KAL-GOYTA 11 - BIBALDA TA PELDETTA

Mitta vi guro sa vuɗi jewna

¹ Ma-Vatɗina di tam Musus: Nan min hin bakmara ma ŋolla co'o kay Farawn hiɗi nagat Egipte noŋ kafe, bugol kayni nam ma hingi kal goyo hay nagat tani, hay li ma nam hingi kal goy ɗawni, digiɗgi goy ɗawn mi nam kay tuwam noŋo.

² Naŋ ma di tam sumuna: Daŋ tam jufayna hiɗi boyn kaw kay nisi ma di tam sum sa ziysi katsina kay vulsi doway ma yori hiɗi doorona, ma yori hiɗi ora kaw.

³ Ma-Vatɗina kal dikga ŋaata hay sum sa Egiptena, nisi tun caw li slugot mi sa Israyella, Musus kaw sum sa Egiptena hiɗi sa sunda vi Farawn, hiɗi sumun kaf ka slum yalam kulo ŋolo.

⁴ Musus di'e: Ma-Vatɗin di ala hay henjet-daŋalta nam ka jik hay nagat Egipte.

⁵ Guro sa vuɗi jewna hay nagat Egipte kaf ma mita; tun caw tam goora vi Farawn ma vuɗi jewna ma yaw vocota valamna pa, ta-ta tam goor ma vuɗi jewna vi gorvota ta lut wana, ta-ta tam farayna ma vuɗi jewna kaf.

⁶ Hay nagat Egipte tiyn ma li ŋolo, tiy ma ki kayn nala bay li jew tuwa, vok kaw mayɗi.

⁷ May jar gurona vi Israyel kaf, tun caway tam sumun pa ta-ta tam farayna; diyn kaw ma buw vunam kulo ɓislek noŋɗi, kay nigi ma wi ala nanige Ma-Vatɗina nam poŋ ir sum sa Egipten goy hiɗi sum sa Israyella.

⁸ Ki kayn nala sa sunda vaŋ kaf lakŋi ma co katanu, ma girif gaa vokanu, nisi ma di ala: Kalaŋ goyo, naŋ hiɗi sum sa juni kuɗaŋŋa kaf. Bugol kayni Musus ma kal goyo may. Bugol kayni Musus kal goy hay ziyna vi Farawn, hobay hiɗi ɦiyd ŋolo.

⁹ Ma-Vatɗina di tam Musus: Farawn ma humgi noŋɗi, kayn kay ɗekka vanu ma li ŋolo hay nagat Egipte.

¹⁰ Musus hiɗi Aaron li ɗekka na'ta vok ir Farawn kafe, Ma-Vatɗina so'ot dik Farawn, nam min hin gurona vi Israyel kal goy hay nagata valam noŋɗi.