HOSEYA 1 - BIBALDA TA PELDETTA

Hoseya sli cata gawlaŋga

¹ Ma-Vatɗina di yoboyn tam Hoseya goora vi Beeri, kayn hay liyna vi Oziyas, hiɗi Yotam, hiɗi Ahas hiɗi Ezekiyas kaw, muliyana vi Yuda; kayn hay liyna vi Yerobowam goora vi Yowas, mul ma Israyella.

² Hay li ma Ma-Vatɗina di yoboyn tam Hoseya sem ma jewn kayni, Ma-Vatɗin di talam ala: Tuɗaŋu, slaŋ cat ta gawlaŋga a na' ma vuɗaŋ guron jar gawlaŋga, kay nagat muɗ tuwa'awa gawlaŋi. Lawn na' hinimawa goyo!

³ Nam tun iram ta, sli Gomer, goota vi Diblayim, na' sli haya vuɗum goor ma jufu.

⁴ Ma-Vatɗin di talamu: Naŋ ma tunum selem ala Yisreel, kay hini neeɗa ɦawa nan ma wat sum sa vo hay ziyna vi Yehuna, kay busuw ma nisi ɦokom goyo hay Yisreella, mulda vi Israyel nan min vata' goyo.

⁵ Hay buur namna ɗawni, ɓarawta vi Israyel ta duura nan min kusa' goyo hay liyn ma beɗna vi Yisreel.

⁶ Na' sli hay mara lo vuɗ goot-cat kepe. Ma-Vatɗin di tam Hoseya: Naŋ ma tuna' se' ala Lo-Ruhama, kay nan min wi hawta vi ziyna vi Israyel loɗi, nan min vulsi gid loɗi.

⁷ May nan min wi hawta vi ziyna vi Yuda; Nan min suɗsi hiɗi ɓan nan Ma-Vatɗina, Ma-Vatɗina visiya, nan suɗsi ɗawn hiɗi ɓarawtɗi, hiɗi kew-gaferaŋa hiɗi duurɗi lay, hiɗi kulumayɗi lay, hiɗi sum sa ɓey kay kulumaynɗi lay.

⁸ Hay li ma na' ka vun Lo-Ruhama goyo, na' kot sli hay lo, na' vuɗ goor juf mara lo.

⁹ Ma-Vatɗin di talamu: Naŋ ma tunum selem a la Lo-Ammi, kay nigi wulin kayn say sumuna van loɗi, nan kaw may mi Lawna vigi loɗi lay.