HOSEYA 11 - BIBALDA TA PELDETTA

Lawn li ŋaat kay sum sa Israyella may nisi minimɗi

¹ Hay li ma sa Israyella ay joriyo tuwa, nan minsi ŋolo. Gurona vanu nan yisi ay goy hay Egipte pa.

² May nisi ja jarsi goy gine'e hiɗi sum sa yisi ayna. Nisi li ɗifin tam Baal, li ɗifin ma his fayna tam slen ma inina.

³ Nanu mi ma ɗek sumuna vi Efrayim hay hagata, nan mi ma visi ɓisi kulona, nisi may wi ala cit milla visi mi nanuɗi.

⁴ Nan ka sabsi bugolanu hiɗi zigew ma lumaɗna, hiɗi jaɓ ma minda, nan ay bugolsiya ki sa ma hin jukŋa tun kelsi ɗeŋɗi nala, sle ma tin kaf nan vulsiya.

⁵ Nisi as a hot hay nagat Egipte loɗi, may vurna ti mulda kisi ɗawn si sum sa Asiriyana, kay nisi min hotay tanɗi.

⁶ Kew-gaferaŋa ma cal sum sa hay hoyok-ziyna visin goyo, sum sa gut-gasina ma vat goyo. Kewt ma mutsiya, kayn kuɗ var ma hay diksina.

⁷ Sumuna van varsi tuni kayn kay tuɗ goy gine hiɗi nanu. La yisi kay nisi tuɗ kat ma kulo ginen kaw, sa kuɗsi ma hum mayɗi.

⁸ Sumuna vi Efrayim, nan ma lum tigi ɗawn mi mige? Sumuna vi Israyella, nan ma vulgi goyo su? Nigi min ala nan ma ligi ki nan li Adma nala su? Nan ma ligi ŋray ca ki Seboyim nala su? Dikan ɓulakawa ŋolo, Kir-hawta ta hay dikanta kaf geɗiya.

⁹ Nan min li kuɗ ɦiyda van ta ŋoldaɗi, nan ma as ɓulak sumuna vi Efrayim goy loɗi, kay nan mi Lawna may mi saɗi. Nan ka peldet jargiya, nan ma coys jargi hiɗi ɦiydɗi.

¹⁰ Nisi ma tap kuɗ Ma-Vatɗina, namu ma min ci gumu ki zlon nala, kay nam ma ci gumu, gurona valam ma jaŋay talamu goy hay gal niy-lumna ma ŋolla pa, tuwsi ma visi bat-bat'.

¹¹ Nisi ma jaŋay talamu goy hay Egipte pa, tuwsi ma visi bat-bat', ki layta nala. Goy hay nagat Asiriya pa, ki gukka nala. Nan ma laksi ziy hay nagata visiya. Kayn mi dita vi Ma-Vatɗina.