JOWEL 1 - BIBALDA TA PELDETTA

Baara ka ti nagata, yita kay hamda

¹ Ma-Vatɗina di yoboyn tam Jowel, goora vi Petuwel ala:

² Humgi dit kayni nigi sa maariyana, jakgi humgiya, nigi sum sa hay nagat kafna, law ta ki kayn nala li kir sumaygi ka li su? Lebo li kirgi nigi ka li su?

³ Nigi ma vi labar namna mi gurona vigiya, gurona vigi ma vi labar namna tam guro-misina. guro-misina ma vi labar namna tam jafsi voksi ɗaw.

⁴ Wa ma hin kuɗ bar ɓok-ɓokona, baar-jeren tumawa, wa ma hin kuɗ baar-jerena, girim-girim tumawa, wa ma hin kuɗ girim-girimna, baar-bobon tumawa.

⁵ Zliygi kulo'o, nigi sum sa hiwiri kay dolayna, tiygiya. Kay vuɗ gulda-guldana ma li vin ma jibetna hiɗi namna, nigi ma fum loɗi.

⁶ Kay sum sa dono'o coyawa, nisi mok nagata vanawa, nisi dono ŋolo, sa as ŋaɓsiɗi, siysi ki siy zlon nala, Gaŋsi ki gaŋ zlo-tancat nala.

⁷ Nisi ɓulak sinena van ma gulda-guldanawa; gu-gumna vanu nisi kaam iramawa goy ne; ne', hom ɓulokomawa goyo, kaamawa goy gaa'a, hum gulda-guldana ɓoy goy haɓi.

⁸ Yorgi tuwgiya, ki goot-cat ta darayta cuk sligar-bolla ta'a, kay tiy bana' na ma min sla' wulin nala.

⁹ Slen ma vulda hiɗi slen ma yamam goy tam Lawna may ma hay ziyna valam loɗi; muliyan-sa-ɗifinna sa sun Ma-Vatɗina, nisi ka hay godoora.

¹⁰ Sle ma hay sinen tiy goy kafe, yam nagat hini goy ɦawa'a kay alkamaren vati goy kafe. vin ma jibetna may loɗi, mula soy goyo.

¹¹ Sum sa zum sinena sutaysi toya, sa pi gulda-guldana ka yor kay fu-alkamarena, hiɗi fu-orgena, kay sa fi a feɗ va hay sinen loɗi.

¹² Gulda-guldan soy goyo, gu-gumna humam liwekiya, gu-grenadinna, gu-gomona, gu-pomiyena, hiɗi gu ma hay sinen kaf humam soy goyo. Firit ta jar sumuna sleɗay goy kafe.

¹³ Nigi muliyan-sa-ɗifinna, jungi furgiya, tiygiya, Yorgi tuwgiya, nigi sa li lop kulo kay giwin-ma-ɗifinna, nigiyaya cukgi sligar-bolla tigiya kay ti do'olla, burgi gaa hiɗi namu, nigi sa sunda vi Lawna vanu. Kay vulda hiɗi niyn ma yamam goy vok Ma-Vatɗina may hay ziyna valam loɗi yo!

¹⁴ Yigi tuwgi noŋ kaf, ligi laata, tokgi sum sa maariyana, sum sa hay nagat noŋ kaf, toksi hay ziyna vi Ma-Vatɗina Lawna vigiya, tiygi tam Ma-Vatɗina.

¹⁵ Hih! Buurta ta ɦuyumda kuɗa'ta ka co goboyo. Co ɗawn ti buurta vi Ma-Vatɗina. Nam ma co'o ki ma gaŋeraŋ-petna ɓulak slen goy nala.

¹⁶ Tina nay may fum loɗinge. Firita hiɗi ciriy ma digi-digina may hay ziyna vi Ma-Vatɗin loɗinge.

¹⁷ Jaf ma cuki hay sinen soy goyo, feera hini goy ɦawa'a zaŋ ma lak wana hini goy ɦawa'a, kay alkamaren soy goyo.

¹⁸ Ɗuwgi farayn ka tiy tige? Farana vi luwayn goyo muɗi bisi, kay hatna may loɗi, fukunayna kaw ka ci lasta.

¹⁹ Nan siwel zawn taŋ naŋu, Ma-Vatɗina, kay kut ŋal liyn ma beɗna hay fuldawa, kay sin-kuta ŋal gu ma hay sinenawa goy kafe.

²⁰ Muuriyan ma hay sinen kaw ka siwel taŋu; kay niyn-ɓatna soy goyo. Liyn ma beɗna hay fulda kut ŋalamawa goyo.