KAL-GOYTA 10 - BIBALDA TA PELDETTA

Bakmarana ma sem glafandina: Baar-jerena

¹ Ma-Vatɗina di tam Musus ala: Tuɗaŋ kat Farawn, kay nam hiɗi sa sunda valam kaf nan so'otsi diksiyawa, kay nan min li ɗekka van goy jarsiya.

² Kayni kay naŋ ma vi labara mi goora vaŋu hiɗi goor-ŋolona vaŋu kay slen ma nan lum tam sum sa Egiptena, kay ir ɗekka ma nan lum jarsina, nala nigi ma wi ala nanu mi Ma-Vatɗina.

³ Musus hiɗi Aaron tuɗi kat Farawn, nisi dumu: Ma-Vatɗin Lawna vi sa Hebrena ka di ala: Naŋ ma mus bay hot yaŋ gaa kuɗan ki kayn nala ta-ta lancitige? Hinaŋ sumuna van kal goyo, kay nisi ma sunanu.

⁴ La naŋ min hin sumuna van kal goyɗi, humaŋu, jifini nan min hin baar-jerena hay nagata vaŋ noŋ kafe.

⁵ Nam ma hob yam nagata, yam-nagat ma gaana sa muɗ wum loɗi; dir sle ma hin goy kuɗ mogoyna nam ma tum goyo, guna vigi ma hay sinena nam ma tum goy kafe.

⁶ Nam ma hob hay ziyna vaŋu, ziyna vi sa sunda vaŋu hiɗi sa Egipten kafe. Hay li ma sumiyaŋ-ŋolo hiɗi sumiyaŋ vuɗ gaa kay nagatna pa, ta-ta buur ma vaydina, van ki kayn nala nisi bay wum tuwa. Bugol kayni Musus vi tuwam goy vok ir Farawn.

⁷ Sa sunda vi Farawn dumu: San kayni nay hinim mar joot kaya ki kayn nala ta-ta lancitige? Hinaŋ sum nisin tuɗa kay sun Ma-Vatɗina Lawna visiya. Naŋ may wi ala Egipte ka ɓulak kayn ɓulakiya ɗisu?

⁸ Nisi hot mar Musus hiɗi Aaron vok Farawn. Farawn di tisi ala: Tuɗgi sungi Ma-Vatɗin Lawna vigiya. Ma tuɗ ɗawni si sarige?

⁹ Musus hot dumu: Numa hiɗi gurona vuma'a sa jufayna hiɗi sa boyna hiɗi sa maariyana vuma'a, hiɗi fukunayna vuma'a hiɗi luwayna vuma'a min tuɗ kafe; kay kayni ti yuldeta vuma'a kay subur Ma-Vatɗina.

¹⁰ Farawn di tisiya: Ma-Vatɗin li hiɗi nigiya, nan ma hingi pat hiɗi gurona vigi noŋ kaf yo ɗisu? May ligi ŋali, joot ka vokgiya!

¹¹ A'a; nigi jufayn tuɗgiya, tuɗgi sungi Ma-Vatɗina, kay kayni mi va ma nigi job kalamna. Nisi digiɗsi goy vok ir Farawn.

¹² Ma-Vatɗina di tam Musus: Meɗaŋ ɓaŋ goyo kay nagat Egipte, hin baara jikay kulo'o hay nagat Egipte, hinim ti usna hay nagat kaf, us ma hin kuɗ mogoyna.

¹³ Musus meɗ zugulda valam goyo kay nagat Egipte; Ma-Vatɗina hin simeɗ ma may gal kuɗuw pana biw kay nagat Egipte, nam busa biw he' bur biw talal'. Hay li ma liyn foowa goyo, simeɗ ma kuɗuwna mar baarawa.

¹⁴ Baara dusay goy kay nagat Egipte, nam mol gaa'a kay yam nagat Egipte noŋ kafe. Baar namna suwi ŋol ku'u, jew kaw sa bay wi baar ki kayn nala, vok kaw sa as wi baar ma ki kayn naaɗi.

¹⁵ Nam bar yam nagat noŋ kaf, nagat muɗi goy jufun noŋo; nam ti us ma hay nagatna, nam ti vuɗna vi gun goy kafe, slen ma hin kuɗ mogoyna nam tum goy kafe; goɗna vi usna hiɗi guna mara ne' kaw may hin hay nagat Egipte noŋɗi.

¹⁶ Wulini wulini Farawn yi Musus hiɗi Aaron, nam disiya: Nan li sulukawa kat Ma-Vatɗina Lawna vigiya, katgi nigi kaw.

¹⁷ Kuɗ ta vaydit kayni nigi vulan gida tage kay sulukŋa vanu; siɗawgi Ma-Vatɗina Lawna vigiya, kay bakmarana namna ma vat sumun kayni, nam ma digiɗim goy gine hiɗi nanu.

¹⁸ Musus kal goyo hay ziyna vi Farawn pa, nam siɗaw Ma-Vatɗina.

¹⁹ Ma-Vatɗina hin simeɗna may gal vulati pa nam biw dono, simeɗna sli baara tuɗ kom goy goloŋ hay niy-lum ma slawna; baar kep kaw may hin hay nagata Egipte noŋɗi.

²⁰ Ma-Vatɗina so'ot dik Farawn, nam min hin gurona vi Israyel kal goy noŋɗi.

²¹ Ma-Vatɗina di tam Musus: Meɗaŋ ɓaŋ kulo dukalawna, hin jufunda ta nilta co kay nagat Egipte.

²² Musus meɗ ɓalam kulo dukalawna, jufunda-ŋolda zim gaa hay nagat Egipte noŋ kafe, ta-ta ir buur ɦidi.

²³ Sa may as a wi ir niramɗi lay, sa as jok diram goy hay liyn ma musta valamɗi lay ta-ta ir buur ɦidi. May liyn ma gurona vi Israyel ka lakay hayna haraŋa ka'a.

²⁴ Farawn yi Musus, nam dumu: Tuɗgi sungi Ma-Vatɗina. Fukunayna vigiya hiɗi luwayna vigiya ma hin mi namu tuta. Gurona vigi hayɗin as tuɗ misi kuɗgiya.

²⁵ Musus hot dumu: La nala naŋ kay tuwaŋ vulma sle ma numa tuɗ li ɗifini hiɗi ɗifin ma ŋal-goyna ma numa as tuɗ li ɗifin tam Ma-Vatɗina Lawna vuma'a hiɗi namna.

²⁶ Numa as tuɗ hiɗi farayna vuma kuɗma'a, la mi tirek ɦu kaw as hin gaaɗi, kay numa tuɗ li ɗifin tam Ma-Vatɗina Lawna vuma ɗawn hiɗi farayna; ta-ta numa co ɗawni, va ma numa as vilekem goyo kay li ɗifin hiɗi namu tam Lawna numa may wumɗi.

²⁷ Ma-Vatɗina so'ot dik Farawn, Farawn min hinsi kal loɗi.

²⁸ Farawn di tam Musus. Kalaŋ goy hay ziyna vanu, buur mara nan waŋ vok iran tan noŋɗi, kay hay buur ma naŋ vul tuwaŋawa vok iran tani na, naŋ ma fi mitta.

²⁹ Musus di'e: Ki naŋ di nala, nan as co vok iraŋ tan loɗi.