JOB 23 - BIBALDA TA PELDETTA

Hot-dita vi Job tam Elifas

¹ Job hot dita:

² Vaydi lo tiyta vanu muɗi ti ŋel-vunda, ɓalam ma buri kanna nek ŋolo suw yorta vanu.

³ Ha! Lali nan fi liyn ma nam musi hayna, lali nan as co ta-ta hay liyn ma musta valamu,

⁴ nan as kay dum goy kay gasita vanu, vunan ma li hobay hiɗi ci-wayta,

⁵ nan as wi law ma nam ma hotan dit hiɗi namna, nan as wi hot-dita ta nam ma hot tanu kaw.

⁶ Nam as yaw ŋiriyam noŋ kafe kay ka kitat hiɗi nan su? A'a! May nam ɗawni ma vi ŋalam katanu.

⁷ Nam ɗawn ma wi ala nam ci way zawn hiɗi sa ma ɗigera, sa ma ka kitata vanu ma ɗiger lawta van ɗawn kay dok-doko.

⁸ May, la nan tuɗ gal kuɗuwu, nam may ɗawnɗi; la gal vulatiya, iran may cuk kalamɗi;

⁹ nam ka li lop hay gal ma gaan su? Nan as wumɗi, nam ka ŋayay gal ma kayamna su? Nan may as fum ɗawnɗi.

¹⁰ May nam wi hagata ta nan ka coli haya'ta. Hay li ma nam wakanawa wakŋa, nan ma muɗ goy haɓ tal-tal' ki ora nala.

¹¹ Sen juni tam selem namu; nan ŋom hagata valamawa, nan may cal goyɗi.

¹² Nan may ŋel vun-ma-gatna valamɗi; nan hot yan gaa kuɗ yoboyna vi vunamu.

¹³ May namu, hay li ma nam min li va'a, sa ma as hotom bugolom ɗawn mi gige? Nam as li va ma nam min li'e:

¹⁴ Nam ma hob vun ŋayayta valam ta koti kanta, nam as kot law mara'a lo.

¹⁵ Kuɗ na'ta kayni nan muɗi ɦuyum' vok iramu; hay li ma nan var kay kayni, nan li nar kalamu.

¹⁶ Lawn vat kursulita vanawa goyo, ma Gaŋeraŋ-Petna hobanawa hiɗi ɦuyumda.

¹⁷ Kay dukan vunan kulo wulin kayni may ti jufundaɗi, kay ŋuyan kulo wulin kayni may ti jufunda ta niltaɗi.