HEBRENA 11 - BIBALDA TA PELDETTA

Vida vi sumuna sa hay bonota jewta

¹ May vida kayni mi varta ma tuni kay slen ma san ka zamam hiɗi sle'ta, ɗekka-goyta vi slena ma ir sa may wumɗina.

² Kuɗ vida sa viyna sa ɓa-ɓana sumuna li di-goyta ŋaata kisiya.

³ hiɗi vida nay wi ala nagata liyawa hiɗi yoboyna vi Lawna, kay slen ma nay wumna kayni may co kuɗ slen ma goy haraŋŋaɗi.

⁴ Hiɗi vida Abel mar ɗifinna ma ŋaana ma suw vi Kayin vok Lawna, hiɗi na'a, di-goyta li goy kalam ala nam ɗigere, hay li ma Lawna kay tuwamu li di-goyta kay ɗifinna valamu; kuɗa'a nam mitiya, may ka law bugol mitta kaw.

⁵ hiɗi vida Henok sliys goyo, nam wi mittaɗi; sa fumɗi kaw, kay Lawna slumis goyo, kay jew sli-goyta valamu, di-goyta li kalam ala nam kir Lawn ŋaa'a.

⁶ May, bay vida sa as li ŋaa'a kir Lawnɗi; kay sa ma ma tam Lawna, la linigekaw nam ma vi ala Lawn ka'a, nam wurak nisi sa garamna kaw.

⁷ hiɗi vida Nuwa, hay li ma Lawna dum kay sle ma sa bay wum tuwana, hay narta peldetta nam kot arkena tam su'da kay jafna valamu; hiɗi na'a, nam ka kitata tam ba-goyta kay nagata, nam muɗi mi ma yaw vocota vi ɗigerta ta fa' kuɗ vida.

⁸ hiɗi vida Abraham hum kuɗ yita vi Lawna kay tuɗ hay nagata ta nam ma fa' voco'o, nam kaliya bay wi liyn ma nam tuɗ hayna.

⁹ hiɗi vida nam kalay mus hay nagata ta ŋaɓay talamta ki hay nagata ta pul nala, musi hay guɗukŋa, tapay hiɗi Isaak hiɗi Yakub, sa tapay yaw vocota vi deŋga na'ta hiɗi namu.

¹⁰ Kay nam zam ɓam hoyok-ziyna ma selem tuni gaa donona, hoyok-ziyna ma inimu kotomu kaw mi Lawna.

¹¹ hiɗi vida, Sara kaw fi donota kay vuɗ jafna hay li ma busata vi vu'da va'a kalay kal, kay na' fi dono'o hay nam ma li deŋga ta'na.

¹² Kay na'ta, goy hay san kepe -- san kep ma coy goboy tam mitta -- jafna vuɗi ŋolo ki mislekŋa ma dukalawna hiɗi ŋeslna ma kel niy-lum ma ŋulona nala, ma sa as ŋam noŋɗi.

¹³ Nisi kaf miti hay vida, bay fi sle ma ŋaɓay tisina, may nisi kaf wumu, gum deɓ goy gine'e, di goy hiɗi vunsi kaw ala nisi ay pulu, nisi lakay rogoy ɦawa kay nagata.

¹⁴ Kay nisi sa di nana ka ɗek goy haraŋ ala nisi gar nagata ta vuɗita visiya.

¹⁵ Lali gizansi visi viy kay nagata ta nisi kalay goy haya' pata, nisi fi liynawa kay hot haya.

¹⁶ May hay gasit kayni, diksi ka tisi kay nagata ta vuɗita ta ŋaa suwa, min di'e wuralawna. Kay na'ta Lawna may li zulo'o kay nisi yum Lawna visiyaɗi, kay nam kotsi hoyok-ziynawa.

¹⁷ hiɗi vida Abraham li ɗifin hiɗi Isaak, hay li ma nam ay hay wakka. Kayni mi goora valam ma vuɗi kepna, ma nam fi deŋga kalamna, nam li ɗifin hiɗi namu.

¹⁸ Nam ma dit di kalam ala: Hay Isaak jafna vaŋ selem ma yi'e.

¹⁹ Nam var ala Lawn kayn dono'o kay day sa mitina kulo hay mitta pa. Kuɗ kayni Lawna hotom goora valamu; Nam kayn mi va ma ɗek goyo.

²⁰ hiɗi vida Isaak gi bol mi Yakub hiɗi Esaw kay slen ma min ma voko kaw.

²¹ hiɗi vida Yakub, hay li ma nam ka goboy vun mitta, gi bol mi gurona vi Yosef kisi kep kep, nam guɗof gaa kay yam zugulda valamu, siɗawa kaw.

²² hiɗi vida Yosef, goboy tam dabta valamu, law kay kal-goyta vi gurona vi Israyel, vul gatta kaw kay zokomu.

²³ hiɗi vida sumay Musus ŋayam til ɦidi bugol vu'da valamu, kay nisi wum kayni, nam goor ma jifiy ŋolo, nisi li nar kay vun-ma-gatna vi mullaɗi.

²⁴ hiɗi vida Musus, hay li ma nam muɗawa ŋolo, may min kay nisi ma yum ala goora vi goota vi Farawn loɗi.

²⁵ Kay nam vilek a fi lasta hiɗi sumuna vi Lawna suw musta ma hiɗi firita ne' ɦawa hay sulukŋa.

²⁶ Kay nam ɗuw hawta vi Kristu faray ŋol suw farayna vi Egipte; kay nam ɗuw goy vokom gine ŋolo tam wurakŋa.

²⁷ hiɗi vida nam hin Egipte bay narta kay ɦiyda vi mulla, kay nam col dono'o, ki nam ka wi nam ma ir sa wumɗina nala.

²⁸ hiɗi vida nam li paskata hiɗi yam-goyta vi busuwna, kay nam ma vat gurona tun ɓalam tam guro sa jewna vi Israyel noŋɗi.

²⁹ hiɗi vida nisi jik hay niy-lum ŋol ma slawna ki kulo kay nagata ɗeŋga nala, may hay li ma sa Egiptena wak kayni, niyna kuluɓ kisiya.

³⁰ hiɗi vida gulmunna vi Yeriko ɦo gaa'a, bugol nisi ŋuyum ir buur siɗiya ŋuyna.

³¹ hiɗi vida Rahab cata gawlaŋga ba goy hiɗi sa bay-vinaɗi, hay li ma na' vi sa co ɗuw gul-liyna hiɗi ŋaata.

³² Nan ma dum mara ɗawn mi mige? Liyn may asanɗi la nan law kay Gedeyon, kay Barak, kay Samson, kay Yefte, kay David, kay Samuel hiɗi sa jobta-Lawna,

³³ nisi sa, hiɗi vida kol kay mulda, li ɗigerta, fi deŋga, duk vun zlona,

³⁴ tew donota vi kut goyo, pir goy vun siy kew-gaferaŋa, hot fi donota hay li ma nisi ay moyo, nisi ay gaŋeraŋ hay duura, vok-ma-duura vi sa pulla nisi merem goy pek-peke kaw.

³⁵ Boyna fi sa mitina visiya hay dayta-kulota. Segena fi lasta may, nisi may gar butta-goytaɗi, kay nisi ma fi dayta-kulota ŋaa suwa.

³⁶ Segena fi burahta, fi libetna kaw, lo jaɓna hiɗi daŋgayna kaw.

³⁷ Nisi fi gita hiɗi goorhoyona, nisi waksiya, harsi tuwsi hiɗi siina, cisi goy hiɗi kew-gaferaŋa, nisi kal tani, kal ɗawni, bak fok-dimina hiɗi bak fok-meena cuki tisiya, hay hawta ŋolda, lakay hay zumalda hiɗi lasta kaw.

³⁸ Nisi sa nagata nag kisiɗina -- nisi tulur hay fulda, hay hiɗiyna, hay zulla vi hiɗiyna hiɗi ɦor-ɦuɗukŋa vi nagata kaw.

³⁹ Nisi kaf sa, fi di-goyta ta ŋaata kuɗ vida visiya, nir na'ta kep nisi fi slen ma deŋay tisinaɗi.

⁴⁰ Kay Lawna kot sle ma ŋaa suwa kaya, kay bay naya nisi fi co hay pasiyakkaɗi.