JOB 7 - BIBALDA TA PELDETTA

¹ Irita vi san gaa kay nagat kayni may ki sojen nala ɗisu? Buura valamu may ki sa ma li lop kay gurjuta nala ɗisu?

² Ki sa ma gorvon kir fatta ka tiy kay ŋus-guna nala, ki sa ma li lop kay gurjuta cub wurakŋa valam nala,

³ Nala kaw nanu, vocota van hay tilla ti tuw-tita, ir ɓurawta vanu ti henjeta ta zumalda.

⁴ Hay li ma nan burawa gaa'a, nan di ala: nan ma fok kulo'o lancitige? Hay li ma vulatita ɦur voko, Nan ka hobay hiɗi hiwira ta-ta liyn fo goyo,

⁵ Tuwan hobay hiɗi jufulla hiɗi mil ma vunam ɓokina, tuwan ka buwa, ka ho goy hoŋgor hoŋgor'.

⁶ Buura van ka jaŋ gosoy suw gulum ma duɓar barawna; vat goyo bay cubta-sle'ta.

⁷ Humaŋ ma gaŋ ala irita vanu mi suk ɦawa, iran ma hot wi ŋaat loɗi.

⁸ Ira ma cuk kanu as kay wan loɗi; naŋ ma garan hiɗi iraŋu, may naŋ ma fan loɗi.

⁹ Ki ɗugulla sah goyo nam kala nala, sa ma jik gaa'a hay zulla vi sa ma mitina as jik kulo loɗi;

¹⁰ nam as hotay hay ziyna valam loɗi, ziyna valamu as wum loɗi.

¹¹ Kuɗ na'ta nan may ŋay tuwanɗi, nan ma lawa hay li ma ŋusta van ka vun-zlata, nan ma yor tuwanu kay galakka vi ciwta vanu.

¹² Nanu mi niy-lum su? Lebo mi muur ma goloŋ su? Kay a naŋ lak sumun galanu kay ŋomanu?

¹³ Hay li ma nan di ala: Va ma buura vanu ma teŋan iranu, liyn ma buura vanu ma sleɗ tiyta vanu,

¹⁴ hay na'ta naŋ ton sutiyanu hiɗi duway ma dina, naŋ muɗa nari hiɗi slen ma vul tuwam kiranna.

¹⁵ Nan min muru'da, awa, mitta ŋaa'a suw zokŋa lakŋi,

¹⁶ nam kiran bisi. Nan ma mus ta-ta dok-dokɗi. Hinanu, kay buura vanu mi va waa'a.

¹⁷ Sana nam mi gige? A naŋ li slen talamu ki kayn nala? A naŋ vum hay dikaŋ ŋol ki kayn nala?

¹⁸ A naŋ saramu hay graw culumta kafe, a naŋ wakamu hay liyn kafe kaw?

¹⁹ Iraŋ ma cuki kanna naŋ ma ɦodom goy ɗawn lancitige? Naŋ ma hinan liyna kay nan ma lig nenen gaa ɗawn lancitige?

²⁰ La nan li sulukawa, nan lum taŋ mi mige? Naŋ ma ŋom sumuna! Naŋ jak kulo kanu kay mige? Nan hini hay ɓam tuwanu kay mige?

²¹ Naŋ min yaw jiw-zlata van goyɗi kay mige? Naŋ min hin joota vanu raw goyɗi kay mige? Kay wulini nan min bur gaa hay butuwna; naŋ ma garanu, may naŋ ma fan loɗi.