KAL-GOYTA 5 - BIBALDA TA PELDETTA

Musus hiɗi Aaron ka vok mul ma Egiptena

¹ Bugol kayni Musus hiɗi Aaron kalay kat Farawn, nisi dumu: Humaŋu: Ma-Vatɗina Lawna vi Israyel di ala: Hinaŋ sumuna van kal goyo, kay nisi ma li yuldeta kay suburan senu hay fulda.

² Farawn hot di'e: Ma-Vatɗina nam gige ma nan hum kuɗumu kay hin sa Israyel kal goyo? Nan may wi Ma-Vatɗin noŋɗi, sum sa Israyella nan as hinsi kal goy noŋɗi.

³ Nisi di'e: Lawna vi sum sa Hebren vul tuwam kirma'a, naŋ ma vulma hagata kay numa ma tuɗ hay fulda ir buur ɦidi kay li ɗifin tam Ma-Vatɗina, kay nam ma hin moy ma joona hiɗi kew-gaferaŋa co kuma'ɗi.

⁴ Mul ma Egipten di tisiya: Musus hiɗi Aaron: Nigi muɗ sumun joo kat lopn kayn kay mige? Tuɗgi ligit mi lopna.

Farawn vul hagata kay tun lop ma nekŋa kay sumuna

⁵ Farawn di'e: Sumun kayni biyawa hay nagat ŋolo. Nigi min kayn ala nisi tun suksi kay lopna su?

⁶ Hay buur namna de, Farawn vul hagata mi sa kuɗsi ŋomsi hay lopna hiɗi sa tuni kisi ŋulona ala:

⁷ Sumun kayni nigi ma marsi hosona ma kir nagana ki nigi ka li jew naɗi, hinsi tuɗ goyo kay gar hoson kay tuwsiya.

⁸ Nigi ma tun direŋgel ma nisi cumna kisi ki jew nala dok-doko, nigi ma yaw goy kuɗumɗi; kay nisi kayni si sum sa poyo, kuɗ na'ta kayni nisi ka winek ala: Tuɗay lay ɗifin tam Lawna vaya.

⁹ Sum nisin kayni nay tunsi lopn kisi ŋolo, hinsi lum mi lopna, nala nisi ma tun ŋalda visi kay law ma sinna loɗi.

¹⁰ Sa kuɗsi ŋomsina hiɗi sa tuni kisi ŋulona co'o disiya: Farawn di ala numa ma vulgi hoson loɗi;

¹¹ tuɗgi kay tuwgiya, gargi hosona, hay liyn kaf ma nigi ma fumna, ma lop ma nigi ka lumna sa as muɗum hefteŋɗi.

¹² Sumun kayni meray goy hay nagat Egipte noŋ kafe, kay gar zamakŋa may hoson ɦawaɗi.

¹³ Sa kuɗsi ŋomsin ka gossiya, ka disi ala: Vatgi vun lopna vigi ma hay buurta kafe ki jew ma hoson ka'ana nala.

¹⁴ Sum sa tuni kisi ŋulon kaw, sa Farawn tunsi kuɗsi ŋomsin watsiya, kay nisi disi ala lop ma kamatna hiɗi ma vaydina nigi may vatam vunam ki jew naɗi kay mige? Direŋgel ma ŋaɓam kigina nigi may cum kafɗi kay mige?

¹⁵ Sum sa tuni ŋulo jar gurona vi Israyel kalay tiy tuwsi tam Farawn, nisi dumu: Naŋ las sa sunda vaŋ nala kay mige?

¹⁶ Wulin kayn sa may vulma hoso loɗi, may nisi ka duma ala: Cigi direŋgella, lo wulin kayn nisi ka watma'a, ki numa li law ma joo nala.

¹⁷ Farawn hot disiya: Nigi lakŋ si sum sa poyo, nigi si sum sa poyo! Kuɗ kayni nigi ka di ala: Tuɗay lay ɗifin mi Lawna.

¹⁸ Tuɗgi Ligit mi lopna; sa as vulgi hoson noŋɗi, nigi as ci direŋgel ki jew nala dok-doko.

¹⁹ Sa tuni ŋulo kay gurona vi Israyella wi ala nisi kalawa hay lasta ŋolda, kay mulla disi ala, direŋgel ma nisi cumna as hot kiɗayɗi; Buur tarige kaw lopna va' ka'a ka'a.

²⁰ Hay li ma nisi cukay goyo hay ziyna vi Farawn, nisi ŋaf hiɗi Musus hiɗi Aaron, kay nisi ka cubsiya.

²¹ Nisi di tam Musus hiɗi Aaron: Ma-Vatɗin cuk iram kirgi cuku', nam ka kitat kigi ka'. Nigi muɗmaawa bisi kir Farawn hiɗi sa sunda valamu, nigi vulsi kew-gaferaŋawa hay ɓisiya kay vatma goyo.

²² Musus hot tam Ma-Vatɗina, nam di'e: Bum-Sumuna, naŋ li joo tam sumun kayni kay mige? Naŋ ganay tisiya kay mige?

²³ Hay li ma nan co tam Farawn kay lawam hiɗi semda vaŋ kayni, nam ka li joo'o mi sumuna vaŋu, naŋ min but sumuna vaŋ goyɗi.