HEBRENA 7 - BIBALDA TA PELDETTA

¹ Melkisedek namna ay mi mulla vi Salem, mul-ma-ɗifinna vi Lawna ma Kulo-Jamna, nam tuɗ ŋaf ir Abraham, hay li ma nam hotaya bugol nam kol kay muliyan kolla, nam gum bolo;

² talam namu, Abraham vul gal-ma-doogona vi slena valam kaf, nam ma selem ɗek jew kaf ala mulla vi ɗigerta, bugolda mulla vi Salem, kayn di'e mulla vi toyta.

³ Bulum mayɗi, sulum tayɗi, jafam mayɗi; tun cawta vi buura valam mayɗi, dabta vi irita valam tayɗi kaw. Nam muɗawa ŋray ca ki Goora vi Lawna nala, nam ma mus mul-ma-ɗifinna ta-ta hay vatɗita.

⁴ Ɗuwgi ŋolda vi san kayni natige, nam ma Abraham bum ma ŋolla kay tuwam kaw, vulum gal-ma-doogona vi slen ma ɓuraŋŋa!

⁵ Sa jar gurona vi Levi sa li lopna vi ɗifinna nala kaw, kuɗ gatta, fi hagata kaw yaw gal-ma-doogona vi slena kay sumuna, kayn min di ala kay ɓosiyosi sa may goy hay jaf Abraham pa.

⁶ May nam ma jafna valam may jarsiɗina, nam yaw gal-ma-doogona kay Abraham, nam gi bol mi nam ma deŋga ŋolo fiy kalamna kaw!

⁷ May kayni bay ci-wayt yo kay ma goora fi bolda kuɗ ma ŋolla.

⁸ Tan kayni si sum sa mitna sa ka yaw gal-ma-doogona, may ɗawni mi sa kep ma dit di kalam ala nam ka iriya.

⁹ La nan fi di nala, hay Abraham Levi kaw vul gal-ma-doogona goyo, nam sa ma yaw gal-ma-doogona vi slena,

¹⁰ Kay nam ay kalaf hay bulum tuwa hay li ma Melkisedek tuɗ ŋaf iramu.

¹¹ Lali kuɗ lopna vi mul-ma-ɗifinna vi sa Levitna, -- kay gatta ta vuli tam sumuna tuni kayn kisiya -- nala mul-ma-ɗifin mara fok kulo kuɗ hagata vi jafna vi Melkisedek, may kuɗ hagata vi jafna vi Aaronɗi kay mige?

¹² Kay hay li ma mul-ma-ɗifinna muɗumawa, ŋaa'a kay muɗ gatta kaw.

¹³ Kuɗ kayni sa ma yoboyn kayni law kalamu, nam hay jaf mara'a, ma sa ma li lop hay liyna vi giwin-ma-ɗifinna kaw mayɗi.

¹⁴ Van kayn ka goy haraŋ ala Bum-Sumuna vaya may goy hay Yuda pa, jafna ma Musus may di va talam ne' noŋɗi kay muliyan-sa-ɗifinna.

¹⁵ Nam muɗawa goy haraŋ suwa, hay li ma mul-ma-ɗifin mara ma sli ki Melkisedek nala,

¹⁶ Nam muɗi nala kayni may kuɗ gatta vi hagata vi sliwnɗi, may kuɗ donota vi irita vatɗita.

¹⁷ Kay di-goyta kayni li kalam ala: Naŋ mi mul-ma-ɗifinna ta-ta hay vatɗita, kuɗ hagata vi Melkisedek.

¹⁸ Nala kaw, hay gal mara'a dita-gatta ta jewta hini goyo, kay na' muɗi maŋaya, nagay kay li va ma ŋaaɗi kaw,

¹⁹ -- kay gatta mar va ne' hay pasiyakka noŋɗi -- hay gal hena nam mi tun-cawta vi cubta-sle'ta ŋaata ta nay ɦuray goboy tam Lawna hiɗi na'a.

²⁰ Slen kayni liyawa bay va ma yi kamnaɗi. Kay segena muɗi muliyan-sa-ɗifinna bay va ma yi kamna.

²¹ May nam (Yesu) muɗawa hiɗi va ma yi kamna kuɗ nam ma di talam ala: Bum-sumuna yi va kalamu, nam may ham kay kaynɗi: naŋ mi mul-ma-ɗifinna ta-ta hay vatɗita.

²² Kuɗ kayni Yesu muɗi deŋŋa vi bonota ta ŋaata.

²³ Lo, muliyan-sa-ɗifinna ay ŋol suw asa, kay mitta telsi kay mus ta-ta;

²⁴ may namu, kay nam mus ta-ta hay vatɗita, nam fi lopna vi mul-ma-ɗifinna ma fi mu'ɗina.

²⁵ Kay na'ta nisi sa ma tam Lawna hay namu, nam as suɗsi goy gasi, kay nam ka dok-dok iriya kay siɗaw kisiya.

²⁶ Mul-ma-ɗifinna ma nagay kayna ma li ki nam kayn nala: peldete, bay joota, bay liwisi, jaram jay goy hiɗi sa sulukŋa, ka kulo gine'e suw dukalawna,

²⁷ ki muliyan-sa-ɗifinna nala, nisi li ɗifin hay buurta kaf: jewe kay sulukŋa visiya, bugolda kay sulukŋa vi sumuna. May nam may li ki kayn naɗi. Nam kayn nam lum sem kep tuta, hay li ma nam li ɗifin hiɗi tuwam ma ɗeŋŋa lina.

²⁸ Kay gatta tunsi ki muliyan-sa-ɗifinna nala si sumuna sa ka hiɗi maŋayta; may yoboyna vi va ma yiy kamna ma co bugol gatta, tun goora ma coowa tam pasiyakka ta-ta hay vatɗita.