JOB 21 - BIBALDA TA PELDETTA

Hot-dita vi Job tam Sofar

¹ Job hot dita:

² Humgiya, humgi ɓakŋa vanu. Nigi vulanti ti teŋ-ir na'ta kayni tuta.

³ Nigi hinan hagat kay law mi nanu; hay li ma nan lawawa, nigi ma panan migiya.

⁴ Tiyta vanu nan tiya' kayn kat sa su? Ciwta vanu as cubɗi kay mige?

⁵ Muɗgi irgi ay katanu, ligi ɦuyum', tungi ɓigi vungiya.

⁶ Hay li ma nan kis kayni kanu, nan muɗ ɦuyum', tuwan tun caw van bat-bat'.

⁷ Sum sa joona mus iri (ta-ta) kayn kay mige? Nisi vi busay kuroh-kuroh', hot fi dono lo kayn kay mige?

⁸ Gurona visi muɗ dono kuɗ tuwsi hiɗi nisiya, hay li ma nisi ka tuwa, jafna visiya li faray vok irsiya.

⁹ Hay ziyna visiya ti sle'ta, may nartaɗi. Ma-Vatɗina may cisi hiɗi zugulda valamɗi.

¹⁰ Luway-jufayna visi dono'o, biya jafn ŋolo, luway ma boyna visi vuɗ gurona, may suroɓ goyɗi.

¹¹ Nisi hin gurona visi jaŋ goyo ki fok-dimina nala, gurona visi ka pir kulo'o.

¹² Nisi pat delsi kulo'o kuɗ vi darayna hiɗi dilla, nisi ka li firiya kuɗ buwna vi difna.

¹³ Buura visi yalam dab hay ŋaata. May ir neeɗa ɦawa kayni, nisi kal hay liyna vi sa mitina.

¹⁴ Kayn si sa di tam Lawn ala: Vaŋ tuwaŋ goy katma'a, numa min wi hagata vaŋɗi.

¹⁵ Ma Gaŋeraŋ-Petna sunum kayn nam gige? Numa giɗelem delem kayn fum kuɗum mi mige?

¹⁶ Gasita, ŋaata visi tay hay ɓisi nisiɗi. Gine hiɗi nanu gatta vi sum sa joona.

¹⁷ May hay liy hena fitilla vi sa joona ka tew goyo, lasta ka nig gaa kisiya, Lawna ka ɓurawsi galla visi jar ɦiyda valamu,

¹⁸ hinsi liys ki usna ma simeɗn dolomna nala, ki burana ma hiwliŋŋa slumna nala su?

¹⁹ Lawn ŋom kitata valam kayni kay gurona vi sum sa joona su? Mi namu ma Lawn nagay a ka kitat kalamu kay nam ma wumu.

²⁰ Lali iram kay tuwamu as wi sarta valamu, lali jugo ɦiyda vi ma Gaŋeraŋ-Petna mi namu.

²¹ Ŋaata vi ziyna valam bugolomu meloge, hay li ma tilla valam ŋaɓay ŋaɓ?

²² San as hat wida mi Lawna lo su? Namu ma ka ti mulda kay ŋusiyan sa dukalawna?

²³ Sa hen mita hay li ma nam ka musi ŋaa'a, hay sle'ta, bay kista,

²⁴ zuroɓom hobi hiɗi mula, mul ma jar zokomna sleɗi ŋaa'a.

²⁵ Sa hen mita, ciwta valam hobi hiɗi galakka, may jugo ŋaat noŋɗi.

²⁶ Nisi ma' pet pisi gaa jar nagana, jufulla tisiya.

²⁷ Nan wi varta vigi goy ŋaa'a, hiɗi varta ta nigi min pi lawt kan hiɗi na'ta.

²⁸ Nigi di ala: Ziyna vi sa ma asayna ka arige? Guɗukŋa ma sa joon lak hayamna ka arige?

²⁹ Mige? Nigi may job sum sa jik hay hagatɗi su? Nigi min vi slen ma nisi wumnaɗi su?

³⁰ Hay buura vi bonayta, sa ma li joota huloti goyo, hay li ma ɦiyda-ŋolda ɗek tuwa' goyo.

³¹ Sa ma dum kiramu kay poyta valamu mi gige? Sa ma as hotomti kay va ma nam lumna mi gige?

³² Nisi naram goy hay zulda, nisi ŋom zulda valamu.

³³ Naga-dirgin ma hay lokŋa kulo kalam hefteŋe, sum segen ŋolo kalay vokomu, sum segena tap bugolomu kaw.

³⁴ Nigi vulan teŋ-irta ta waata kay mige? Hot dita vigi ta hinit kayn ti ɗutta tuta.