JOB 9 - BIBALDA TA PELDETTA

Hot-dita vi Job tam Bildad

¹ Job hot dita:

² Gasi wete, nan wi ala slen ka ki kayn nala; san as li ɗigere vok Lawna ir nanige?

³ La san min ci way hiɗi namu, jar jobta birim kep kaw ta nam hot dit kuɗa' kep tayɗi.

⁴ Tam namu yalla hiɗi gaŋeraŋ ma suw petna, sa ma as col digamu bay fi kitata mi gige?

⁵ Lawn jok hiɗiyn goyo bay nam wi'e, nam tom gaa'a hay ɦiyda valamu,

⁶ nam geɗ nagata hay so'ola' ma ma gaan pa, dolla va'a geɗiya.

⁷ Nam law tam fatta, fatta may vul tuwa' goyɗi; nam kuluɓ yam mislek ma dukalawn.

⁸ Valam kep, nam meɗ dukalawn goyo, nam tuɗ kulo'o kay ɓalla vi niy-lumna.

⁹ Nam kot dahaŋalla hiɗi bajaara hiɗi zilimna, hiɗi mislek ŋulo ma gal kayamna.

¹⁰ Nam li sle ma ŋulona ma sa fekemɗina, sle ma ŋaana ma ŋaɓta valam mayɗina.

¹¹ Wulini nam ka jik goboy hiɗi nanu, may iran may wumɗi, nam kala, nan may wumɗi.

¹² Va ma nam slumna sa ma hot hulotomi kalamu mi gige? Sa ma as dum ala naŋ lum mige mi gige?

¹³ Lawn may yaw ɦiyda valam goyɗi, sum sa subur tuwsiya hiɗi va ma nisi gah' talamna, hot yisi gaa kuɗumu.

¹⁴ May nanu, nan ma hotom dit hottige? Nan ma dumti mi law mige?

¹⁵ Hay li ma nan ka ɗigere, nan as hotom ditɗi, nan as job slugota vi sa ma kaan kitatna.

¹⁶ La nan yi'e nam hot dita, nan var ala nam jak humam tam delanuɗi,

¹⁷ nam ma ŋuyanawa ki hiɗi ɓalla nala, ma ka jor milla vanu bay lawta,

¹⁸ ma min hinan gi sukan goyɗi, kay nam hobanawa hiɗi galakka.

¹⁹ La nan min durumu, nam dono suwan nanu. La vun kitata, sa ma naran vuna' ɗawni mi gige?

²⁰ La nan ɗigere, vunan as ka kitat kanu, la nan gasiya, vunan muɗan joo'o.

²¹ La nan gasiya, nan kay tuwan may wiɗi, irita van muɗi kiran bisi.

²² Hen ɗawn meloge? Kuɗ na'ta nan di'e: Nam ci sa ma ɗigera, ci sa ma joon kaw.

²³ La ŋaat kayni bakmaran maran mitta kan gosoy marge. May nam cen kuɗ wakka vi sum sa li jooɗina.

²⁴ Nagata hini goy hay ɓam sum sa joona, nam ŋay ir sum sa ka kitata goyo. La kayni may mi namɗi, sa hena mi gige lo?

²⁵ Buura vanu ka kal gosoyo suw sa ma jaŋŋa. Nam ka jaŋ koloyo bay iram cuk kir ŋaata;

²⁶ nam ka riŋa ki lumda ta cerewna nala. Ki bakŋa ma sir gaa kay ŋumna nala.

²⁷ La nan di'e: yan min jok tiyta vanu, hin yorta vanu, kot li tuwan kursuliya,

²⁸ nan muɗi nari kay zumalda van kafe, nan wi ala naŋ ma ɗuwan ki sa ma bay li joo naɗi.

²⁹ joot muɗ ɗawn van nanu. Makan goy ɦawa nala kay mige?

³⁰ La nan muz hay niy ma kilira, la nan muz ɓan goy hiɗi sabunna,

³¹ naŋ ɗawn ma sluɓan gaa hay zulla lo, sligara van ma muɗ liwis kiranu.

³² Nam may mi sa'a ki nan naɗi, kay a nan hotom dita, kay numa tuɗ kuɗ tuwma'a vun kitata.

³³ Sa ma poŋ ir lawt jarma mayɗi, ma as tun ɓalam kuma ma' pete.

³⁴ Hinim sli zugulla valam goy kan ɗawge, hin ɦiyda ŋolda valamu zliŋan goy loɗi;

³⁵ nala nan ma lawa, nan ma li nar loɗi. La naɗi nan may mi nan loɗi.