HEBRENA 2 - BIBALDA TA PELDETTA

¹ Kay na'ta nay ma li ŋal ŋol suw asa kay slen ma nay humumna, kay nay ma ba goy waa ɦawaɗi.

² Kay la yoboyna ma sa Sunda-wuralawna kusumna colay dono'o, la raw-goyta hiɗi ŋel-vunda kaf fi wurakŋa valamawa hay liyam ɗiger kaw,

³ nay fi pir goyo nanige, la nay hin su'da ta ŋolda nala goyo? Su'da na'ta, Bum-Sumuna di goy ka' jew pa, ɗeki goy haraŋ taya kay sa huma'ay jewna,

⁴ Lawna vul donot kay di-goyta visiya hay ɗekka, hay slen ma gul-yalda, hay slen ma suw mu'da ŋolo kaw, hay ɓurawta vi Ŋusta-Peldetta ta vul kuɗ minda va'a.

⁵ May nagata ta min ma'a ta numa ka law ka'ta Lawna may tuna' gaa kuɗ sa sunda-wuralawnɗi.

⁶ May sa kep li di-goyta ki kayn nala hay liyn mara ala: San kayn mi gige, a humaŋ ma gaŋ kalamu? Lebo goora vi sana mi gige a naŋ cuk iraŋ kalamu?

⁷ Naŋ lum goy ir kiɗay tam sa sunda-wuralawna ir liyn neeɗa, naŋ tunum bogoray ma gajijita hiɗi ma koldawa kalamu, naŋ musumawa kulo kay lopna vi ɓaŋ kafe,

⁸ naŋ cuk slen kaf gaa kuɗ selemu kaw. Hay li ma nam cukum slen kaf gaa kuɗ selem cukŋa, Lawna hin va mara goyo bay tun gaa kuɗumu may loɗi.

⁹ May nay ɗuw nam ma ay koti ir liyn neeɗa kiɗay tam sa Sunda-Wuralawna, Yesu, kuɗ mitta ta nam fi lasta haya, nam fi bogorayna vi gajijita hiɗi kolda, nala kuɗ slugota vi Lawna, nam jugo mitta kay kafe.

¹⁰ Kay kayni hay liyamu kay nam ma slen pet li'e hayamu, ma slen pet lakay kayn kalamu kaw, nam ma mar gurona ŋolo tam gajijita, yawsi kulo tam pasiyakka, hay lasta muɗi bum su'da visiya.

¹¹ Kay nam ma lisi goy peldete hiɗi nisi sa liy goy peldetna, nisi kaf may hay kepe. Kuɗ na'ta kayni, nam li zulo'o kay yisi ala ɓosiyomna loɗi.

¹² Hay li ma nam di ala: Nan ma di goy kay semda vaŋu tam ɓosiyonna, nan ma vulaŋ suburta jar tokŋa.

¹³ Lo: Nan ma tun varta van kaf hayamu. Lo, nan zawni, nan hiɗi gurona sa Lawna vulantina,

¹⁴ Kay na'ta ki gurona ka tapay kep hay busuwna hiɗi sliwna, nam kaw, ŋray ca, tapawa haya, kay nam hay mitta fi kirap nam ma donota vi mitta ay kalamna, min di'e: mi Matna.

¹⁵ Kay but goyo nisi kaf sa, hay poyta visiya ay juni gorvo kuɗ narta vi mitta.

¹⁶ Kay nam ma kayni, may kay gut kuɗ sunda-wuralawnɗi, may nam ma kayni kay gut kuɗ gurona vi Abraham.

¹⁷ Kay na'ta nam ma muɗ ŋray hiɗi ɓosiyomna, hay slen kaf, kay nam fi li goy mul ŋol ma-ɗifinna, ma slugona, ma gasina kaw hay lopna vok Lawna, kay li poora kay sulukŋa vi sumuna.

¹⁸ Kay kuɗ ta ala nam kay tuwamu fi lastawa hay li ma nam ay vok nemda, nam as gut kuɗ nisi sa ka vok nemda.