HOSEYA 2 - BIBALDA TA PELDETTA

¹ May hiɗi kayn kaf Israyel ma biya ŋolo, ki ŋesl ma goloŋ kel niyn nala, muɗ ɗawn va mara ma ŋram hiɗi nisi mayɗi, sa fi a ŋaɓsiɗi lay, muɗ ɗawn sa ma disi ala nigi sumuna vi Lawnɗi may loɗi, may muɗ di kisi ɗawn ala gurona vi Lawn ma irina.

² Gurona vi Yuda hiɗi gurona vi Israyel ma tok yam tuwsiya, nisi ma tun sa ma ŋol voksiya, nisi ma cukay goy hay nagat pa; buurta vi Yisreel ma li ɗawn ti buurta ŋolo.

³ Digi tam ɓosiyogina: Ammi hiɗi Ruhama.

⁴ Lawgi sugiya, lawgita, kay na' tay ti cata van loɗi, nan kaw may mi jufa' loɗi lay, gawlaŋga va' ta gaɓi kulo hay voka'ti waŋŋi na' sla' goyo, zlata-bulota ta ka hay miira ma diga'na na' hina' goy lay.

⁵ La naɗina nan min foka' goy nala'a, nan ma hota' ɗawn ki buur ma na' vuɗi hayam pana nala, nan min muɗa' ki ful ma wiŋŋa nala, ki nagat ta ya' soy goyt nala, nan min ca' goyo hiɗi laata.

⁶ Gurona va' ma muɗ kiran haw loɗi, kay nisi kayni si gurona vi zlata-bulota.

⁷ Susi kaw muɗ tuwa'awa gawlaŋi, na' ta ziysi haya'ta muɗ tuwa'awa bisi, kay na' di'e: Nan min tap kuɗ sa cilena vanu, kay funa ma tina hiɗi niy ma cina vulanti kayn si nisiya, mirisna hiɗi sligar ma barawna vulanti kayn si nisiya, mula hiɗi va ma cin ma jibetna kaw.

⁸ Kay na'ta nan ma duk hagata va' hiɗi zigiyna, nan ma duka' hiɗi gulmunna, kay na' ma hot fi haga na'ta loɗi.

⁹ Na' ma tap kuɗ sa cilena va'a, may na' as a fisi loɗi. Bugolda na' ma di'e: Nan min tuɗa, nan min hot kuɗ jufan ma jewna, kay nan ay musi ŋaa'a suw ma wulinna.

¹⁰ May na' may wi ala alkamarena hiɗi gulda-guldana ma jibetna, hiɗi mula kaw vula'ti kayn mi nanuɗi. Gurjuta hiɗi or ma nan ka vula'tina, nisi vulum goyo kay sun Baal hiɗi namu.

¹¹ La nala hay li ma alkamarena vanu, hiɗi gulda-guldana vanu liyna valam asawana nan min yawamu, mirisna vanu hiɗi sligar barawna vanu ma na' baram ta'a kay ŋay nalata va'na nan min fokom goyo.

¹² Wulin kayn nan min pat dir law ma zulona va'a goy kir sa cilena va'a, sa ma fi kay buta' goy hay ɓan may loɗi.

¹³ Nan min vat firita va' kaf goyo; Yulde ma na' lumna, firi ma na' lum hay vun tilla, sabatna va'a hiɗi yulde hen noŋ kaf.

¹⁴ Sine ma gu-gumna hiɗi gulda-guldan hayamna, ma na' di ala nam lakŋi mi wurakŋa va'a, ma sa cilena va vula'tina, nan min ɓulakam goyo, nan min muɗum goy juru ɦawa'a, muuriya ma hay sinen ma tum goyo.

¹⁵ Nan min wata'a kay buur ma na' bam goyo, kay li ɗifin tam Baal, hay li ma na' gan tuwa'a hiɗi wayta, girliŋŋa hiɗi kerme ma dela'na, na' jaŋ kuɗ boniyo'na ya' jokan goyo, din Ma-Vatɗina.

¹⁶ Kay na'ta ɗuwgiya, nan min nilama'a, nara' goy fulu, ɗawni nan ma law hay dika'a.

¹⁷ Ɗawni nan ma hot vula' gulda-guldana va'a, vula' liyn ma gaa beɗna vi Akor, ki vun-galana vi cubta-sle'ta nala, ɗawni na' ma gi nulu ki hay li ma na' ay waya tuwa nala, ki hay buur ma na' kal ay goyo hay nagata Egipte pa nala.

¹⁸ Hay buur namna ɗawni, din Ma-Vatɗina: Nak ma yan ala Jufanu, nak ma yan ala mulanna loɗi.

¹⁹ Semda vi Baal nan min sla' goy hay vuna'a, kay sa as a yisi sesi kulo hay vunam loɗi.

²⁰ Hay buur namna ɗawni, nan ma kotsi bonot jarsi hiɗi muur ma hay sinena, hiɗi layayn ma dukalawna, hiɗi sle ma harmat gaa kay nagatna, ɓarawta hiɗi kew-gaferaŋa hiɗi duura nan ma vatam goyo, nan ma hinsi tun suk hay sle'ta.

²¹ Nan ma li mi banagŋa kay dok-doko, nan ma muɗ mi banagŋa kay ɗigerta, kay law ma gasina, kay slugota hiɗi kir-hawta.

²² Nan ma vag bono ɗawn hiɗi bono ta gasita, nak ma hot wi Ma-Vatɗina.

²³ Hay buur namna ɗawn nan ma hum siɗawta, din Ma-Vatɗina. Nan ma hum dukalawna, dukalawn kay tuwam ma hot dit kuɗ va ma nagat minimna.

²⁴ Nagat ma hob hiɗi wana, gulda-guldana hiɗi mula, nisi ma hum siɗawta vi Yisreel.

²⁵ Lo-Ruhama nan ma daba' se' gaa hay nagat ɗawn ir vanu, nan ma la' slugo'o, nan ma di tam Lo-Ammi ala naŋ kayn mi sana vanu! Nam ma hotan dit ala «Lawna vanu» may.