LOPNA 25 - BIBALDA TA PELDETTA

Paulus vok Festus

¹ Hay li ma Festus mus kay lopna vi guverner kay nagata musna, buur ɦidi bugolda nam fokay hay hay Sesariya kal hay Yerusalem.

² Muliyan ŋulo sa-ɗifinna hiɗi sa ŋulona jar sa Yudiyana yi vokomu kay Paulus.

³ Nisi giɗelem delemu, jobomu kay nam mar Paulus hay Yerusalem; hay kayni nisi kot tuwsi kay baramu, cum goy mati kaw hay hagata.

⁴ Festus hot dita ala: Paulus ka ŋomi hay Sesariya, hini ne' ɦawa, nam kay tuwam ma kala kaw.

⁵ Nam di'e: La sum sara jargiya as tuɗ hiɗi nanu, la va ma joo'o ka kay san kayni, nisi ma di lawta kalamu.

⁶ Festus may li buur jarsi suw glafandi hiɗi doogoɗi, bugolda nam kalay hay Sesariya. Hay buurta ka'ta, hay li ma nam mus kay zlamda-kitata, nam vul hagata kay nisi ma mar Paulus ay goyo.

⁷ Hay li ma san kayni kalay goy kalla, sa Yudiyana sa may Yerusalem pana ŋuyum gaa cusl', nisi pi law ma ŋulona dak-dak kalamu, law ma nisi kaw fum cawam goyɗi.

⁸ Wulini Paulus di kay sem lawta valam ala: Nan may li suluk noŋ ne' kat gatta vi sa Yudiyanɗi, kat Tempellaɗi, kat Cesarɗi kaw.

⁹ May Festus dar kay ɗek tuwam goy ŋaa'a vok sa Yudiyana, nam hot dita tam Paulus ala: Naŋ min tuɗ kulo Yerusalem kay nan ma ka kitata vaŋis ɗawni su?

¹⁰ Paulus di'e: Nan colay zawn vok liyn ma kitana vi Cesar, nala kitata van ka ɗawn hay liy namna kaw. Nan may li va ma joo'o tam sa Yudiyan noŋ ne'ɗi, ki naŋ kay tuwaŋ kaw wum goy ŋaa ŋolo nala.

¹¹ La joota van ka'a, la nan li va mara ma nagay kay mitta, nan may hulot tuwan goy vun mittaɗi; may lawta ta nisi pa' kanta la va ma gasi may haya'ɗi, sa ma as vulan goy hay ɓisi mayɗi. Nan ka raw kitata vanu vok Cesar.

¹² Hay li ma Festus law hiɗi sa ɗiger-lawta goy valam lawna, nam hot dita ala: Naŋ raw kitata vaŋawa vok Cesar, naŋ ma tuɗ vok Cesar kaw.

Paulus vok Agripa

¹³ Bugol buur ca, mulla Agripa hiɗi Bernike co hay Sesariya kay gi deɓ mi Festus.

¹⁴ Ki nisi musay ɗawni ir buur ŋolo, Festus vi labara vi Paulus mi mulla di'e: Feliks hin sa ays daŋgay kep,

¹⁵ sa namna hay li ma nan ay hay Yerusalem, muliyan ŋulo sa-ɗifinna hiɗi sa maariyana vi sa Yudiyana yi kalamu, job kaw ala gum daŋgaya.

¹⁶ Nan hotsi dit ala: Kuɗ dita vi sa Romena, vul san goy tam mitta kayni, nisi ma fi tuwsi vun kitata hiɗi sa ma pi lawt kalamna, say nam vi sem lawta valam goy tuwa.

¹⁷ Nisi co tani, nan cub va loɗi, hay buurta ka'ta nan mus kay zlamda-kitata, vul hagata kay nisi mar san kayn aya.

¹⁸ Sa pi lawt kalamna coy kulo lak kaw, may nisi fi lawta joota kalamu ki nan varay naɗi;

¹⁹ may kay nisi ci wayt hiɗi namu kuɗ hagata vi tapta visiya, ci way kaw kay sa kep yum Yesu, ma mitiya, may Paulus di kalam ala nam ka iriya.

²⁰ May nanu, nan fi va kay di kuɗ lawta kayniɗi, nan jobomu la nam min tuɗ Yerusalem kay kitata valamu ma kaays ɗawni.

²¹ May Paulus jok kitat voko, kay lawta valam ma liys ŋomay hay gaŋeraŋa vi Cesar, nan vul hagata kay nisi ma ŋomomu ta-ta nan gum tam Cesar.

²² Agripa di tam Festus: Nan kaw min kay hum san kayni. Nam hot dita: grawta naŋ ma humumu.

²³ Hay buurta ka'ta, Agripa hiɗi Bernike co hiɗi sum sa ŋulon kuɗsiya, cuk kalaf hay ziyda ta kitana hiɗi komandaŋayna hiɗi sum sa ŋulona vi hoyok-ziyna. Kuɗ dita vi Festus, nisi mar Paulus kalafi.

²⁴ Festus di'e: Mulla Agripa, hiɗi sum sa dakay tan kaf hiɗi numa'a kaw, ɗuwgi san zawni, ma vokŋa vi sa Yudiyan kaf, la hay Yerusalem, la tani kaw, mar lawta kalam tanu, hiɗi siwelda kuɗum ŋolo ala nam fi mus iriɗi.

²⁵ kan nanu, nan wi goy haraŋ ala nam li va ma joo'o ma nagay kay mittaɗi, may nam kay tuwam job kay kitata valam ma jok vok Cesar, van kayni ɗuw kiran ŋaa'a kay gum tam Cesar kaw.

²⁶ Va ma nan ma ɗom mi Cesar goy haraŋ nala kay lawta valamu may kiranɗi, kuɗ na'ta nan maramawa vokgiya, suw pet vokaŋ naŋ mulla Agripa, kay bugol job ma nay ma jobomna, nan ma fi va kay ɗo'o kla.

²⁷ Kay gi sa ma daŋgayna voko bay ɗo lawta ta kalamta goyo ni, kayni ɗuw kiran gulu.