KAL-GOYTA 9 - BIBALDA TA PELDETTA

Bakmarana ma sem vaslna: Moyna vi farayna

¹ Ma-Vatɗina di tam Musus: Tuɗaŋ kat Farawn, naŋ ma dum ala: Ma-Vatɗina Lawna vi sa Hebrena di ala: Hin sumuna valam kal goyo, kay nisi ma sunumu.

² La naŋ min hinsi kal goyɗi, la naŋ telsiyawa lo,

³ humaŋu, nan min meɗ ɓan goyo kay farayna ma vona: Kulumayna, kurona, lamgana, luwayna hiɗi fukunayna kaw, nam cani mitta ma li jaram ŋolo.

⁴ Ma-Vatɗina ma poŋ ir farayna vi sum sa Israyella goy valamu hiɗi sum sa Egiptena, nala jar farayna vi sa Israyella, kep kaw ma mit noŋɗi,

⁵ Ma-Vatɗin col buura, nam di'e: Jifini nan ma li van kayni hay nagata.

⁶ Hay buurta ka'ta Lawn li van kayni. Farayna vi sum sa Egipten kaf mit goyo; jar farayna vi sa Israyella, kep kaw mit noŋɗi.

⁷ Farawn job labara kay va ma lina na kayni, jar farayna vi sa Israyella kep kaw may mit noŋɗi. May dik Farawn so'otay vokom suwa, nam min hin sumun kal goy noŋɗi.

Bakmarana ma sem karkiyana: moy-goɗoŋŋa

⁸ Ma-Vatɗina di tam Musus hiɗi Aaron: Nigi ma hob ɓigi hiɗi butuw-kuna ma hay giwinna, Musus ma wasam kulo dukalawna, goy vok ir Farawn haraŋi.

⁹ Nam ma muɗ goy butuwu, butuw namna ma ɓo yam nagat Egipte kafe; sum sa Egipten kaf, hiɗi farayna visi noŋ kaf tuwsi ma cuk digi' digi', tuwsi ma cuki namna vunam ma jaŋ goy luwa'a.

¹⁰ Nisi yaw butuw-kuna ma hay giwinna, nisi kalay vok Farawn; Musus was butuw-kun kulo dukalawna, sumuna hiɗi farayn kaf tuwsi cuki digi' digi' tuwsi ma cuki namna vunam jaŋ goy luwa'a.

¹¹ Sum sa li liskinna may as co vok Farawn loɗi kay tuwsi ma cukina, kay nisi kaw tuwsi cuki ki sum segen sa Egipten nala lay.

¹² Ma-Vatɗina so'ot dik Farawn, nam min hum dita vi Musus hiɗi Aaronɗi, kuɗ ki Ma-Vatɗina di tam Musus hiɗi Aaron nala.

Bakmara ma sem siɗiyana: mogoyna

¹³ Ma-Vatɗina di tam Musus: Fokaŋ kulo graw culum culum', tuɗaŋ kat Farawn, naŋ ma dum ala: Ma-Vatɗina Lawna vi sa Hebrena ka daŋ ala: Naŋ ma hin sumuna van kal goyo, kay nisi ma sunanu.

¹⁴ Kay kuɗ ta vaydit kayni, nan min gi bakmarana van kuɗ batam kaf kataŋ naŋu, kat sa sunda vaŋu hiɗi sumuna vaŋ kaf, kay naŋ ma wi ala hay nagat noŋ kaf sa ma ŋray hiɗi nan mayɗi.

¹⁵ La nan meɗ ɓan meɗi goy kaŋu la nan wataŋ wati hiɗi mitta ni, naŋ hiɗi sumuna vaŋ kaf vati goy hay nagat noŋ kirɓicik',

¹⁶ may nan hinaŋ iri kayni, kay naŋ ma wi donota vanu, kay sumun ma tiyan sen gaa kay nagat noŋ kuɗulu.

¹⁷ La naŋ fok kulo kat sumuna van lo, la naŋ min hinsi kal goyɗi,

¹⁸ fatta ta jifinta ɗawni, nan min hin niyn si'e hay li ma liyn ki wulin tan nala, mogoyn ma yak ŋolo; hay li ma Egipte tun gaan pa ta-ta vaydi, mogoy ma ki kayn nala bay yak tuwa.

¹⁹ Farayna vaŋu hiɗi sle ma sinena kaf naŋ ma ŋayam goyo. Mogoyn ma yak kay sumuna hiɗi farayn kaf ma ka goy hay sinen tuwa, ma bay co vo tuwana kaf ma mit goyo.

²⁰ Sa sunda vi Farawn sa li nar kuɗ dita vi Lawna kaliya, sum sa sunsina hiɗi farayna visi kaf nisi yawsiyay vo'o.

²¹ May nisi sa hum kuɗ dita vi Ma-Vatɗinɗina hin sa sunda visiya hiɗi farayna visi goy hay sinena.

²² Ma-Vatɗina di tam Musus: naŋ ma meɗ ɓaŋ kulo dukalawna: Hin mogoyn yak gaa'a kay sumuna, kay muuriyana kay hadafna ma hay sinena ma hay nagat Egipte noŋ kafe.

²³ Musus meɗ zugulda valam kulo dukalawna; Ma-Vatɗin hin niyn bay ŋolo, hin mogoyn yak ŋolo kaw, kut ka poy gaa kay yam nagata. Ma-Vatɗin hin mogoyn si gaa'a kay nagata Egipte.

²⁴ Mogoyn yak gaa ŋolo, kut ka rigasay jaramu; hay li ma nagat Egipte tun gaan pa, mogoyn ki kayn nala bay yak tuwa.

²⁵ Hay nagat Egipte kaf mogoyn yak kay sle ma hay sinena, tun caway tam sumun pa ta-ta tam muuriyana; mogoyn yak kay hadaf ma hay sinena, gu ma hay sinena nam ɦawam goy noŋ cetet'.

²⁶ Mogoyn may yakɗi kayni hay nagat Gosen ta gurona vi Israyel ka hayta tuta.

²⁷ Farawn yi Musus hiɗi Aaron aya, nam ka disi ala: Kuɗ ta wulinta kayni, nan li sulukawa. Ɗiger kayn mi Ma-Vatɗin kepe, nanu hiɗi sumuna vanu, numa li joo'o.

²⁸ Siɗawgi Lawna kay niy-ma-bayna hiɗi mogoyna ma vat goyo; nala nan ma hingi kal goyo, sa ma as telgi may loɗi.

²⁹ Musus dumu: Hay li ma nan kalawa goy bugol hoyok-ziyna, nan ma meɗ ɓan kulo'o kat Ma-Vatɗina, nala niy-ma-bayna ma vata, mogoyn ma yak loɗi kaw, kay naŋ ma wi ala nagata na' vi Ma-Vatɗina.

³⁰ May nan wi ala naŋu hiɗi sa sunda vaŋu, nigi ma li nar kuɗ Ma-Vatɗin tuwaɗi,

³¹ barawna hiɗi orgena ay ɓulakiya, kay orgen ay busuki goyo hay na'ta, barawna kaw ka ɓo'o;

³² wa-alkamarena hiɗi doŋoloŋŋa may ɓulakɗi, kay nam can li goy bugolo.

³³ Musus fokay hay ziyna vi Farawn pa kay tuɗ goy gine'e hiɗi hoyok-ziyna; nam meɗ ɓalam kulo'o kat Ma-Vatɗina, niy-ma-bayna hiɗi mogoyna vatiya, niyn min si gaa hay nagat loɗi.

³⁴ Hay li ma Farawn wiyawa ala niyn may si loɗi, mogoyna hiɗi niy-ma-bayna kaw vatawa nam so'ot vokomu kay li suluku, nam so'ot dikamu, namu hiɗi sa sunda valam kafe.

³⁵ Dik Farawn so'ot suwa, nam min hin gurona vi Israyel kal goyɗi, kayn ki va ma Ma-Vatɗin di'e hay vun Musus nala.