JOB 2 - BIBALDA TA PELDETTA

¹ Van li nala, hay fat tara kepe, gurona vi Lawn co vok iramu, Satan kaw co jarsi vok ir Lawn zaw.

² Ma-Vatɗina di tam Satan: Naŋ may arige pa? Satan hot dit tam Ma-Vatɗina: Kay ŋuy yam nagata, kay poy haya'a kaw.

³ Ma-Vatɗina hot di tam Satan: Sa ma sunda vanu Job naŋ wumawa su? Sa mara ma ki nam nala may gaa kay nagatɗi; namu mi sa ma gasiya, ɗigere kaw, nam li nar kuɗ Lawna, nam tun ɓalam tam jootɗi kaw. Nam musi ɗeŋe hay gasita valamu, may naŋ ka zutanu kay nan ma bam goyo bay lawi.

⁴ Satan hot dit tam Ma-Vatɗina: Ɗigiyna kay ɗigiyna! Slena kaf ma ka hay ɓam sana, nam as vulum goyo kay suɗ irita valamu.

⁵ May meɗaŋ ɓaŋ goyo, joŋ zokŋa valamu hiɗi sliw-tuwamu, nala nan wi goy haraŋ ala nam ma ŋulaŋu.

⁶ Ma-Vatɗina di tam Satan: Nam zawni, nam ka hay gaŋeraŋa vaŋu, may jo irita valamɗi.

⁷ Bugol kayni Satan vi tuwam goy vok ir Ma-Vatɗina. Bugolda nam gi mil ma narmayna tam Job, tun caway gaa selem pa, ta-ta kulo kalamu.

⁸ Job sli deheleŋŋa kay viyok tuwam hiɗi namu, nam mus gaa hay butuw-kuna.

⁹ Cata valamu di talamu: Naŋ ma mus dono'o hay gasita vaŋ na'ta ta-ta nala su? Ŋulaŋ Lawna, mitaŋu may.

¹⁰ May nam hot dita ta'a: Nak ka law kayn ki cata ta ɦay-ɦayt nala kayn kay mige? Nay fi ŋaat hay ɓam Lawna, nay as kay fi joot hay ɓalam kaw ɗi su? Hay slen kayni kaf Job min di law ma suluk hiɗi vunam noŋɗi.

Boniyom Job sa ɦidin co kay ɗuwumu

¹¹ Boniyom Job sa ɦidina hum labara kay slen ma joona ma co kalamna kafe. Nala nisiya, gigekaw fokay hay nagata valamu valamu: Elifas ma hay Teman, Bildad ma hay Suwah, hiɗi Sofar ma hay Naama. Nisi ŋra vun tuwsiya kay tuɗ yoromu, kay teŋem iramu kaw.

¹² Hay li ma nisi cuk irsi ay kalamu goy gine'e pa, nisi as wi ala kayni mi namuɗi, nala nisi tun caw tiya. Nisi jet sligar-tuwna visi goyo, ko butuwn kulo kisiya.

¹³ Nisi lak hiɗi namu gaa kay nagata, ta-ta buur siɗiya, sa may di va talam noŋɗi, kay nisi wi kayni, tuw-tita valam ka suwi ŋolo.