HEBRENA 4 - BIBALDA TA PELDETTA

¹ Kay na'ta deŋga kay kal ma kalaf hay tun-sukka ka'a, kay sa jargiya ma var kay co goy bugolɗi.

² Kay labara ma firina kusi taya ki tisi nala kaw. May yoboyna ma nisi humumna li va ma ŋaa'a tisi noŋ ne'ɗi, kay sa humumna may vum hiɗi vidaɗi.

³ Kay nay sa viyna, nay ka cuk kalaf hay tun-sukka ma dita di kalam ala: Nan yi va kanu hay ɦiyda vanu, Hay gasita, nisi ma cuk kalaf hay tun-sukka vanɗi. Nir na'ta kepe lopna vi Lawna liyawa hay tun cawta pa;

⁴ Kay nam di hay liyn mara kay buur ta siɗiyata ala: Lawna tun sukam kay lopna valam kaf, hay buur ta siɗiyata.

⁵ Lo hay liyn tani: hay gasita, nisi ma cuk kalaf hay tun-sukka vanɗi.

⁶ Nala, ki koti kay sum sara'a kay cuk kalaf haya, nisi sa labara ma firina kusi tisi jewna fi cuk kalaf hayɗi, kuɗ bay-vida visiya,

⁷ Lawna col buur tara lo, vaydi, hay li ma nam di goy jewe hay vun David, hay liyn ma kalay bugol ŋolo ala: Vaydi la nigi humum delemu, so'otgi dikgiɗi.

⁸ Lali Yosuwa vulsi tun-sukka vuliya, Lawna as law kay buur mara bugol kayni loɗi.

⁹ Kay na'ta tun-sukka vi sabatna ka hini kay sumuna vi Lawna.

¹⁰ Kay sa ma kal kalaf hay tun-sukka vi Lawna tun sukam kay lopna valamu, ki Lawna tun sukam kay lopna valamu nala kaw.

¹¹ Gosay tuwaya kay cuk kalaf hay tun-sukka na'ta kayni, a sa ma nig gaa'a, hay li ma nam sli kuɗ bay-humda na'taɗi.

¹² Kay yoboyna vi Lawna ka iriya, nam dono'o kaw, siyam hiliw hiliw' suw kew-gaferaŋa ma siyam hay galam ma' pet nala, nam jik ta-ta ɓuraw ciwta hiɗi Ŋusta, gaslna hiɗi mul-zokŋa kaw, nam ka kitata kay darta hiɗi varta vi dikga.

¹³ Va ma koti marige kaw, ma may goy vokom haraŋɗi mayɗi: Slen kaf ka goy nala'a, lakay goy haraŋi vok ir nam ma nay ma di lawta vay goy vokomna.

Yesu Kristu nam ŋol suw muliyan ŋulo sa-ɗifinna vi bonota ta jewta

¹⁴ Kay nay ka hiɗi mul ŋol ma-ɗifinna kepe, ma raway hay dukalawna, Yesu goora vi Lawna, lakay ɗeŋe hay vida vaya.

¹⁵ Kay nay ka kayn hiɗi mul ŋol ma-ɗifinna ma nagay kay tap hiɗi maŋayta vayɗi naɗi, may nam ma ay vok nemda ŋray ca ki nay nala vok slen pet, may li sulukɗi.

¹⁶ ɦuray kulo'o hiɗi vida tam zlamda-mulda vi slugota, kay nay ma muɗ kiram hawi, fi slugota kaw, a nam ma gutaya hay liyamu.