HEBRENA 12 - BIBALDA TA PELDETTA

¹ Kay na'ta nay kaw hay li ma nay wi ɗugulla vi sa di-goyna ŋolo ŋuyi taya, hinay sle ma nekŋa hiɗi sulukŋa ma gaɓi tay donona goyo, jaŋay hiɗi kursuliya tam dabta ta tuni vokaya,

² iray cuki kay Yesu, bum vida vaya ma nara' tam lita goy pasiyakka. A nam mus hay firita ma ŋaɓam kalamu, nam ziy gu-ma-grakŋawa, nam ɗuw zulota birek-ceke, musawa gaa'a kay zlamda-mulda hay gal ɓam ma jufna vi Lawna kaw.

So-tuwta

³ Vargi kay nam ma ziy lasta hiɗi ŋalda hay ɓam sum sa sulukŋa, kay nigi ma fi makkaɗi, muɗ bay kursuliya hay ciwta vigiɗi kaw.

⁴ Nigi bay so tuwgi ta-ta tam busuwna kay dur hiɗi sulukŋa tuwa.

⁵ Yigi jok teŋ-irta ma di tigi ki tam gurona nala ala: Goora vanu, naŋ ma ɗuw gatta vi Bum-Sumuna waaɗi, naŋ ma muɗ bay-kursuliya hay li ma nam ka gataŋuɗi,

⁶ Kay Bum-sumuna gat sa ma nam minimna, ci goora ma dikam minimna kaf hiɗi zugulla.

⁷ Vigi cit kayn tigiya: Lawn li tigi kayn ki tam gurona nala. Kay goora ma bulum gatamɗin mi gige?

⁸ May la nigi may fi watta ma kay sumun kafɗina, kay na'ta kayn nigi si guro sa vuɗi mizewe, say si guro sa gasinɗi.

⁹ Kay nay fay sumiyay sa hay sliwna sa gataya, nay slisi yisi kulo kaw, nay ma hot yay gaa kuɗ bum ŋusiyana kay vulay irita ŋol suwɗi su?

¹⁰ Kay sumiyaya gatay kayn ir liyn neeɗa ɦawa, ki ɗuw kirsi ŋaa'a nala; may Lawn hayɗin gatay kayn kay fita vay ta ŋaata, kay tapay hay peldetta.

¹¹ Gatta kaf, gasi hay li ma na' co jewe ki yorta nala, may mi firitaɗi; may bugolda na' vul vuɗna ma sleɗna vi ɗigerta kaf mi nisi sa hum kuɗa'na.

¹² Kay na'ta ɓigi ma toy gaa hulosna hiɗi ŋulofgi ma vi zlaw-zlawna nigi ma lakam dono'o.

¹³ Tungi segi hay hagata ma gerger ɗiger, kay va ma dirlayna ma gun goy loɗi, may fi ŋaata.

¹⁴ Gargi toyta hiɗi sumun kaf, lita goy peldetta kaw, kay bay kayni sa fi wi Bum-sumunɗi.

¹⁵ Ɗuwgi tuwgi ŋaa'a, kay sa ma hin slugota vi Lawna goyɗi, kay sutayna ma galakŋa ma day kulo'o kay li va ma joo'o ta-ta sumun ŋolo ma muɗ liwis kuɗumɗi.

¹⁶ Lakgi jigere, hin tuwgi kal hay zlata-bulotaɗi, kay sa ɗuw sle ma peldetna ki va ma ɦawa naɗi, ki Esaw nala, kuɗ tina ɦawa gus ŋolda valam goyo.

¹⁷ Nigi kaw wi ala bugolda, hay li ma nam gar kay fi bolda hay vocota, nam ray goy ɦawa'a, kay nam fi hagata kay hot bulumay kay muɗ dita valamɗi, nir na'ta kep nam gara' hiɗi zimiyna.

¹⁸ Nigi teray kayni may tam hiɗiyta ta san as jo' hiɗi ɓalamtaɗi, ta ay zakay hiɗi kunaɗi, hiɗi liyn ma gurinɗi, hiɗi jufundaɗi, hiɗi birinaɗi,

¹⁹ hiɗi tiyna vi togolomnaɗi, hiɗi della vi yoboynɗi kaw, kay nisi sa humumna job kay law mara ne' kaw ma liys diy tisi loɗi.

²⁰ Kay nisi as kay ziy dit na'taɗi, la muura ɦawa kaw jo hiɗiyta, nisi gum hiɗi goorhoyona.

²¹ Va ma nisi wum kayn muɗ sumuna nar ŋolo, ta-ta Musus di ala: Narta van ŋolo, tuwan muɗ van bat-bat'.

²² May nigi teray kayn tam hiɗiyta vi Siyon hiɗi hoyok-ziyna vi Lawn ma irina, Yerusalem ta kulo wuralawnta, tam vok ma birim doogona vi sunda-wuralawna;

²³ tam tokŋa hiɗi tapna vi sa vuɗi jewna sa sesi ɗoy hay wuralawna; tam Lawna, ma ka kitata kay kafe, tam ŋusiyana vi sa ɗigera sa coy tam pasiyakka;

²⁴ tam Yesu sa ma tap-jaara vi bonota wulita, tam busuwna ma yamam goyna, ma law ŋaa'a suw busuwna ma Abel yamam goyna kaw.

²⁵ Ligi ŋali! Sa ma di tigin zawni nigi ma humumu. Kay la nisi sa hay nagat tanna hum kuɗ sa ma di tisinɗi, nisi may raw goy vun gattaɗi, nay kaw as a piray goy nanige, la nay muɗ bugolay tam nam ma ka gatay hay wuralawn pa?

²⁶ Nam ma delem geɗ nagata, may wulini nam col deŋga tay ala: Wulini sem kep lo, nan ma wira' ɗawni ti nagata va' kep loɗi, may dukalawn lay.

²⁷ Dit kayni: Sem kep lo ɗek ala slen ma nam kotomna ma wirta lumna vatawa goyo, a slen ma wirɗina ma mus ta-ta.

²⁸ Kay na'ta, ki nay fi mulda ta ge'ɗitawa, nay ma lak hiɗi gi-deɓta, nay ma sun Lawna hay girifta ta kiram ŋaa'a, hay vida hiɗi narta kaw.

²⁹ Kay Lawna vaya nam mi kuta ŋalta.