LOPNA 10 - BIBALDA TA PELDETTA

Hamda vi Korneliyus

¹ San ay kep hay Sesariya selem Korneliyus, nam mi mul ma sojen kalam kisna hay vok-ma-duura ma yum ala vok-ma-duura ma Italiyana.

² Nam mi sa sa ma ŋaa'a ŋolo ma li nar kuɗ Lawna hiɗi ziyna valam kaf. Nam vul slen ŋolo mi sumuna, siɗaw Lawna dok-dok kaw.

³ Hay leer ma zleeŋena, nam wi sunda-wuralawna ma ɗek tuwam goy kiram haraŋ, ma co talamu, dum ala: Korneliyus!

⁴ Nam cuk iram kalamu, may hobay hiɗi narta, nam ka dum ala: Mayɗin mige, Bum-Sumuna? Sunda-wuralawna di talam ala: siɗawta vaŋu, vulda vaŋu coowa kulo vok Lawna, kay humam ka gum kalamu.

⁵ Wulini naŋ ma cuk sumuna hay Yoppe, kay mar sa mara kep yum Simon, ma gileta valamu Peter;

⁶ nam ka musi vo vi sa mara kep yum Simon, ma lumut bakŋa, ma ziyna valam ka gal deŋel niy-lum ŋolla.

⁷ Hay li ma sunda-wuralawna ma law hiɗi namna kalay kalla, Korneliyus yi sum ma' jar sa li lop vokomna, hiɗi sojena ma ŋaana kep kaw jar nisi sa tapay hiɗi nam ŋaana;

⁸ Hay li ma nam visi labara kayni kaf, nam cuksi hay Yoppe.

⁹ Hay buurta ka'ta, hay tu'da visi hay hagata, hay li ma nisi co goboy tam hoyok-ziyna, Peter jik kulo kay yam-ziyda, goboy hiɗi leer ma karkiyana, kay siɗawa.

¹⁰ Mayta cumu, nam min ti'e. Hay liyn ma nisi ka kotom tina, slen vul tuwam kiramu.

¹¹ nam wi dukalawn goy maliya, nam wi va wura ŋol zim-zim' ma keŋem fiɗi pet ka juniya, siray gaa kay nagata;

¹² muur ma gayam fiɗi fiɗina hiɗi sle ma ɦarmatna kaf hiɗi layayna ma dukalawna kaf ay hayam kuɗulu'.

¹³ Della di talam ala: Fokaŋ kulo'o, Peter, ŋatamu, tumu.

¹⁴ Peter di ala: A'a Bum-Sumuna! Kay nan bay ti va ma liwisi hiɗi joo'o tuwa.

¹⁵ Hay semda ma'ta del ka di talam lo ala: Va ma Lawna muɗum goy ŋaa'a cet-cet' naŋ as ɗuwum ki nam liwisi nala loɗi.

¹⁶ Va ma ŋol ma wura zim-zimna co ta-ta sem ɦidi, bugol kayni nam pat huwat', kalay dukalawna.

¹⁷ Hay li ma Peter ka muɗi ɦuyum' kay va ma vul tuwam kiramna kayni ɗek mige ni, ɗuw na kayni, sum sa Korneliyus cuksiyaysna nisi job kay ziyna vi Simon, nisi lak hay vun-galana:

¹⁸ Nisi yi'e job kaw ala kayni mi ziyna ma Simon ma gileta valam Peter ka buur hayn su?

¹⁹ Hay li ma Peter ka fek caw va ma vul tuwam kiramna, Ŋusta ka di talam ala: Sumun ɦidi ka garaŋu;

²⁰ Fokaŋ kulo'o, jikaŋ gaa'a, tuɗaŋ hiɗi nisi bay giriŋi, kay cuksiyays kayni mi nanu.

²¹ Peter jikay gaa'a, di tam sumun ala: Ɗuwgiya, nan zawni, nigi garanti kayni mi nanɗi su? Va ma nigi garan kalamna mi mige?

²² Nisi hotom dit ala: Korneliyus mul ma sojen kalam kisna, sa ma ɗigera ma li nar kuɗ Lawna kaw, ma jaf-sum sa Yudiyan kaf li di-goyta kalam ŋaa'a, sunda-wuralawna ma peldetna vul tuwam kiramu kay nam ma naraŋis hay ziyna valamu kay hum yoboyna vaŋu.

²³ Nam yawsi vo'o, vulsi liy ma buura kaw, hay buurta ka'ta nam fokay kulo'o, kal hiɗi nisiya. Sum sara kep kep jar ɓosiyom sa hay Yoppe tapay kuɗumu kaw.

²⁴ Nisi co hay buurta ka'ta hay Sesariya, Korneliyus yi sumiyamu hiɗi boniyomna aya, nam ka musi zamsiya.

²⁵ Hay li ma Peter kal kalafi, Korneliyus ma kay ŋafam iramu, nig gaa vok gayamu, girifimu kaw.

²⁶ May Peter vum kulo'o, ka dum ala: Fokaŋ kulo'o, kay nan kaw mi sana.

²⁷ Hay li ma Peter ka kus yoboyna hiɗi Korneliyus, nam kal vo'o, fi sumun dakay ɦir'.

²⁸ Nam disiya: Nigi wi ala telda ka kay Yudiyana kay tap ɦidi sa ma waana lebo kal vo valamu, may Lawna ɗekan kay nan ma di kay sa mara ala nam liwisi lebo joo'oɗi.

²⁹ Kay na'ta hay li ma nigi cuk sumunis kanu kay garaniya, nan tapay kuɗsiya bay lawta. Wulin kayn nan jobgiya, nigi gi suni kanu kay mige?

³⁰ Korneliyus sli ditiya di'e: Buur wulini liy fiɗi, nan ka siɗaw hay ziyna vanu hay leer ma zleeŋena, san cuki hiɗi sligar ma haɓ tal-tal', colay vokanu, di ala:

³¹ Korneliyus, siɗawta vaŋu Lawna huma'awa, humam gumawa kay vulda vaŋu kaw.

³² Gaŋ sun hay Yoppe, kay Simon ma gileta valam Peter, nam ka hay ziyna vi Simon ma lumut bakŋa, deŋel niy-lum ma ŋolla.

³³ Kay na'ta nan cuk sumunis taŋ gosoyo kay garaŋiya, naŋ ma kayni, naŋ li ŋaa'a ŋolo. Wulin kayni numa dakawa kaf vok Lawna tani, kay hum caw sle ma Bum-Sumuna vulaŋ hagatawa kay dumu.

³⁴ Peter sli ditiya di'e: Nan digi gasita, nan hum lawt kaynawa, kay Lawna may ka ir saɗi.

³⁵ May hay jafna kaf sa ma li nar kuɗumu, li ɗigerta kaw, nam kiram ŋaa'a.

³⁶ Nam gi yoboyna tam gurona vi Israyel, hay li ma nam kus labara ma firina vi toyta hay Yesu Kristu, kayni mi nam Bum-Sumuna vi sumun kafe.

³⁷ Nigi wi slena ma co hay Yudiya kaf, hay li ma nam tun cawamay hay Galileya pana, bugol baptisma ma Yohana kusumisna.

³⁸ Ir nanige Lawna ɦok Ŋusta-Peldetta hiɗi donota kay Yesu ma Nasaretna, ma poy hay liyna liyna, li ŋaata hiɗi yerta-goyta tam nisi kaf sa ay gaa kuɗ lasta vi Matna; kay Lawna ay hiɗi namu.

³⁹ Numa kayni sa wi slen kaf ma nam lum hay nagata vi Yudiyana, hay Yerusalem kaw. Nisi cum goyo hay li ma nisi ɓalam kulo kat guna.

⁴⁰ Lawna dayam kulo'o hay buur ta ɦidita, vulum a nam ma ɗek tuwam goyo.

⁴¹ May kir sumun petɗi, may tam sa di-goyna sa vilekay jewe kay Lawna, tuma numa sa ti'e ci'e kaw hiɗi namu, bugol dayta-kulota valamu jar sa mitina.

⁴² Yesu vulma hagata kay kus tam sumuna, kay di goy kalamu kaw ala Lawna tunum kay tuwam ma ɗeŋŋa ki sa ma ka kitata vi sa irina hiɗi sa mitina nala.

⁴³ Sa jobta-Lawna kaf li di-goyta kalam ala, gigekaw ma vi hay namu, nam fi gida vi sulukŋa hay semda valamu.

⁴⁴ Hay li ma Peter ka di yoboyna kayni tuwa, Ŋusta-Peldetta jikay gaa kay sa ka dakay hum yoboyna.

⁴⁵ Sa viyna sa kaay gosayna sa may hiɗi Peter muɗi ɦuyum' kay vulda vi Ŋusta-Peldetta ɦokay goy kay sa waana.

⁴⁶ Kay nisi humsi di hay vun ma wuliya, subur Lawna kaw.

⁴⁷ Wulini Peter sli dita di'e: Sa as a tel niyna vi Baptismana goy kay nisi sa fi Ŋusta-Peldetta ŋray ca ki nay nalana lo su?

⁴⁸ Nam vul hagata kay nisi ma fi baptisma hay semda vi Yesu Kristu. Nisi jobomu kay nam ma mus hiɗi nisi ir buur neeɗa.