JOB 8 - BIBALDA TA PELDETTA

Bildad ka ɓak tam Job

¹ Bildad ma hay Suwah sli ditiya di'e:

² Law namna naŋ ma lawam dok-dok ta-ta lancitige? Ɓak ma hay vunaŋŋa as muɗ goy simeɗ ma vidikŋa su?

³ Lawn as gun del ɗigerta su? Ma Gaŋeraŋ-Petna as kus gasita su?

⁴ La gurona vaŋ li suluk talamu, nam vulsiyawa goy tam jiw-zlata visiya.

⁵ May naŋu, la naŋ gar Lawna, la naŋ tiy kuɗ slugota vi ma Gaŋeraŋ-Petna,

⁶ la law ma joo vaŋ mayɗi, naŋ ɗigere kaw, gasi wete nam as mus jigere kay ŋomaŋu, ziyna vaŋu ma ɗigerta ma mus hayna nam ma hot inim kulo'o lo.

⁷ Asta vaŋ ta jewta na' ma li kiɗay ɦawa, ta co bugolda ɗawni ma li ŋol suwa.

⁸ Jobaŋ tam jaf ma kalay ɓa-ɓan tige, tun ŋalda vaŋu tam sle ma sumaysi wumna tige!

⁹ Kay nay kayni kamat tan ɦawa, nay may wi va noŋ ne'ɗi, buura vaya gaa kay nagata ki ŋus ɦawa nala.

¹⁰ Nisiya, nisi as ɗekaŋ ɗisu? Nisi ma daŋ kayni. Sle namna nisi as daŋgi goyo.

¹¹ Dumara as wul bay goloŋŋa su? Cerewna as wul bay niy kuɗum su?

¹² Nam ka goɗiya hay li ma sa may zam gaaɗi, may nam so gosoyo suw us hena kafe.

¹³ Nisi sa yisi jok Lawn kaf van co tisiya ki kayni nala, cubta-sle'ta vi sa ma liwisna vat goyo.

¹⁴ Va ma nam tun vida valam kalamna toy goyo, vida valam tuni kayni kay ziy jew-jewna.

¹⁵ La nam deŋ tam ziyna valamu, ziyn as colɗi; nam deŋ tam ziyna, may ziyn col kuloɗi.

¹⁶ Ki gu ma humam miir hay falay calakka nala, nam meɗ ɓalam goyo kay jardeŋŋa,

¹⁷ sutiyam cuk gaa'a hay goorhoyona; nam peɗ ziyda ta koti hiɗi hiɗiyna.

¹⁸ Sa as patam goy hay ziyna valam su? Hena as puw vunam kalamu ala nan may waŋ noŋɗi.

¹⁹ Kayni mi jibetta vi yalam ma dabina, bugolda hay butuw namna mara ma day kulo'o lo.

²⁰ A'a, Lawn may noy sa ma ɗigera goyɗi, nam may vul donota mi nisi sa li jootɗi.

²¹ Bugolda nam ma hobaŋ vunaŋ hiɗi yoboy ma firina, vunaŋ ma cena.

²² Nisi sa kaŋ gawi ma cuk zulot tisiya. Guɗukŋa vi sum sa joona ma vat goyo.