KAL-GOYTA 7 - BIBALDA TA PELDETTA

¹ Ma-Vatɗina di tam Musus: Humaŋu, nan muɗaŋawa mi Lawna vi Farawn; ɓasuŋŋa Aaron ma li mi sa ma jobta vaŋu may.

² Naŋ ma di goyo kay sle ma nan daŋgin kafe, ɓasuŋŋa Aaron ma law tam Farawn, kay nam ma hin gurona vi Israyel kal goyo hay nagata valam pa.

³ May nan ma so'ot dik Farawn, nan ma li ɗekka hiɗi gul-yalda ŋolo hay nagat Egipte.

⁴ Farawn ma humgi noŋɗi, nan ma bas ɓan gaa kay Egipte, may vokŋa vanu, sumuna vanu sa gurona vi Israyel nan ma kalsiyay goyo hay Egipte hiɗi kitata ŋolda.

⁵ Hay li ma nan meɗ ɓanawa goy kay sum sa Egiptena, hay li ma nan yaw gurona vi Israyellawa ay goy jarsi pana, hay na'ta nisi ma wi ala nanu mi Ma-Vatɗina.

⁶ Musus hiɗi Aaron hum kuɗ vun Ma-Vatɗina, nisi li ki kayn nala.

⁷ Hay li ma nisi ka kus yoboy hiɗi Farawn kayni, Musus busata valam coy dok-glafandi, Aaron busata valam coy dok-glafandi yam-ɦidi may.

⁸ Ma-Vatɗina di tam Musus hiɗi Aaron ala:

⁹ La Farawn digiyawa ala ligi gul-yalda ni, naŋ ma di tam Aaron ala nam ma sli zugulda valamu, nam ma ga' gaa vok Farawn, na' ma muɗ goy guya.

¹⁰ Musus hiɗi Aaron kalay kat Farawn, nisi li kuɗ va ma Lawn disitna. Aaron gi zugulda valam gaa vok Farawn hiɗi sa sunda valamu, na' muɗ goy guya.

¹¹ May Farawn yi sa yalla hiɗi sa li ɗekka; hiɗi sa li liskinna hay Egipte, nisi kaw, nisi li ɗekka visi ki kayn nala lay.

¹² Zugulay ma hay ɓisina nisi cukum gaa kafe, nam muɗ goy guya. Zugulda vi Aaron lig zugulayna visiya.

¹³ Farawn dikam muɗi ɗeŋe, nam min hum kuɗ Musus hiɗi Aaronɗi, ki Ma-Vatɗin di nala.

Bakmara ma jewna, niyn muɗ goy busuwu

¹⁴ Ma-Vatɗina di tam Musus, wulin kayni Farawn dikam so'otiya; nam min hin sumun kal goyɗi,

¹⁵ naŋ ma tuɗ kat Farawn grawn culum culum', nam ma kalay goyo kay tuɗ kel niy-lumna, naŋ ma co talam kel niy-lumna. Zugulda ta muɗ goy guyta naŋ ma ma sla' hay ɓaŋu,

¹⁶ naŋ ma di tam Farawn ala: Ma-Vatɗin Lawna vi sa Hebrena ganay kataŋu, kay nan ma daŋ ala: Naŋ ma hin sumuna valam kal goyo, kay nisi ma sunum goy hay fulda. May ta-ta vaydi naŋ min humɗin kay mige?

¹⁷ Kay na'ta Ma-Vatɗina di ala: Nan min ɗekaŋ va'a kay naŋ ma wi ala nan mi Ma-Vatɗina. Nan min ci niy-lumna hiɗi zugulda ta hay ɓanta kayni; niy-lumna ma muɗ goy busuwu.

¹⁸ Kuluf ma goloŋ hay niy-lumna ma cim goy kafe, niy-lumna ma buw ɦuruk', sum sa Egipten ma gar kay ci niy namna may nisi ma asɗi.

¹⁹ Ma-Vatɗina di tam Musus: Naŋ ma di tam Aaron ala: Nam ma sli zugulda valam hay ɓalamu, nam ma meɗ ɓalam goy kay niyna vi sa Egiptena noŋ kafe: Ɓam niy-lumna, niy ma riŋ-goyna, niy-goloŋŋa hiɗi niy ma hay ɦoora kafe. Nam ma muɗ goy busuwu; busuwna ma li hay nagat Egipte kafe, hay doway-firi ma ceɗay hiɗi guna, hay doway-firi ma kotay hiɗi hiɗiyna kaw.

²⁰ Musus hiɗi Aaron li kuɗ va ma Lawn disitna. Aaron sli zugulda kulo'o, nam ci niy-lumna vok ir Farawn hiɗi sa sunda valam pet, nala niy-lumna muɗi goy busuwu.

²¹ Kuluf ma goloŋ hay niy-lumna cim goy kafe, niy-lumna muɗ his buwi ɦuruk', sum sa Egiptena as a ci niy namna loɗi, hay nagat Egipte noŋ kaf busuwn ka'a.

²² May sum sa li liskinna hay Egipte li ɗekka visi ki kayn nala kaw. Dik Farawn so'ota, nam min hum dita vi Musus hiɗi Aaronɗi, ki Ma-Vatɗina di nala.

²³ Farawn hotiya, kalay hay ziyna valamu, slen kayni nam min tun varta valam kalam noŋɗi.

²⁴ Sum sa Egipten kaf vurok kaara visi goy kel niy-lumna, kay fi niy ma cina; kay nisi may as a ci niy-lumnaɗi.

²⁵ Hay li ma Lawn muɗ niyn-lumna goy busuwn kayni, buurta laawa siɗiya.

Bakmara ma sem ma'na: Luura

²⁶ Ma-Vatɗina di tam Musus: Tuɗaŋ tam Farawn, naŋ ma dumu: Ma-Vatɗin di ay ala naŋ hin sumuna valam kal goyo, kay nisi ma sunumu.

²⁷ La naŋ min hinsi kalɗi, nan min hin luura ŋuy yam nagata vaŋ noŋ kafe

²⁸ Niy-lumna ma esl luura; nam ma meray goy siɗak-ɗak', nam ma cuk kalaf hay ziyna, hay ziy ma buura, nam ma cuk hay ziyna vaŋ ma buura, kulo kay yam gilikŋa vaŋu, hay ziyna vi sa sunda vaŋu hiɗi sumuna vaŋ kafe, nam ma cuk hay giwinna, cuk hay doway ma yi funa kaw.

²⁹ Luura ma ɦal kulo kaŋu, ɓe kulo kay sumuna vaŋu, nam ma hal kulo kay sa sunda vaŋ kaf kaw.