HOSEYA 4 - BIBALDA TA PELDETTA

Jiw-zlata vi Israyel hiɗi Yuda, Ma-Vatɗin min watsiya

¹ Humgi yoboyna vi Ma-Vatɗina, nigi gurona vi Israyella. Kay Ma-Vatɗina kita ka jaram hiɗi sum sa hay nagata. Kay gasit tay loɗi, kir-hawt tay loɗi, sa ma wi Lawn may hay nagat tay loɗi.

² Hini kayn ti ŋulda hiɗi sinda, mat ma cina, kulda hiɗi zlata-bulota, li hiɗi dono'o, mat ma cin jaram may ja loɗi.

³ Kuɗ kayni nagat ma kal hay do'olla, Sum sa haya'na kaf sutaysi ma to'o, faray ma hay sinen lay, layayn ma dukalawn lay; kuluf ma goloŋ jar niyn kaw ma vat goy noŋ kirap'.

Sulukŋa vi muliyan-sa-ɗifinna

⁴ May sa ma gar kay pat tuwam goy mayɗi, sa ma gar kay tun lawt kay sa mara mayɗi kaw. Kay sumuna vigiya, nisi ki sum sa ci wayt hiɗi muliyan-sa-ɗifinna nala.

⁵ Nigi ma cuk gaa hay falayta, sa jobta ma cuk gaa hiɗi nigi hay henjeta, sugiya nan ma ca' goyo.

⁶ Sumuna van fi mittawa kay wida visi mayɗi, wulin kayn nigi gi widawa goyo, nan kaw min gigi nigi goyo, lopna vi ɗifinna nan ma patgi goy hayamu. Kay yigi jok vun-ma-gatna vi Lawna vigiyawa, nala nan kaw yan ma jok gurona vigiya.

⁷ Nisi ka biya voksi ŋol suwa, sulukŋa visi ka biya vokom ŋol suwa may, gajijita visi nan ma muɗa' goy zulota.

⁸ Nisi ka hob haysi hiɗi suluk ma sumuna van ka lumna, jiw-zlata vi sumuna van may hobsi haysi noŋɗi.

⁹ Va ma li tam muliyan-sa-ɗifin ɗawni, mi va ma min li tam sum sa kisna lay, nan ma watsi ɗawn kuɗ haga ma nisi slumna kayni, nan ma wuraksi kuɗ lopna visiya.

¹⁰ Nisi ma muɗ ɗawn ti kaw haysi as hobɗi, nisi ma li zlata-bulot ŋolo may as a biya loɗi, kay mige nisi noy Ma-Vatɗina hiɗi vun-ma-gatna valamawa goyo.

¹¹ Viyuwta hiɗi ɦoyta kuɗ dolayna ɓulak ŋalda vi sana.

¹² Sumuna van job tam guna visi ma ceɗayna, hot dit tisi kayn mi zugulla visiya, kay ŋusta vi zlata-bulot viyaŋ goyo, nisi li tuwsi viyuw goy gine hiɗi Lawna visiya.

¹³ Nisi li ɗifin kulo kay yam hiɗiyna, nisi ŋal urdi ma his fayna, kulo hay liyn ma jiŋiliŋŋa, gaa kuɗ gu-ma'asna, gu-tibikŋa, hiɗi terebintena ma ŋusam ŋaa'a ŋolo, kuɗ na'ta guro-boyna vigi ka li tuwsi viyuwu, boyna vi gurona vigi ka li zlata-bulo'o.

¹⁴ Wulin kayn nan as a ka kitata kay guro-boyna vigi kuɗ gawlaŋga visi loɗi, boyna vi gurona vigiya, nan as a ka kitat kisi kay zlata-bulota visiɗi lay, Kay nigi kay tuwgi kaw ka kal goy ŋayaya kay li zlata-bulota, ka li ɗifin hiɗi boy sa liwisna, sum nisi sa ɦay-ɦayna ka jaŋ tam bata-goyta.

¹⁵ Humgiya nigi sa Israyella: La nigi vul tuwgi goy tam zlata-viyuwta, Yuda, nigi muɗ tuwgi migi jooɗi, tuɗgi migi hay Gilgalɗi, tuɗgi migi hay Bet-Avenɗi, kaw yi va migi kigi ala Lawn ka iriyaɗi.

¹⁶ Kay sa Israyella muɗi gat kay saɗi, ki put gunay ta wurit nala, wulin kayn Lawn ŋomsi ɗawni, ki goor ɦu-dimin goy hay ful ma wiŋŋa nala.

¹⁷ Sa fi Efrayimna juni dono'o tam Lawayn ma waana, nala hinsi misiya.

¹⁸ Hay li ma dolay ma vunsin bay vat tuwan kayni, nisi jok kuɗ zlata-bulota, sa ŋulona law ma muɗaŋ zulon may assiɗi.

¹⁹ Hiwliŋŋa ma dolsi kuɗumu, nisi ma muɗ zulo kay ɗifinna visiya.