LOPNA 15 - BIBALDA TA PELDETTA

Dak ma ŋolla ma hay Yerusalem

¹ Sum sara'a may hay Yudiya pa, nisi hat ɓosiyayna disi ala: La nigi may ka gosaya kuɗ data vi Mususɗi, nigi as fi su'daɗi.

² Law ta ŋolda fok kulo jarsiya, Paulus hiɗi Barnabas ci wayt hiɗi nisiya, bugol kayni sumuna col varta ala Paulus hiɗi Barnabas hiɗi sumuna visi sara lay, ma tuɗ hay Yerusalem tam sa Apostolayna hiɗi sa maariyana, kay ɗuw caw lawta kayni.

³ Sa tapna tunsi dirsi hay hagata, nisi jik hay Fenisiya hiɗi Samariya, nisi di goy kay mu'da vi dik sa waana, nisi muɗ ɓosiyosina kaf firi ŋolo.

⁴ Hay li ma nisi co hay Yerusalem, sa tapna, sa apostolayna hiɗi sa maariyana kaw visi ŋaa'a, nisi vi labara kay slena ŋulo ma Lawn lumay hiɗi nisina.

⁵ May sum sara sa hay vokŋa vi sa Farisena sa viyna kaw, yaw kulo'o di ala: La linigekaw sa waana nigi kaasi gosaya, gatsi kay hum kuɗ gatta vi Musus kaw.

⁶ Sa Apostolayna hiɗi sa maariyana tok tuwsiya kay fek caw lawta kayni.

⁷ Hay li ma nisi ci wayta ŋol cina, Peter fokay kulo'o ka disi ala: ɓosiyonna, nigi wi'e: Hay jew ɓa-ɓata, Lawna li vilekka jargiya, kay hay vunanu sa waana fi hum yoboyna vi labara ma firina, nisi as vi kaw.

⁸ Lawna nam ma wi dikga, li di-goytawa tisiya, hay li ma nam vulsi Ŋusta-Peldetta ŋray ca ki nay nala.

⁹ Nam may li ɓurawta jaray hiɗi nisiɗi, kay nam lisi diksiyawa goy peldete hiɗi vida.

¹⁰ Nigi nem Lawna wulini, hay li ma nigi tun jukŋa ma sumiyaya hiɗi nay kaw as ziyimɗina kel sa hatayna kayn kay mige?

¹¹ May nay vi'e, nay suɗawa kaw, kuɗ slugota vi Bum-Sumuna Yesu, ŋray ca ki nisi nala kaw.

¹² Sumun kaf zan ɦim', nisi lakay kay hum labara ma Paulus hiɗi Barnabas ka visita kay ɗekka hiɗi gul-yalda kaf ma Lawna lum hiɗi nisiya jar sa waana.

¹³ Hay li ma nisi ba vunsi bana, Yakub sli lawtiya di ala:

¹⁴ Nigi ɓosiyonna, humangi hawtige! Simon vi labar ala ir litige hay sem ma jewna Lawna tuɗ tam sa waana, kay vilek jaf ma vuli goyo hay semda valamu.

¹⁵ Kay yoboyna vi sa jobta-Lawna ŋray hiɗi kayni, ki ɗoy nala:

¹⁶ Bugol kayni nan ma hotiya, nan ma in guɗukŋa vi David ma ɦo gaana kulo'o, nan ma in ɦota valam ma gaa kurɓucukŋa kulo'o. Nan ma colom kulo'o,

¹⁷ Kay caw sumuna ma hinina ma gar Bum-Sumuna, jaf-sumuna kaf sa semda van ka yiy jarsina kaw,

¹⁸ Din mi Bum-Sumuna, Ma li slen ma san wumu hay vatɗita pa.

¹⁹ Hay na'ta nan col lawta ala, nay ma mar nekka kay sa waana sa muɗ irsi tam Lawnɗi,

²⁰ may nay ma ɗo tisiya kay nisi ma tel tuwsi kay liwista vi lawayn ma waana, kay zlata-bulota, kay slen ma muruɗiyna, hiɗi busuwna kaw.

²¹ Kay hay jafna ma kalay ɓa-ɓana, hay hoyok-ziyna kaf sum sa kus Mususna ka'a, kay nisi ka jaŋam goyo hay sinagogayna hay sabatna kafe.

²² Nala van kayni li ŋaa'a kir sa Apostolayna hiɗi sa maariyana, hiɗi sa tapna kaf kaw, kay vilek sara goy jarsiya, kay cuksi hay Antiokiya hiɗi Paulus hiɗi Barnabas, nisi vilek Yudas ma gileta valam Barsabas hiɗi Silas, sumuna sa ɓosiyosin tiysi sesiya.

²³ Nisi vulsi ɗerwelda ta ɗota haya' ɗoy ki kayn nala: Ɓosiyogina, sa Apostolayna hiɗi sa maariyana tam ɓosiyomana sa jar sa waana sa hay Antiokiya, sa hay Siriya hiɗi sa hay Kilikiya, gi-deɓta tigiya!

²⁴ Numa humi ala sum sara ays jarma pa, sa numa'a vulsi hagatis noŋɗi, nisi ɦiwirgi kulo hiɗi ɓakŋa visiya, ta-ta muɗ ciwta vigi yora.

²⁵ Nala, bugolda hay li ma varta vuma'a col zaw, van kayni ɗuw kirma ŋaa'a, kay vilek sumuna, cuksis hiɗi sa hayma kisina, Barnabas hiɗi Paulus,

²⁶ Nisi sa vul irita visi goyo, kay sem Bum-Sumuna vaya Yesu Kristu.

²⁷ Numa cuk Yudas hiɗi Silas ays tigiya, nisi ma di yoboyn namna kayni goy tigiya hiɗi vunsiya.

²⁸ Kay van kayni ɗuw ŋaa'a kir Ŋusta-Peldetta, kirma numa'a kaw, a tun slen ma nekŋa kigiya kayni may ŋaaɗi:

²⁹ Kayn ala, nigi ma tel tuwgiya kay sliwna ma liy goy ɗifin mi lawayn ma waana, kay busuwna, kay muuriyana ma muruɗiyna, kay zlata-bulota kaw; nigi ma li ŋaa'a hay li ma nigi ŋom tuwgiya kay kayni. Lakgi ŋaa'a!

³⁰ Sum nisina hinsiya, kal hay Antiokiya, nisi vul ɗerwelda mi vokŋa ma dakayna.

³¹ Hay li ma nisi jaŋ ɗerwelda goy jaŋŋa, nisi li firi ŋolo kuɗ teŋ-irta kayni.

³² Yudas hiɗi Silas, nisi ay sa jobta-Lawna kaw, nisi vul teŋ-irta tam ɓosiyosina, vulsi donota hay ɓakŋa ŋolo ŋolo kaw.

³³ Hay li ma nisi musi hiɗi nisiya ir liyn neeɗa, ɓosiyosina gisi cawsi goy hiɗi sle'ta, kay hot tam sa cuksi ay sunna.

³⁴ May Silas ɗuw kiram ŋaa'a kay hina.

³⁵ Paulus hiɗi Barnabas lakay hay Antiokiya, hiɗi sum sara ŋolo kaw, nisi ka hata, kus labara ma firina vi yoboyna Bum-Sumuna kaw.

Rogoyta ta ma'ta hay lopna vi sunda Paulus hiɗi Silas hay Asiya ta goota

³⁶ Buur neeɗa bugolda, Paulus di tam Barnabas ala: Hotay hay hoyok-ziyna ma nay kus yoboyna vi Bum-sumuni hayna pet, kay ɗuw ɓosiyayna la nisi ka lakay laktige kla.

³⁷ Barnabas min vi Yohana ma gileta valam Markus kuɗsiya;

³⁸ May Paulus ɗuw kayni, sa ma hinsi ay goyo hay Pamfiliya pana, nam min ala tapam kuɗsiɗi, kay nam min tap kuɗsi hay lopna visiɗi.

³⁹ Ci-wayta fokay kulo jarsi ŋolo, ta-ta nisi ɓuraw goyo. Barnabas vi Markus kuɗumu, nisi kal hay Kiprus.

⁴⁰ May Paulus vilek Silas, bugol ɓosiyomna vulum goy tam slugota vi Bum-Sumuna vulla, nam kal may.

⁴¹ Nam raw hay Siriya hiɗi Kilikiya, nam vul donota mi sa ziyna-Lawna kaw.