LOPNA 11 - BIBALDA TA PELDETTA

Peter ka ɗek caw poyta valamu goy vok sa viyna sa hay Yerusalem

¹ Sa Apostolayna hiɗi ɓosiyosina sa ka hay Yudiya hum ala sa waana kaw vi yoboyna vi Lawna.

² Hay li ma Peter kalay Yerusalem, sa kaay-gosayna ka lawam ɦiy ala:

³ Naŋ kalay kalaf vi sa bay ka-gosayna, naŋ ti hiɗi nisiya kaw kayn litige?

⁴ Nala Peter tun caw lawsi hay dita ta luma'da ala:

⁵ Nan ay hay hoyok-ziyna vi Yoppe, van vul tuwam kiranu hay li ma nan ay siɗawa, van siray gaa'a ki va ma ŋol ma wura ɦiriw-ɦiriw' ma keŋem fiɗi ay juniya, siray gaa dukalawna pa, co ta-ta gaa tanu.

⁶ Hay li ma nan ka ɗuwum ŋali ŋali, nan wi muuriyana ma gayam fiɗi fiɗina, muuriyan ma fulla, sle ma ɦarmatna hiɗi layayn ma dukalawna.

⁷ Nan hum della ma ka dan ala: Fokaŋ kulo'o Peter, ŋatamu, taŋga;

⁸ may nan di'e: A'a, Bum-Sumuna, kay va ma liwisi lebo ma joo'o, nan bay kalam hay vunan tuwa.

⁹ Hay sem ma'ta del may kulo wuralawna pa ka di ala: va ma Lawna di goy kalam ala nam bay liwisi, naŋ ma ɗuwum ki va ma liwisi naɗi.

¹⁰ Slen kayni li sem hiɗi, bugolda nam yaways kulo'o hay dukalawna kaf.

¹¹ Ɗuw na kayni, sumuna ɦidi sa cukiyay sun hay Sesariya pa, ka lakay vun-galana vi ziyna ma numa ay hayna.

¹² Ŋusta danu kay nan ma tuɗ kuɗsiya bay giriŋi, ɓosiyayn sa karkiyan lakŋi guma cawma ta-ta numa cuk hay ziyna vi Korneliyus.

¹³ Nam vuma labara nanige nam wi sunda-wuralawna ma col vokomu dum ala: Gaŋ sun hay Yoppe, gar Simon ma gileta valam Peter,

¹⁴ nam ma kus yoboyna taŋu, yoboyna ma naŋ ma fi su'da haya, naŋ hiɗi ziyna vaŋ kafe.

¹⁵ Hay li ma nan sli lawtiya, Ŋusta-Peldetta jikay gaa kisiya, ki nam li hiɗi naya hay tun cawta nala kaw.

¹⁶ Nala human gan kay yoboyna vi Bum-Sumuna ma nam di ala: Yohana li baptisma hiɗi niyna, may nigiya, nigi ma fi baptisma hiɗi Ŋusta-Peldetta.

¹⁷ La Lawna vulsi vulda ki nam vulaya hay li ma nay vi kuɗ Bum-Sumuna Yesu Kristu nala, nan mi gige a nan as col dono kir Lawna?

¹⁸ Hay li ma nisi hum kayni, diksi tun gaa'a, nisi subur Lawna di'e: Lawna vul hagatawa kaw mi sa waana, a nisi ma hama kay nisi ma fi su'da.

Barnabas hiɗi Saulus hay Antiokiya

¹⁹ Nisi sa lasta nig kisiya mersi goyo kaw bugol mitta vi Stefanus kalay ta-ta hay Fenisiya, hay Kiprus, hay Antiokiya kaw, nisi kus yoboyna tam sa maraɗi, may tam sa Yudiyana tuta.

²⁰ May jarsiya sum sara sa hay Kiprus hiɗi Sirene, sa co'ay hay Antiokiya pa, nisi kus yoboyna tam sa Grekŋa, disi goyo kay labara ma firina vi Bum-Sumuna Yesu.

²¹ Ɓam Bum-Sumuna ay hiɗi nisiya, sumuna ŋolo vi'e, muɗi tam Bum-Sumuna kaw.

²² Labara kayni co hay humda vi sa ekklesiyana hay Yerusalem, nala nisi gi Barnabas ta-ta hay Antiokiya.

²³ Hay li ma nam co ɗawni, nam wi slugota vi Lawna, nam firiya, nam vulsi teŋ-irta, kay nisi ma lak hiɗi diksi juni dono tam Bum-sumuna.

²⁴ Kay nam ay mi sa ma ŋaana, ma hobay hiɗi Ŋusta-Peldetta, hiɗi vida kaw, vokŋa ma ŋolla tapay kuɗ Bum-Sumuna.

²⁵ Barnabas ay hay Tarsus kay gar Saulus;

²⁶ hay li ma nam fumay fina, nam maram hay Antiokiya, nisi ka lak hay ŋra-vunda vi sa tapna, nisi hat tokŋa ma ŋolla kaw ir busa kenem', sa hatayna sumun muɗ yisi ala sa fi Kristuna hay sem ma jewna kayni hay Antiokiya.

²⁷ Hay buur namna kayni, sa jobta-Lawna may Yerusalem pa, kal gaa Antiokiya.

²⁸ Sa kep jarsiya ma semda valam ala Agabus, nam fok kulo'o, ɗek goy hay Ŋusta ala mayta ŋolda ma li kay nagat kuɗulu', may na'ta li kayni hay liyna vi Klawdiyus.

²⁹ Sa hatayna ŋra vunsiya, gigekaw kuɗ asta valamu valamu, kay vul slena tam ɓosiyosina sa hay Yudiya.

³⁰ Nisi li ki kayni nala, nisi jokom tam sa maariyana hay ɓam Barnabas hiɗi Saulus.