naŋ gusum goy gusna, gurjuta ay kayn hay ɓaŋ naŋɗi su? Naŋ var hay dikaŋ kay li lopn ki kayni nala kay mige? Naŋ ka sin kayni may tam sumunɗi, may tam Lawna.

⁵ hay li ma Ananiyas hum kayni, nam nig gaa'a, sukam kalay goyo, sumuna sa dakayna kaf narta visi ŋolo.

⁶ Sa joriyona yaw kulo'o, ɗutumu, tuɗum goyo, pum gaa'a kaw.

⁷ Leer goboy ɦidi bugol kayni, cata valam kalay kalafi, may na' bay wi va ma lina tuwa.

⁸ Peter di ta' ala: Nak danay hawtige, kayni ti gurjuta ta nigi gus sinen goy ka'ta tuta su? Na' hot dita: Awa, kayn gurju na'ta ta'.

⁹ Nala Peter hot da' ala: Nigi ŋra vungi nala kay nem Ŋusta-Peldetta vi Bum-Sumuna kay mige? Ɗuwag sem nisi sa pi jufagŋa ka goboy vun ziyda, nisi ma ziyag nak goy kaw.

¹⁰ Wulini wulini na' nig gaa selemu, mitiya kaw. Sum sa joriyona hay cukka visi ay kalafi, fa' kayni mitiya; nisi sla'a, tuɗ pa' goboy tam jufa'a.

¹¹ Narta ta ŋolda nig gaa kay sa tapna hiɗi nisi kaf sa hum slen kayni.

Sa sunda vi Yesu li ɗekka ŋolo

¹² Ɗekka hiɗi slen ma li sumun ɦuyum' ŋolo li jar sumuna hiɗi ɓam sa Apostolayna. Nisi kaf lakay kuɗ diɓira vi Salomon hiɗi varta ta kepta.

¹³ Sa kep kaw ma jar sa hena ma va' talamu kay tap kuɗsiya mayɗi; may sumun ka vulsi suburta ŋolo.

¹⁴ Vokŋa vi jufayna hiɗi boyna sa vi hay Lawna muɗ vokom ŋol suwa suwa.

¹⁵ Nisi ziy sa moyna hay sle-ma-buura hiɗi raŋgawna, laksi hay hagata, kay hay li ma Peter ka jika, ŋusam as jik kay sa mara jarsi kaw ɗisu?

¹⁶ Sumun ŋol ɦini-ɦini jaŋay hay hoyok-ziyna ma ŋuyi gal Yerusalemna pa, nisi mar sum sa moyna hiɗi sum sa ka las kay fuliyan ma liwisna, nisi kaf muɗi goy ŋaa'a.

Sa Apostolayna ka vok sa ɗiger-lawta lo. Gamaliyel

¹⁷ Wulini mul ŋol ma-ɗifinna ɦidi nisi sa ay kuɗum kafe, kayn min di'e vokŋa vi sa Sadusena fokay kulo'o, hobay hiɗi hunayta,

¹⁸ Nisi yaw sa Apostolayna, cuksi daŋgaya.

¹⁹ May hay henjeta, sunda vi Bum-Sumuna kep mal vun daŋgayn goyo, nam cuksi goyo jiya disi ala:

²⁰ Tuɗgi hay Tempella, kusgi yoboyna vi irita kayni tam sumuna kafe.

²¹ Hay li ma nisi hum kayni humna, hay grawt culum, nisi cuk kalaf hay Tempella, tun caw hata kaw. Mul ŋol ma-ɗifinna hiɗi nisi sa ay kuɗum kafna yi dakŋa vi sa ɗiger-lawta, hiɗi tokŋa vi sa maariyana vi gurona vi Israyel kafe, cuk sunu kay yaw sa Apostolayna ay hay daŋgayna pa.

²² Sa ŋomda kaw, hay cota visiya, nisi may fisi hay daŋgaytaɗi. Nisi hotiya, disi labara ala:

²³ Numa fi vun daŋgayn giy ŋaa kit', sa ŋomda lakay hay liyn ma lopna visiya hay vun-ziyda kaw, may hay li ma numa mal vun-ziyd goyo, numa fi sa kalafɗi.

²⁴ Hay li ma nisi hum yoboyn kayni, mul ŋol ma ŋom Tempella hiɗi muliyan ŋulo sa-ɗifinna fi va ma di kisiɗi, job tuwsi jar-tuwsi kay lawta kayni ma muɗ mige kla nisi wiɗi.

²⁵ San kep co'o ka disi ala: Ɗuwgiya, sum sa nigi cuksi daŋgayna ka lakay hay Tempella, ka hat sumuna kaw.

²⁶ Wulini mul ma ŋomda hiɗi sa sunda tuɗa, yawsi hiɗi donotɗi, kay nisi li nar ala sumuna ma gisi hiɗi goorhoyona.

²⁷ Hay li ma nisi marsiyawa, nisi laksi vok sa ɗiger-lawta. Mul ŋol ma-ɗifinna ka jobsi ala:

²⁸ Numa telgi kay nigi hat hay semda kaynɗi, may ɗuwgiya, nigi hob Yerusalemawa hiɗi hatta vigiya, nigi min tun busuwna vi san kayni kuma'a su?

²⁹ Peter hiɗi sa Apostolayna hot dita: Numa'a hum kuɗ Lawna suw sana.

³⁰ Yesu ma nigi cum goyo hay li ma nigi ɓalam kulo kat gu-ma-grakŋa, Lawna vi sumiyaya dayam kulo'o.

³¹ Lawna slum kulo hay galam ta jufta ki mulla hiɗi sa ma su'da, kay vul hamda hiɗi vulda-gida kay sulukŋa mi sa Israyella.

³² Numa'a si sa li di-goyta kay slen kayni, Ŋusta-Peldetta nala kaw, na'a ta Lawna vula'ay mi sum sa hum kuɗumna.

³³ May hay li ma nisi humsi nala kayni, nisi jet tuwsi goyo, min kay cisi goyo kaw.

³⁴ Sa ma Farisena kep ma yum ala Gamaliyel, ma ŋol ma hat gatta, ma sumun pet slum yalam kulo'o, nam fok kulo jar sa ɗiger-lawta, vul hagata kay sa Apostolayna cuk goy jiy ir liyn neeɗa.

³⁵ Bugolda nam di tisi ala: Nigi sa Israyella, ligi ŋali kay va ma nigi lum tam sumun lakŋi.

³⁶ Kay liyn kalay ŋol suw asɗi, Tewdas fok kulo'o, di goy kay tuwam ala nam vane, sumun goboy ir ki kis-fiɗi nala tap kuɗumu. Nam fi cita-goyta, nisi kaf sa tap kuɗumna mer goyo, nisi vatay goy waa'a.

³⁷ Bugolom nam lo Yudas ma Galileyan fok kulo'o, kayni hay buur ma ŋaɓ sumuna, nam tap sumun kuɗumu: Nam mita, may sa tap kuɗumna kaf meray goyo.

³⁸ Wulin kayni nan digiya, sumun lakŋi nigi ma li va tisiɗi, hinsi tuɗa. La lopna kayni may vi sumuna,

³⁹ nam ma vat goyo, may la nam may vi Lawna, nigi as ɓulakam goy noŋɗi. Ligi ŋali kay nigi muɗ ki sa dur hiɗi Lawna naɗi.

⁴⁰ Nisi kaf tap kuɗ varta valamu, nisi yi sa Apostolayn aya, watsiya, telsi kaw kay nisi ma di goy kay sem Yesu loɗi, bugolda nisi cuksi may.

⁴¹ Nisi cukay goy jiya vok sa ɗiger-lawta pa, diksi firiya, kay nisi nagay kay fi ŋulda kuɗ sem Bum-Sumuna.

⁴² Hay buurta kaf, hay Tempella, hay ziyna kaw, nisi may hin hatta hiɗi kusta kay labara ma firina kay sem Kristu Yesu goy noŋɗi.