JOB 42 - BIBALDA TA PELDETTA

Hot-dita ta cawta vi Job

¹ Job hot dit tam Ma-Vatɗina:

² Nan wi ala naŋ as kay wi slen kafe, varta tara'a ta naŋ as feka'ɗi tayɗi.

³ Sa ma as muɗan varta van jufunu hiɗi ɓakŋa ma wid may hayamɗin kayn nam gige? Awa, nan lawiya, bay humum cawamu, nan law kay slen ma ŋaana ma suwanu ma nan may wum goy jewɗina.

⁴ Naŋ ma human humge, nan min lawa; nan min jobaŋu, naŋ ma ɗekaniya.

⁵ Naŋ humaŋ labaraŋ kayn vun sumuna, may wulin kayni iran waŋawa.

⁶ Kuɗ na'ta kayni nan ka kitat kay tuwanu, nan ham goyo, nan bur gaa hay butuwna hiɗi butuw-kuna.

VATTA Vatta vi labara vi Job

⁷ Bugol Ma-Vatɗina di yoboyna tam Job; dina, Ma-Vatɗina di tam Elifas ma hay Teman: Nan muɗi ɦiy ŋolo kataŋ naŋu hiɗi boniyoŋ sa ma'na, kay nigi may di slen kanu hay hagata valamu ki sa ma sunda van Job li nalaɗi.

⁸ Wulin kayni yawgi luway-jufayn siɗiya hiɗi fok-gamalan siɗiya kaw, tuɗgi tam sa ma sunda vanu Job, ligi ɗifin ma ŋal-goyna may. Sa ma sunda vanu Job ma siɗaw kigiya, kay nam ka ŋaɓay kanu, kuɗ na'ta nan min li va tigiya kuɗ ɦay-ɦayta vigiɗi. Kay mige nigi may di slen kanu hiɗi hagata valamu ki sa ma sunda vanu Job li nalaɗi.

⁹ Elifas ma hay Teman, Bildad ma hay Suwah hiɗi Sofar ma hay Naama kaliya. Nisi li ki Ma-Vatɗina di tisi nala; Ma-Vatɗina vi kuɗ lawta vi Job.

¹⁰ Hay li ma Job siɗaw kay boniyomna siɗawna, Ma-Vatɗina hotom hay ŋaata valam ta jewta. Ma-Vatɗina vulum farayn sem ma' suw farayna valam ma ay jewna.

¹¹ Bosiyomna sa jufayna hiɗi sa boyna hiɗi sa wum jewna co'o katamu, nisi ti funa hay ziyna valamu. Nisi yoromu, teŋem iramu kaw kay lasta ta Ma-Vatɗina hina' co kalamta. Gigekaw jarsiya vulum kesita kep kep hiɗi jaɓ ma ora kep kep kaw.

¹² Ma-Vatɗina gi bol kay buur ma cawna vi Job suw ma jewna. Nam fi fok-dimin birim doogo yam fiɗi, lamgan birim karkiya, luway ma zumna jub-jub' birim ɗaw, kuro ma boyna birim ɗaw kaw.

¹³ Nam fi guro sa jufayn siɗiya, sa boyn ɦidi kaw.

¹⁴ Ta jewta nam tun semda va' ala Yemima, ta ma'ta nam tun semda va' ala Ketsiya, ta ɦidita nam tuna' se' ala Keren-Happuk.

¹⁵ Hay nagat noŋ kaf kayni, boy sa jifiya ki guro-boyna vi Job nala sayɗi. Busi vulsi ir vocota jar ɓosiyosi sa jufayna.

¹⁶ Bugol kayni Job li busat kis kalam dok-fiɗi lo. Nam wi gurona valamu hiɗi gurona vi gurona valamu ta-ta tam jaf ma fiɗina.

¹⁷ Bugol kayni Job mita, nam hobay hiɗi busata.