JOB 10 - BIBALDA TA PELDETTA

¹ Ciwta vanu bis musta iritawa, nan hin tiyta vanu law kay irita vanu. Nan ma lawa hay galakka vi ciwta vanu.

² Nan di tam Lawna: Nan may ka kitat kanɗi. Naŋ ɗekan kay va ma naŋ lasan kalamna.

³ Kiraŋ ŋaa'a kay curoɗ sana su? Kiraŋ ŋaa'a kay noy lopna vi ɓaŋ goy su? Kiraŋ ŋaa'a kay hin haraŋa vaŋu wile'e kay gatta vi sa joona su?

⁴ Iraŋ mi ira vi sana su? Naŋ ɗuw ki sa wurana nala su?

⁵ Buura vaŋu ki sa wurana nala su? Busata vaŋu ki busata vi sa-wurana nala su?

⁶ Kay naŋ fek joota van kayni, kay naŋ gar caw sulukŋa van kayni!

⁷ Naŋ wi goy ŋaa ŋola ala kitata ta vanu tayɗi, sa ma hulot sa goy hay ɓaŋ mayɗi kaw?

⁸ Ɓaŋu inanawa, naŋ kotan tuwanawa noŋ kafe., may naŋ min ɓulakan goy lo su?

⁹ Humaŋ ma gaŋ ala naŋ kotanu ki hiɗi nagana nala; naŋ min hotan hay nagana lo su?

¹⁰ Naŋ yoranawa ki miir-ŋulomna naɗi su? Naŋ zlayanawa ki miir-zlayn naɗi su?

¹¹ Naŋ cuk tanu ɗigiyna hiɗi sliwna, naŋ cilanu hiɗi zokŋa hiɗi sutayna;

¹² naŋ vulan irita hiɗi ŋaata, sukka van ka iriya kuɗ ŋomda vaŋu.

¹³ May kayni mi va ma naŋ ŋomom hay dikaŋu, nan wi va ma ka hay varta vaŋu,

¹⁴ la nan li suluku, naŋ peɗanu, naŋ as hinan ɦawa'a hiɗi joota vanɗi.

¹⁵ La nan nagay a fi kitata, joot kanu, la nan ɗigere, nan nagay kay poŋ yan kuloɗi, hobay hiɗi panta, ɗubi kay lasta vanu,

¹⁶ la nan wak kay poŋ yan kulo'o, naŋ digiɗan ki zlon nala, naŋ watan lo hiɗi ɗekka,

¹⁷ naŋ lak sa di-goyna vaŋ sara'a katan lo, ɦiyda vaŋ katanu jor voko, soje segena vurna'a kay ŋuyanu.

¹⁸ Kay mige naŋ vuɗani goy hay sun pa? La li sukan sa'at sa'atiyani ir sa as wanɗi.

¹⁹ Nan ma li ɗawn ŋray ca ki nan vuɗ goyɗi nala, nan ma li ɗawni ki sun ziyan haya'a capan hay zulda de naɗi su?

²⁰ Buura vanu nam may kiɗaya ɗisu? Nam hinan hinge. Nam vi tuwam goy tan vige, kay nan ma hot fi kursuli neeɗa,

²¹ jew a nan kala, kay a nan ma hotay hay nagata vi jufunda hiɗi ŋus-mitta loɗi,

²² nagata vi jufunda ŋolda ki jufunda yilikka nala, ŋus-mitta, liyn ma gijum-gijumta ka ti mul haya, liyn ma haraŋa ŋray ca hiɗi jufunda.