KAL-GOYTA 8 - BIBALDA TA PELDETTA

¹ Ma-Vatɗina di tam Musus ala: Nam ma di tam Aaron, hiɗi zugulda nam ma meɗ ɓalam goy kay niy-lumna, niy ma riŋ-goyna, niy ma hay ɦoora kaw, nam ma hin luura meray goy kay nagata Egipte.

² Aaron meɗ ɓalam goyo kay niy ma Egiptena; luura meray goyo, nam hob yam nagat Egipte.

³ May sum sa li liskinna li ɗekka ki kayn nala kaw, nisi kaw mar luura kulo hay nagat Egipte.

⁴ Farawn yi Musus hiɗi Aaron aya, nam disiya: Siɗawgi Lawna, kay nam ma digiɗ luur goy gine hiɗi nanu, hiɗi sumuna van kaw; nan ma hin sumun kal goyo, kay nisi ma tuɗ li ɗifin tam Ma-Vatɗina.

⁵ Musus di tam Farawn: Naŋ mi ma ŋolla vanu, naŋ as kay ɗekan tige, wulin kayn nan as siɗaw Lawn kaŋu, kay sa sunda vaŋu, kay sumuna vaŋ lay, kay nam ma digiɗ luur goy gine hiɗi naŋu hiɗi ziyna vaŋ ɗawn citige? Kay hin ɗawni mi luur ma goloŋ hay niy-lumna tuta.

⁶ Farawn hot dit ala: Jifini. Nala Musus dumu: Van ma li'e ki kayn nala, kay naŋ ma wi ala Ma-Vatɗina Lawna vuma'a sa ma ŋray hiɗi nam mayɗi.

⁷ Luura ma vi tuwam goy gine hiɗi naŋu hiɗi ziyna vaŋu, hiɗi sumuna vaŋu, hiɗi sa sunda vaŋ kaw; hin ɗawn mi ma goloŋ hay niy-lumna tuta.

⁸ Musus hiɗi Aaron cukay goyo hay ziyna vi Farawn. Musus siɗaw tam Ma-Vatɗina kay luura ma nam wat Farawn hiɗi namna.

⁹ Ma-Vatɗina li kuɗ va ma Musus jobomtina; nala luur ma vo hay ziyn cim goyo, ma hay wur-daŋŋa hiɗi ma hay sinen kaw cim goyo may.

¹⁰ Sumun molom kulo yam tuwam bara'a, nala nagat muɗ his vidik'.

¹¹ Hay li ma Farawn wi ala liyn tunawa gaa neeɗa, nam so'ot dikamu, nam min hum kuɗ Musus hiɗi Aaron loɗi, ki Ma-Vatɗin di nala.

Bakmarana ma sem ɦidina: ɦurutna

¹² Ma-Vatɗina di tam Musus: Naŋ ma di tam Aaron ala, nam ma meɗ zugulda valam goyo, to butuw ma gaa kay nagatna, nam ma muɗ goy jemna hay nagat Egipte kafe.

¹³ Nisi li ki kayn nala, Aaron meɗ ɓalam goyo hiɗi zugulda valamu, nam to butuw ma gaa kay nagatna; nam muɗ goy jeme, nam cuk tam sumuna hiɗi farayn kafe. Butuw ma gaa kay nagatn kaf muɗ goy tenɗe'e, hay nagat Egipte noŋ kafe.

¹⁴ Sum sa li gul-yalda li yalda visiya kay mar jemna may nisi as noŋɗi. Jemna cuk tam sumuna, tam farayna kaw.

¹⁵ Sum sa li liskinna di tam Farawn: Kayn ti donota vi Lawna. Dik Farawn muɗ ɗeŋe, nam min hum kuɗ Musus hiɗi Aaronɗi, ki Ma-Vatɗina di nala.

Bakmara ma sem fiɗina: zlibna

¹⁶ Ma-Vatɗina di tam Musus: Fokaŋ kulo graw culum', tuɗaŋ vok Farawn, nam ma kalay goyo kay tuɗ goy kel niyna. Naŋ ma dum ala: Ma-Vatɗin danay ala naŋ hin sumuna valam kal goyo kay nisi tuɗ sunumu.

¹⁷ La naŋ hin sumuna valam kal goyɗi, nan min hin zlibna kay co kaŋ siya, kay ka siy mi sa sunda vaŋu, mi sumuna vaŋu hiɗi sa hay ziyna vaŋ noŋ kafe; ziyna vi sum sa Egipten kaf ma hob hiɗi zlibna, zlibna ma hob yam nagat noŋ kaf.

¹⁸ May hay buur namna ɗawni, nagat Gosen ta sumuna van ka haya'ta nan ma poŋa ira' goyo, zlibna ma li ɗawnɗi, kay naŋ ma wi ala nan Ma-Vatɗina nan ka li lop hay nagat tani.

¹⁹ Nan min poŋ ir sumuna vanu goy hiɗi sumuna vaŋu. Jifini ɗek na'ta ma li'e.

²⁰ Ma-Vatɗina li ki kayn nala. Zlibna co ŋolo hay ziyna vi Farawn hiɗi sa sunda valamu, nagat Egipte noŋ kaf zlibna ɓulaka' goyo.

²¹ Farawn yi Musus hiɗi Aaron nam disiya: Tuɗgi ligi ɗifin mi Lawna vigiya hay nagat tani.

²² Musus hot dumu: May ŋaa'a kay li naɗi. Kay ɗifin ma numa lum tam Ma-Vatɗin Lawna vuman ɗawni, nam kir sum sa Egipten bisi, la ɗifin ma kirsi bisna numa lumawa goy kirsi haraŋi ni, nisi ɗawn ma cuma goyo hiɗi goorhoyona ɗisu?

²³ Numa min tuɗ ir buur ɦidi hay fulda, ɗawni numa min li ɗifin tam Ma-Vatɗina Lawna vuma'a, kuɗ ki nam min di tuma'a nala.

²⁴ Farawn di'e: Nan min hingi kala, kay nigi ma li ɗifini hay fulda, tam Ma-Vatɗina, Lawna vigiya. May nigi ma tuɗ goy gine'e kay kalɗi. Siɗawgi kanu.

²⁵ Musus hot dumu: Nan min kal goy hay ziyna vaŋu, nan ma siɗaw Lawna, jifin ɗawni, zlibna ma pat goy tam ziyna vaŋu, tam sa sunda vaŋu, tam sumuna vaŋ kaf kaw. May naŋ ma ɗutma loɗi, naŋ ma tel tu'da vuma loɗi, kay numa min tuɗ li ɗifin tam Ma-Vatɗina.

²⁶ Musus kalay goy hay ziyna vi Farawn pa, nam siɗaw Lawna.

²⁷ Lawn li kuɗ va ma Musus jobom kalamna; zlibna patay goy gine'e hiɗi Farawn hiɗi sa sunda valamu, hiɗi sumuna valam noŋ kaf, kep kaw may hin noŋɗi.

²⁸ May hay na'ta lo Farawn so'ot dikamu, nam min hin sumun kayni kal goyɗi.