JOB 5 - BIBALDA TA PELDETTA

¹ Wulin kayn siwelaŋ yo, sa ma humaŋ ka su? Sum sa peldetna sa naŋ min yi tisiya si sarige?

² Kay ɓulak-dikga ci sa ma tiginina, hunayt ci sa ma to'ofayna kaw.

³ Nan wi sa ma tiginin cuk sutiyam gaa'a, bugolda nan wi kayni ziyna valam vati goyo.

⁴ Gurona valam cal goy hay hagata vi su'da; vun liyn ma kitata, kitat kaay kisiya, sa ma as hulotsi goy mayɗi.

⁵ Sum sa mayt lisina ma co vurum sinena valamu, nisi ma yaw slena ta-ta tam zigiyna, sum sa laat lisina ma yaw slena valamu.

⁶ joot may kalay goy hay butuwn (kay tuwa') paɗi, zumalda dayay goy vi nagat paɗi kaw;

⁷ san vuɗi kayni kay zumalda, ki kuta ka yak kulo'o nala kaw.

⁸ May nanu, nan gar Lawnawa, nan tun lawta van kayni vok Lawna.

⁹ Nam li slen ma ŋulona ma san as fekemɗina, slen ma ŋaana ŋolo ma san as ŋaɓamɗina.

¹⁰ Nam si niyna gaa kay nagata, nam gi niyna goy hay sinena;

¹¹ sum sa yisi hoti gaa'a nam hot yawsi kulo'o, nisi sa ka hay yorta co vun su'da.

¹² Slena ma sum sa milena var kay lumna nam vatamis goyo, ɓisi as kay vulsi donotɗi.

¹³ Sum sa yalla nam visi hay nelemda visiya, ŋra-vunda vi sum sa ɗutta may mus ta-taɗi.

¹⁴ Nisi sa ŋaf hiɗi jufunda hay falay calak', nisi sa tupa tiŋtiŋ hay falayta ki hay henjet nala kaw.

¹⁵ May namu, nam suɗ sa ma hawna kay kew-gaferaŋa ma kalay goy hay vunsi pa, goy hay ɓam sa ma donona kaw;

¹⁶ may sa ma hawna cubta-sle'ta valam ka'a, may bay-ɗigerta dukaŋ vunaŋu.

¹⁷ Ki kayn nala, sle'ta ka kay sa ma Lawn dum kiramu, naŋ ma noy gatta vi ma gaŋeraŋ-petna goyɗi,

¹⁸ kay namu mi ma ka milla goyo, junum vunamu kaw; nam ka' tuw san goyo, hot citimu kaw.

¹⁹ Sem karkiya nam san goy vun zlata, sem siɗiya joot as co taŋɗi kaw.

²⁰ Nam as butaŋ goy vun mitta hay li ma mayta ka'a, nam butaŋ goy vun kew-gaferaŋa kaw hay li ma duur ka'a.

²¹ Naŋ ma ŋay goy kay bakmarana vi vun ma dina, naŋ ma mus bay narta hay li ma ɓulak-goyta coowa.

²² Naŋ ma cen kuɗ ɓulak-goyta, cen kuɗ dalana kaw. Laŋ nari kay muur ma kay nagatɗi;

²³ kay naŋ ma vi bonota hiɗi hiɗiy ma hay sinena, muuriya ma fulla kaw ma lak sleɗe hiɗi naŋu.

²⁴ Naŋ ma wi hay na'ta ala sle'ta ka gaa kuɗ guɗukŋa vaŋu; naŋ ma poy jar sinena vaŋu, va ma kiɗaŋ noŋ ne'ɗi.

²⁵ Naŋ ma wi hay na'ta ala jaf ma bugolaŋŋa ka ŋolo, gurona vaŋu ma li dak-dak ki us ma kay nagat nala kaw.

²⁶ Naŋ ma kal hay zulda ɗawn muɗi maar tagay-tagay', ki san jun alkamare ma feɗayna, molom kulo kay tuwamu hay liyna valam nala.

²⁷ Kayni mi va ma numa fumna, nam nala may naŋ as kay wi kayni, vi kaw.