JOB 11 - BIBALDA TA PELDETTA

Sofar ka ɓak tam Job

¹ Sofar ma hay Naama sli ditiya di'e:

² Yoboy namna ma dak-dakŋa kayni may fi hot-dita valamɗi su? La naŋ ɓak ŋolo kayn lawta vaŋ gasi de su?

³ Ɓakŋa vaŋ ma waana nam as zan vun sumun su? Naŋ as buraha bay sa slugut lawta vaŋ su?

⁴ Naŋ di'e: wida vanu sa ma gatan vunan ka' mayɗi, nan ɗigere vok iramu.

⁵ He! La Lawn min a di va'a, la nam mal vunam goy vokaŋu,

⁶ la nam daŋ kay ŋayayta vi yalla valamu ta suw varta vi sana, hay na'ta naŋ ma wi ala kuɗaŋ naŋu, Lawna yalam jok gal joota vaŋu.

⁷ Naŋ as fi sle ma zulla vi Lawna su? Naŋ as pat dir sle ma ɗek kay peldetta vi ma Gaŋeraŋ-Petna goy su?

⁸ Na' kulo fiyoko ki dukalawn nala kaw, naŋ as lum mi mige? Zul ŋolo suw liyna vi sa mitina: naŋ as wum mi mige?

⁹ Ŋaɓta valamu fiyok ŋolo suw nagata, nam beɗay ŋolo suw niy-lum ma ŋolla.

¹⁰ La nam jika, la nam gi sa daŋgaya, la nam yi sa vun kitata valamu, sa ma as tel kayni mi gige?

¹¹ Kay nam wi sum sa may nafaɗina. Nam wi sa joona, may tun ŋalda valam kay kaynɗi.

¹² May san hayɗini, yalla valam ŋray hiɗi sa ma ɦoyayna, sa wurana nam vuɗi kayni ki gurona vi kuro ma fulla nala.

¹³ May naŋu, la naŋ min ɗiger dikaŋu, la naŋ min meɗ ɓaŋ kulo kat Lawna,

¹⁴ la naŋ ja jaraŋ goy hiɗi bay-ɗigerta, la naŋ hin bay-ɗigerta mus gaa kuɗ guɗukŋa vaŋɗi,

¹⁵ nala naŋ ma poŋ vokaŋ kulo'o bay zulo'o, naŋ ma muɗ ɗeŋe, bay narta kaw;

¹⁶ kay yaŋ ma jok zumalda vaŋu, humaŋ ma gaŋ ka'a ki niyn ma jaŋ goyo ɦawa nala.

¹⁷ Buura irita vaŋu ma wileɗ ŋolo suw fatta ta hay falay calakka, jufunda ma muɗ ki graw culumta nala,

¹⁸ naŋ ma li hobay hiɗi sle'ta, kay cubta-sle'ta ma co'o; naŋ ma ɗuw goy hay galaŋu, naŋ ma bur gaa'a hay sle'ta.

¹⁹ Naŋ ma sileɗ goyo, sa ma kicaɓaŋ may loɗi, sumun ŋolo ma job gutda vaŋu.

²⁰ May ira vi sum sa joona ma loɗ goyo, liyn ma nisi ma fi'e kay ŋay haya may loɗi, cubta-sle'ta visi kayni mi suksi ma sa'atna.