JOB 13 - BIBALDA TA PELDETTA

¹ Awa, iran wi slen kawnawa kafe. Human humumawa, humi goy haraŋi kaw.

² Slen ma nigi wumna, nan kaw wumu, nan may kiɗay goy katgiɗi.

³ May nanu, nan min law tam ma Gaŋeraŋ-Petna, nan min gut kay tuwanu vok Lawna,

⁴ Kay nigiya nigi ka mol sinda yam tuwa'a, nigi kaf lakŋi si doktoray sa waa'a.

⁵ Nisi min lak ŋal kiliŋɗi kay mige? La li kayni ti yalda vigiya.

⁶ Nan siɗawgiya kay nigi ma huma' ti dita vanu, jakgi humgi tam tiyta vi vunanu.

⁷ Slen ma hay liyamɗina nigi dum kayn ŋaa'a tam Lawn su? Slen ma sinda nigi dum kayn malam nam su?

⁸ Nigi var ala nigi gut kayn kuɗum su? Nigi min law ŋaat kay Lawn su?

⁹ Nam ma fi kayni ŋaa'a hay li ma nam min fekgiya su? Lebo nigi as ɗutumu ki ɗut sana nala su?

¹⁰ Gasiya, nam ma muɗ ɦiy katgiya, la nigi ka hiɗi poŋ-irta goy ŋayaya.

¹¹ Mulda valamu ma kal narta hay dikgiɗi su? Narta ŋolda valamu ma nig gaa kigiɗi su?

¹² Yoboy ma hay vungina nam ŋray ca hiɗi butuw-kuna, kasla ma vungina ŋray ca hiɗi gulmun nagana.

¹³ Bagi vungiya, hinangiya, nan min lawa, la co kan mige kaw.

¹⁴ Nan as mok sliwan jar siyanu kay mige? Nan as bur irita vanu goy way ɓanu kay mige?

¹⁵ La nam min can goy noŋ kaw, nan zamamti ɓalam namu. Awa, nan min di lawta van goy vok iram namu.

¹⁶ Kayni as gutan kay suɗan goyo, kay sa ma liwisi as col vok iram noŋɗi.

¹⁷ Humgiya, humgi varta vanu. Hin dita vanu cuk hay humgiya.

¹⁸ Humgiya, nan min di goy kay ɗigerta vanu; nan wi ala lawta van hay liya'a.

¹⁹ Sa ma min tun kitat kanu mi gige? Tun caw wulin pa, nan min ba vunanu, nan ma sa'ata.

²⁰ May suw pet kayni, naŋ vulan slen ma', nala nan ŋay goy gine'e vok iraŋɗi.

²¹ Slaŋ ɓaŋ goy kanu, hin ɦiyda vaŋu ton sutiyanɗi.

²² Bugolda yaŋaya, nan ma sli dita, lebo nan ma lawa, naŋ ma hotan dita may.

²³ joota vanu hiɗi sulukŋa vanu ka gaage? Naŋ ma ɗekan kay jiw-zlata vanu hiɗi sulukŋa vanu.

²⁴ Naŋ ŋay iraŋ goy kanu, naŋ ɗuwan ki sa ma gaw kaŋŋa nala kaw kay mige?

²⁵ Naŋ min geɗ hum-guna ma soy goyna su? Naŋ min digiɗ hoso ma soy goyna su?

²⁶ Kay naŋ ɗo yoboy ma galakŋawa gaa'a kanu, joota ta nan la' joriyo tuwanta naŋ min ga' kanu.

²⁷ Naŋ min cukan sen hay dirlana, naŋ min fek poyta van kafe. Naŋ min slan sen ma tunna kafe.

²⁸ Sliwan ka loɗ goyo, ki sligar ma fotn tumna nala.