KAL-GOYTA 21 - BIBALDA TA PELDETTA

Gatta kay lawta vi sum sa gorvona

¹ Kayni mi gatta ma naŋ ma ɗek kirsiya:

² La naŋ gus sa ma Hebren gorvo'o, nam ma laŋ lop ir busat karkiya; may hay busata siɗiyata, naŋ hinim kal goy butiya, wurak vaɗi.

³ La nam co hay ziyna vaŋ kayn valam kepe, nam ma kal goy valam kepe kaw; la ca ka kuɗumu, cat ma kal goy kuɗum lay.

⁴ La vulum cat kayn mi mulamna, la nam vuɗ guro sa jufayna hiɗi guro sa boyna hiɗi na'a kaw, guro nisin hin mi mulamna, nam ma kal goy valam kepe.

⁵ La gorvon daawa ala: Nan min mulanna hiɗi cata vanu hiɗi gurona vanu, nan min kal goy butiɗi ni,

⁶ nala mulamna maram vokanu, nam maram kulo goboy tam vun-ziyna lebo tam nagan ma ini kulona, nala mulamna ma com humam hiɗi ɗilla, gorvon namna ma mus dok-dok mi sunda vi mulamna.

⁷ La san gus goota valam goy gorvo'o, na' as kal goy bugolda, ki sum sa gorvon ka li naɗi.

⁸ La mula' namna gusa' kayni kay la' ca'a, may la na' muɗawa kiram bisi ni, nam hin bu' hot gusa' malamu. May hagat may kalam kay gusa' goy vokom tam sa ma pulɗi, kay nam miyesa'a.

⁹ La nam min vula' mi goora valamu, nam ma li ta'a ki sumun ka li tam guro-boy sa yawsin nala kaw.

¹⁰ La nam sli cat tara'awa, na' ta jewta nam as ra' goyɗi: Vula' tin lay, vula' sligar lay, bur ta' lay.

¹¹ La slen ma ɦidin cani nam may lum taɗi, hina' kal goyo bay wurak va'a, vul gurjuɗi kaw.

¹² La sa ci sa'a nam cap mita, kitata valam ti ci goyt lay.

¹³ La nam may varay kay cum goyɗi, hinim vun ɓalam kayn mi Lawn kay tuwamu ni, nan min kot liyna ma nam as tuɗ ŋay goy hayamna.

¹⁴ May la san li hiɗi dikga joota kat sugolomna, la nam li miletawa talamu kay cum goyo, la sa namna ŋay tam giwin-ma-ɗifinna van kaw, naŋ ma vumay goy bas' kay cum goyo.

¹⁵ Sa ma to bulumu lebo sulumu, kitata valam kayn ti cita-goyta.

¹⁶ Sa ma kul sa'a, cap gusum goyo lebo ŋomom hay ɓalamu kaw, sa namna kitata valamu ti cita-goyta.

¹⁷ Sa ma ŋul bulumu lebo sulumu, kitata valam ti cita-goyta.

¹⁸ La sumun ka nef tuwsiya, la kepna ci henawa hiɗi hiɗiya lebo hiɗi kutopoŋo, sa namna may mitɗi, may burawa gaa moyo,

¹⁹ sa ma cumna kita may kalamɗi; la nam fokawa kulo'o, muɗawa tuɗ goy jiy hiɗi zugulla valamu ni. Sa ma cumna ma wurak gal lopna valam ma nam bamna, nam as kotom tuwamu ta-ta nam muɗ goy ŋaa'a.

²⁰ La san ci gorvona valamawa hiɗi zugulla, gorvo namna la jufu kla, ca'a kla capawa mit vun ɓalamu ni, sa namna kitat ka kalamu.

²¹ May la nam mitɗi, jar buur ma kepna lebo ma'n lakŋi, mulamna as fi kitat loɗi, kay kayni ti gurjuta valamu.

²² La sumun ka li tuwsi ɦiya la nisi tupa tam cata hayta, na' cap puk goy bay va mara la'a ni, kitata visi kayn ala juf cat as tunsi wurak kisiya, nisi as wurakam goy vok sum sa kitana.

²³ May la va ma joo li'e, naŋ ma wurak irita kay irita.

²⁴ Ira kay ira, siya kay siya, ɓamta kay ɓamta, gayta kay gayta.

²⁵ Ŋal ma hiɗi kuna kay ŋal ma hiɗi kuna, milla kay milla, pat tuwna kay pat tuwna.

²⁶ La san ci sa ma gorvona valamawa kiramu, la jufu lebo ca'a kaw, la iram patawa goyo, nam hinim goy butiya, kay wurakŋa vi iramu.

²⁷ La nam to siy gorvona valamawa goyo, la jufu lebo ca'a kaw, nam as butum goyo, kay wurakŋa vi siyamu.

²⁸ La put dab sa'a lebo dab ca'a hiɗi miyokomu la san capawa mita, put namna gum hiɗi goorhoyona, sa as mutum sliwamɗi, mul putna sa as tun kita kalamɗi.

²⁹ May la put namna ka dab sumun jewe, sumun ka di mulamna, may mulamna min ŋomomɗi ni, la nam ci sa'awa lebo ci ca'awa, put namna gum hiɗi goorhoyona, mulamna kitata valamu ti cita-goyta.

³⁰ La nisi tun wurakŋawa kay mulamna ala nam muɗ tuwamu ni, wurak ma tunum kalam kafna nam ma vulum goyo.

³¹ La putn dab goor ma vuɗina lebo goota ta vuɗita, gatta ma li'e ki dit di nala,

³² may la putn jikim kayn mi sa ma gorvo'o, la mi jufu lebo ca'a kaw, mul putna as vul gurjuta ir sikel dok-ɦidi mi mul gorvona; put namna gum hiɗi goorhoyona may.

³³ La san hin vun kaat goy maliya, lebo san jugoɗ kaata, may nam may duka' vuna'ɗi, la putu lebo kuro'o nigawa gaa'a hay kaat na'ta,

³⁴ sa ma jugoɗ kaat na'ta as wurak va namna goy mi mulamna hiɗi gurju'u, va ma mitin nam ma slum may.

³⁵ La put vi sa'a dab put vi sa hena hiɗi miyokomu, la nam capawa mita, put ma irin nisi gusum goyo, ɓuraw gurju ta kalamta jarsiya; ma mitin kaw nisi as ɓurawam jarsi lay.

³⁶ May la sumun ka wi ala put namna ka dab jewe, may mulamna may ŋomomɗi, mulamna as wurak put goy baŋalamu, put ma mitin nam as slum may.

Lawta kay kulda vi farayna

³⁷ La san kul putna lebo goor ɦu-dimina, la nam ŋatam ŋatiya lebo gusum gusi goyo kaw, nam ma wurak luway goy vasl baŋal putna, guro fok-dimin fiɗi hay baŋal goor ɦu-dimina.