JOB 16 - BIBALDA TA PELDETTA

Hot-dita vi Job tam Elifas

¹ Job hot dita:

² Nan humi slen ŋolo ki kayn nala. Nigi kaf kayni si sa vul teŋ-irta ta ɓulak dikga.

³ Yoboyna vigi ma jar simeɗn lakŋ yalam ma dab citige? Va ma taŋ dikaŋ kay naŋ hot dit ki kayn nala kayn mi mige?

⁴ Nan kaw, nan asay a law ki nigi nala, la nigi ay hay baŋalanu.

⁵ Nan ɗawn ma teŋgi irgi hiɗi vunanu. Vunan ma muzukŋa ma sleɗgiya.

⁶ La nan lawa, Lasta van may sleɗ gaaɗi, La nan ba vunanu, na' kal goy gine hiɗi nan ɗawn kaltige?

⁷ Yayya! Wulin kayni nam vatan donota vanawa. Naŋ kal yortawa hay jafna van kafe,

⁸ naŋ motanawa; kay li di-goyt kanu, zo'otta vanu ka fok kulo kanu, ka pi lawt kanu goy vok iranu.

⁹ ɦiyda valamu ka jetan goyo, ka bowanu, nam ka mut siyam katanu. Iram ka piy kan ŋiliŋ'.

¹⁰ Nisi zlar vunsi goy katan ŋulo na ca'. kay muɗan zulo'o, nisi can (kay) galiyanu. Nisi so tuwsi kaf katanu.

¹¹ Lawn vulanawa goy hay ɓam sum sa liwisna. Nam zutanawa goy hay ɓam sum sa joona.

¹² Nan ay musi kiliŋ, may nam hiwiranawa, nam mokanawa hay jakanu, kirapanawa goyo, nam colanawa kulo'o kay ɓenu.

¹³ Sa gi ɓarawta valamu ŋuyanawa hay galan kafe; nisi ka ɓen kay furanu, may hinan noŋɗi, nisi ka yaman miyawan gaa kay nagata.

¹⁴ Nam jetan tuwanawa goy neɗ neɗ kafe. Nam digiɗanu ki sa ma duura nala.

¹⁵ Nan sira bolla kay cukum katanu; nan ka ɦir yan gaa kay nagata.

¹⁶ Iran cori slawi kay tiyna; ŋus-mitta ka kay goŋ-iranu.

¹⁷ Ɓan may li law ma ɦawlaɗi. Siɗawta van ay dok-dok peldete.

¹⁸ Hih! Nagata, nak may bar yam busuwna vanɗi, hin tiyta vanu pat kulo ŋolo.

¹⁹ Wulini pa, sa ma li di-goyt kanna ka hay wuralawna, sa ma hot dita vanu ka hay liyn ma kulo ginena.

²⁰ Boniyonna ka cen kuɗanu; may nan tiy hiɗi zimiyn tam Lawna.

²¹ Nam ma ka kitat jar sana hiɗi Lawna kaage. Jar goora vi sana hiɗi banamna.

²² Kay ŋaɓta vi buura vanu min vat goboyo, nan ma kal hay hagata ta nan ma hotay haya' loɗita.