LOPNA 26 - BIBALDA TA PELDETTA

Ɓakŋa vi Paulus vok Agripa

¹ Agripa di tam Paulus: Liyn hini taŋu kay naŋ ma fi di goyo kay sem lawta vaŋu. Wulini Paulus meɗ ɓalam goyo, di goy kay sem lawta valam ala:

² Mulla Agripa, nan firi ŋolo kay nan fi but sem lawta van goy vokaŋ vaydi kay slen pet ma sa Yudiyana tunum kanu,

³ suw pet naŋ wi data vi sa yudiyan kaf goy haraŋi, naŋ wi ci-wayna visi kaw. Kay na'ta nan siɗawaŋu kay naŋ ma human hiɗi ŋali.

⁴ Irita vanu, hay goota vanay pa, ɓa-ɓa hay tun-cawta van pa kaw, li kayni hay Yerusalem, jar jafna vanu; sa Yudiyana kaf wi kayni.

⁵ Nisi wan goy jew ɓa-ɓa, la nisi min li di-goyta kay kayni, nan poy ki sa ma Farisena nala, vi kuɗ galla vi hatta ta ɗeŋ ŋolda hay vida vuma'a.

⁶ May wulini, nan ka fi kitata kuɗ cubta-sle'ta ta Lawna da' tam sumayma'a.

⁷ Cubta-sle'ta ta jafna vuma'a ma doogo yam ma'na ka girif Lawna hiɗi na'a bay tun suku, hay henjeta hiɗi falayta kaw, cub kuɗ sle'ta ta-ta co tam yamda-dabta vi deŋga. Sa Yudiyana pi lawt kan kayni kuɗ cubta-sle'ta na'ta, mulla.

⁸ Mige! Nigi var ala Lawna as day sa mitina kuloɗi kay mige?

⁹ Kan nan kay tuwan kayni, nan varay kay dur kay sem Yesu ma Nasaretna hiɗi ŋiriyan vat'.

¹⁰ Kayni mi va ma nan lumay hay Yerusalem: Nan kay tuwanu kaw cuk sa peldetna ŋolo daŋgaya, hay li ma muliyan ŋulo sa ɗifinna vulan donoti vulla, lo hay li ma nisi fi cita-goyta, nan tap vunan haya kaw.

¹¹ Hay sinagogayna kaf, nan lisi las tum-tum', nan so'otsi dono'o kay nisi ŋula. Nan muɗi tisi ɦiy ŋolo, nan lisi lasi ta-ta hay hoyok-ziyna ma goyna.

¹² Hay kayni, hay li ma nan kal hay hay Damas, hiɗi donota vi muliyan ŋulo sa-ɗifinna sa vulan hagata kaw.

¹³ hay falayt calak', nan wi hay hagata haraŋa ma may wuralawn pa, haɓ tal-tal' suw fatta, haraŋ namna ŋuyan hiɗi sa kuɗanna, mulla!

¹⁴ Numa kaf yak gaa kay nagata, nan hum della ma ka di tan hay vun Hebren ala: Saulus, Saulus, naŋ lan las kay mige? Lop ŋol kaŋu kay jik goy kay jalaŋŋa.

¹⁵ Nan hot dita: Naŋ kayn mi gige Bum-sumuna? Bum-Sumuna di'e: Nan kayni mi Yesu ma naŋ lum lasi.

¹⁶ May fokaŋ kulo'o, colaŋ kulo kay seŋu; kay na'ta nan vul tuwan kiraŋu: Nan vilekaŋ goyo kay naŋ ma muɗ ma sunda hiɗi ma li di-goyta kay slena ma naŋ wum kanu, kay slen ma nan ma vul tuwan kiraŋ kalamna kaw.

¹⁷ Nan vaŋay goy jar sumun tan pa, jar sa waana kaw, sa nan min gaŋ tisin ɗawn pa kaw, kay malsi irsi goyo,

¹⁸ kay nisi ma hin jufunda goyo muɗ tam haraŋa, kay nisi ma hin donota vi Satan goyo, muɗ tam Lawna, a nisi ma fi gida kay sulukŋa, fi vocota hiɗi sa li goy peldete hay vida hayanu kaw.

¹⁹ Kay na'ta mulla Agripa, va ma vul tuwamay kiran wuralawn pana, nan may ŋelem vunamɗi. May tam sa hay Damas jewe,

²⁰ bugolda tam sa Yerusalemna, hay nagata vi Yudiya noŋ kaf, bugolda lo tam sa waana, nan kus yoboyna vi hamda hiɗi mu'da ma tam Lawna, hiɗi lita vi lopna ma nagay kay hamda.

²¹ Kuɗ lawta kayni sum sa Yudiyana vanu, hay li ma nan ka hay Tempella, nisi gar kay can goyo kaw.

²² May Lawna gutanu, ta-ta fatta vaydit zawni, nan ka li di-goyta vok sa gurayna, vok sa ŋulona kaw, slen ma sa jobta hiɗi Musus di kay nam min li vokona, nan may di va mara goy bugolomɗi,

²³ kayn min di ala Kristu ma fi lasta, a nam ma lin mi ma dayay kulo jewna jar sa mitina, nam ma di goy kay haraŋa vi sa waana.

²⁴ May hay li ma nam ka di goy kay sem lawta valamu ki kayn nala, Festus ka law hiɗi delem kulo ŋol ala: Paulus, naŋ ɦoyay su? Wida vaŋ ta ŋolda ka zutaŋ hay ɦoyta!

²⁵ Paulus hot dit ala: Festus ma ŋolla, nan may ɦoyayɗi, nan dum kayni mi yoboy ma gasiya ma cawam ka goy ŋaa'a kaw.

²⁶ Mulla wi slen kayni kaf, nam dumti goy haraŋ nala, kay nam wi goy haraŋ ala va ma ne' ma nam wumɗi mayɗi, kay slen kayni li goy ŋayayɗi.

²⁷ Mulla Agripa, naŋ vi kuɗ sa jobta-Lawna su? Nan wi ala naŋ viya.

²⁸ Agripa di tam Paulus ala: Hini ne' ɦawa a naŋ muɗan goy sa ma fi Kristuna.

²⁹ Paulus hot dit ala: La hini kiɗay ne' ɦawa lebo ŋolo kaw, nan siɗaw tam Lawn kayn ala may naŋ vaŋ kepɗi, may nisi kaf sa human vaydina kaw, a nigi kaf ma muɗ ŋray ca ki nan nala, may bay jaɓna kayni.

³⁰ Wulini mulla hiɗi guverner hiɗi Bernike, hiɗi sa lakay hiɗi nisi kafna fokay kulo'o,

³¹ vi tuwsi goy hay liy mara'a, nisi di jar-tuwsi ala: San zawni li va ma nagay kay mitta lebo jaɓnaɗi!

³² Agripa di tam Festus ala: San zawni as kay fi gita-goyta, lali nam jok kitata valam joki vok Cesarɗina.