JOB 3 - BIBALDA TA PELDETTA

Job ka tiy tuwamu

¹ Bugol kayni Job sli ditiya nam beɗ buurta ta nam vuɗ haya'ta.

² Job sli ditiya di'e:

³ Buurta ta nan vuɗ haya'ta ma sahis goy sahge. Henjeta ta di ala goor-juf kep ma vi haya'ata ma sahis goyo kaw.

⁴ Hin buur na'ta muɗ goy jufunu, ɗawni hay wuralawn pa, Lawna humam ma gum ka' loɗige. Hin haraŋa wile kay buur na'ta loɗige.

⁵ Hin jufunda hiɗi ŋus-mitta sli buur na'ta ɗawge. Hin ɗugulla lak kulo kay buur na'ta, hin liyn ma muɗ jufunna muɗa' nari.

⁶ Henjeta na'ta, hin jufunda sla' goy ɗawge, hina' li firi noŋ ne'ɗi jar buura vi busata. Hin ŋaɓta va'a li jar buura vi tilla noŋɗi,

⁷ Awa, hin henjet na'ta get goyo, hin siwelda vi firita kal goy haya' pa noŋɗi.

⁸ Hin buur na'ta fi be'da-goyta, hay ɓam sa beɗ buura, hay ɓam nisi sa zut Leviyatan kuɗumna.

⁹ Hin mislek ma ŋarpita vi buur na'ta muɗ jufunu, hinim cub haraŋa, may haraŋ namna ma coɗi, hinim wi goŋ-ir ŋarpitaɗi,

¹⁰ Kay buur na'ta may duk vun hayna ma ziyannaɗi, kay na' min ŋay zumalda goy kiranɗi.

¹¹ Nan may mit kalaf hay sunɗi kay mige? Sukan sa'ata hay li ma nan kalay goy haya' panɗi kay mige?

¹² Nan fi ɓal sunu kay buran haya kay mige? Nan fi pona kaw kay ci miir haya kay mige?

¹³ Lali wulin kayni nan ka buri gaa'a, fan musi kiliŋ, fan buri sene, nala nan as tun sukanu,

¹⁴ hiɗi muliyana sa vul gatta vi nagata, sa in yam-us ma ŋulona,

¹⁵ hiɗi yerimana sa ka hiɗi ora, sa hob ziyna visi hiɗi doorota.

¹⁶ Lebo nan vuɗ vuɗi goyɗi, ki guro sa suroɓ goy tugumna nala, ki gurosguray sa gurayna sa irsi may wi fattaɗi nala.

¹⁷ Ɗawni sum sa joona may geɗ tuwsi noŋɗi, ɗawni tun suksiya nisi sa makaya bay dono'o;

¹⁸ sa daŋgayna kaf ka hay sle'ta, nisi may hum del sa ma curoɗsinɗi;

¹⁹ sa gurayna hiɗi sa ŋulona ka'a, sa ma gorvona hiɗi sa ma buti goyna vi mulamna ka kaw.

²⁰ Nam vul haraŋa mi sa ma ka ci lasta kay mige? Nam vul irita mi nisi sa ciwta visi ka hay bursakka kay mige?

²¹ Nisi sa ka cub mitta may na' may coɗina, sa dar mitta suw farayna,

²² nisi sa as li firi ŋolo, haysi sleɗa, diksi li ŋaa'a ŋolo kaw, la nisi fi zulda.

²³ Nanu mi sa ma hagat ŋayay goy vokanu, ma Lawna heb liyn goy galan kafe.

²⁴ Kay oyna vanu vurnay baŋal tina, ciriyna vanu ka yamis goyo ki niyn nala kaw.

²⁵ Va ma lan nari mi va ma co kanu, va ma lan nar suwa mi va ma tun ɓalam tanu.

²⁶ Sle'ta van tayɗi, kiliŋga van tayɗi, tun-sukka van tayɗi. Wulini co kan kayni ti lasta.